Showing posts with label Stories. Show all posts
Showing posts with label Stories. Show all posts

Tuesday, January 29, 2013

අද පොලීසිය, හමුදාව, අධිකරණය සියල්ලකම බලය ආණ්ඩුව අරගෙන - හර්ෂ ගුණවර්ධන

Harasha Gunawaradana
"අපිට විශ්වාස කරන්න බෑ පොලීසියට මේ සම්බන්ධව යමක් කරන්න පුළුවන් වෙයි කියලා. මොකද අද‍ පොලීසිය, හමුදාව, අධිකරණය සියල්ලකම බලය ආණ්ඩුව අරගෙන තියෙන්නේ."

රුහුණ විශ්වවිද්‍යාලයේ මහා ශිෂ්‍ය සංගමයේ සභාපති හර්ෂ ගුණවර්ධන

රුහුණ විශ්වවිද්‍යාලයේ මහා ශිෂ්‍ය සංගමයේ සභාපති හර්ෂ ගුණවර්ධන මහතාට මැර ප්‍රහාරයක් එල්ලකර සති දෙකක් පමණ ගතවී තිබුණද තවමත් කිසිවෙකු අත්අඩංගුවට ගෙන නොමැති බව එම සංගමය පවසයි. දින කිහිපයක් රෝහල්ගතව සිට අද වන විට තරමක් සුවය ලබා සිටින මොහොතක මේ සම්බන්ධව අදහස් පළ කළ හර්ෂ ගුණවර්ධණ මහතා.

" ඇත්තටම අද ක්‍රියාත්මක වෙන්නෙ දකුණෙ ත්‍රස්තතවාදයයි. එක ඉතා පැහැදිලියි. අංක තහඩු නොමැති වාහන වලින් පැමිණිලා ශිෂයයන් පැහැරගන්න තැත් කරලා පහරදෙන එක ඇතුලේ තියෙන්නේ රාජ්‍ය ත්‍රස්ථවාදයයි. කොටි ත්‍රස්තවාදය අවසන් කළාට පස්සේ අද තියෙන්නේ මේ දේ. එක පැත්තකින් යාපනය විශ්වවිද්‍යාලයේ ශිෂ්‍යයන්ට පහරදීලා ඔවුන් අත්අඩංගුවට ගන්නා ක්‍රියාවලිය අද දකුණේ විශ්වවිද්‍යාල තුළත් සිදුකරමින් පවතිනවා. රාත්‍රීකාලයේ අංක තහඩු නොමැති වාහන වලින් ඇවිල්ලා එහෙම පහරදීමක් කරන්න තරම් ඔවුන්ට තියෙන බලට මොකක්ද? රාජ්‍ය බලයද එහෙම නැත්නම් දේශපාලන බලයද කියලා තමයි මේ පෙන්නුම්කරලා තියෙන්නේ.

ඒ නිසා මේක එක පැත්තකින් මේ රටේ තියෙන දේශපාලනයට මිනිස්සු අවනත කරන්න තමන්ට අවනත නැති අය නිහඬ කරන දෙයක්. ඔවුන්ගේ පැවැත්ම තියෙන්නේ ඒක හරහා. මේ වෙලා තියෙන සිදුවීම් වලට පොලීසියවත්, විශ්වවිද්‍යාල පරිපාලනයවත් කිසිදු ක්‍රියාමාර්ගයක් අරගෙන නෑ. ඉදිරියේදී කම්කරුවන්ට, ගොවියන්ට, ධීවරයින්ට ඒ වගේම සාමාන්‍ය ජනතාවට මේ ආකාරයේ පීඩාවලට ලක්වෙන්න වෙ එක ඉතා පැහැදිලියි. '' යැයි පැවසීය.

'' විශ්වවිද්‍ය ශිෂ්‍යයන් හැටියට විශ්වවිද්‍යාල තුල ඇතිවන ප්‍රශ්න විසඳන්නෙ නැතිව ශිෂ්‍යයන්ට අවශ්‍ය ගුණාත්මක අධ්‍යාපනයක් ලබාදෙනතාක් ශිෂ්‍යයන් අරගල කරයි. මේ වන විට ශිෂ්‍යයන්ට තියෙන මූලික ගැටළුව නායකත්ව පුහුණුව නෙමෙයි. ආණ්ඩුව දිගින් දිගටම ගෙනයන නායකත්ව පුහුණුව තුල අලුතින් එන ශිෂ්‍යයන්ට නායකත්වය ගොඩනගන්න තමයි හමුදා පුහුණුව ලබාදෙන්නෙ කියලා.

නමුත් මේ වනවිට ශිෂ්‍යයන්ට තියෙන මූලික ප්‍රශ්නය උසස් අධ්‍යාපනය ඇතුළෙ තියෙන ගුණාත්මක භාවය ආරක්ෂා නොවීමයි. ඒ නිසා තමයි ශිෂ්‍යයන් සටන් කරන්නේ. ඒ නිසා ශිෂ්‍යයන්ට මේ එල්ල කරන පහරදීම් ශිෂ්‍ය මර්දනය වහා නතර කරන්න කියලා අපි රජයෙන් ඉල්ලා සිටිනවා.

ශිෂ්‍යයන්ට විශ්වවිද්‍යාල ඇතුලේ මුහුණදෙන ගැටළු නිරාකරණය කරන්නේ නැතිනම් දිගින් දිගටම ශිෂ්‍යයන් තමන්ගෙ අයිතිවාසිකම් වෙනුවෙන් , රටේ අධ්‍යාපනය වෙනුවෙන් රටේ මහජනතාව එක්ක සටන් කරනවා. මට එල්ල කරපු ප්‍රහාරයට මේ වෙනතෙක් ගත්ත ක්‍රියාමාර්ග පිලිබඳ සෑහීමකට පත්වෙන්න බෑ. ඒ පිළිබඳ අපේ තියෙන්නේ කනගාටුවක්. අනිත් එක අපිට විශ්වාස කරන්නත් බෑ පොලීසියට මේ සම්බන්ධව යමක් කරන් පුළුවන් වෙයි කියලා. මොකද අද පොලීසිය, හමුදාව, අධිකරණය සියල්ලකම බලය ආණ්ඩුව අරගෙන තියෙන්නේ. මේ ගෙනයන ඒකාධිපති පාලනය වෙනුවෙන් ජනතාවට පෙනීසිටිය යුතු කාලය උදාවෙමින් පවතිනවා කියලා අප විශ්වාස කරනවා.'' යැයිද පැවසීය.

මහේෂ් මල්වර ආරච්චි
'අද' පුවත්පත

Saturday, January 19, 2013

යාපනය සරසවි සිසුන් වහා නිදහස් කරනු!

යාපනය විශ්වවිද්‍යාලයේ සිසුන් වහාම නිදහස් කිරීමටත් උතුරේ මිලිටරි පාලනය ඉවත් කොට සිවිල් පරිපාලනය ස්ථාපිත කිරීමටත් උතුරේ ඉඩම් කොල්ලය වහාම නතර කිරීමටත් ආණ්ඩුව පියවර ගත යුතු යැයි සම අයිතිය ව්‍යාපාරයේ කැඳවුම්කරු රවීන්ද්‍ර මුදලිගේ මහතා පැවසීය. 

ඔහු මේ බව පැවසුවේ අත්අඩංගුවේ සිටින යාපනය විශ්වවිද්‍යාලයේ සිසුන් සිව් දෙනා වහා නිදහස් කරන්නැයි ආණ්ඩුවට බල කිරීමේ අන්තර්ජාල පෙත්සමකට අත්සන් ගැනීමේ ව්‍යාපාරයක් ආරම්භ කරමිනි. සම අයිතිය ව්‍යාපාරය විසින් රාජගිරිය ‘සිංහ’ සමාජ ශාලාවේදී මෙම අන්තර්ජාල පෙත්සම විවෘත කරනු ලැබීය. http://www.ipetitions.com/petition/free-jaffna-students-leadersවෙබ් ලිපිනය ඔස්සේ මෙම අන්තර්ජාල පෙත්සමට අත්සන් කළ හැකිය.

අන්තර් විශ්වවිද්‍යාලයීය ශිෂ්‍ය බලමණ්ඩලයේ කැඳවුම්කරු සංජීව බණ්ඩාර මහතා 

‘‘අපි ආණ්ඩුවෙන් අහනවා, තමන්ගේ මිය ගිය ඥාතීන් සිහිපත් කර පහනක් දැල්වීමද ත‍්‍රස්තවාදය? එහෙමත් නැතනම්, ආයුද සන්නද්ධව විශ්වවිද්‍යාලය තුළට කඩා වැදිලා නිරායුද සිසුන්ට පහර දීලා තර්ජනය කිරීමද ත‍්‍රස්තවාදය? දැන් ආණ්ඩුව කියනවා, අත්අඩංගුවට ගත් යාපනයේ සිසුන් පුනරුත්ථාපනය කරන්න ඕන කියලා. පුනරුත්ථාපනය කරන්න ඕන ශිෂ්‍යයින් නොවෙයි. පුනරුත්ථාපනය කරන්න ඕන අය ඉන්නේ ආණ්ඩුවේ. ඝාතකයන්, ත‍්‍රස්තවාදීන්, ස්ත‍්‍රී දූෂකයින්, අපරාධකාරයින්, කුඩුකාරයින්, හොරු, සමාජ විරෝධී යැයි සම්මත සියලු ආකාරයේ විශමාචාර සිදු කරන්නන් ඉන්නේ පාර්ලිමේන්තුවේ සහ ආණ්ඩුවේ. ඒ අයයි පුනරුත්ථාපනය කරන්න ඕන.’’

රවීන්ද්‍ර මුදලිගේ මහතා. 

යුද්ධය අවසන් වෙලා වසර හතරක් ගත වෙලා තිබෙනවා. නමුත් ජාතික ප‍්‍රජාවන් අතර විරසකභාවය දුරු කරලා, සමගිය, සහජීවනය ඇති කරන්න කිසිදු පියවරක් අරගෙන නැහැ. 

ආණ්ඩුව තමන්ගේ නව ලිබරල් ධනවාදී ආර්ථික වුවමනාවන් ක‍්‍රියාත්මක කරන්න ජනතාව වසඟ කිරීමේ දේශපාලනයක් පවත්වාගෙන යනවා. ඒ වගේම, ගොඩනගා ගත් මිලිටරි ආධිපත්‍ය මගින් මුළු රටම යටපත් කර තිබෙනවා. උතුරු සහ නැගෙනහිර ප‍්‍රදේශවලට එය විශේෂ ප‍්‍රශ්නයක් බවට පත් වෙලා තිබෙනවා. 

දෙමළ ජනතාවට සැබෑ මනුෂ්‍ය ජීවිතයක් ගත කරන්න අවශ්‍ය අවම ප‍්‍රජාතන්ත‍්‍රවාදී අයිතියත් අහිමි කර තිබෙනවා. ආණ්ඩුව උත්සාහ කරමින් සිටින්නේ උතුරේ ජනතාව, යාපනය විශ්වවිද්‍යාලයේ සිසුන්ට ඔළුවට තුවක්කුව තියලා පාලනය කරන්නයි. උතුරේ නිවාස නැති ජනතාවට නිවසක් ලබා ගන්න, රැකියාවක් නැති තරුණ තරුණියන්ට රැකියාවක් ලබා ගන්න, කෘෂිකර්මාන්තය අහිමි කර තිබෙන ගොවි ජනතාවට ඒ අයිතිය ලබා ගන්න, මුහුදට යන්න නොදෙන ධීවරයාට ඒ අයිතිය ලබා ගන්න අරගලයක් අවශ්‍යයි. දැන් ආණ්ඩුව උත්සාහ කරනවා, පීඩිතයා ජාතිවාදී, ආගම්වාදී පදනමින් බෙදන්න. එක් ජාතිවාදයක් වෙනුවට තවත් ජාතිවාදයක් තෝරා ගැනීම මේ ප‍්‍රශ්නයට උත්තරය නොවෙයි. ඒ නිසා අපි යෝජනා කරනවා, සිංහල, දෙමළ මුස්ලිම් සියලු පීඩිත ජනතාව ඒකාබද්ධ අරගලයකට පැමිණිය යුතුයි කියා. 

ඒ වගේම අපි ආණ්ඩුවට බල කරනවා, අත්අඩංගුවට ගෙන රඳවා සිටින යාපනය විශ්වවිද්‍යාලයේ ශිෂ්‍යයින් වහාම නිදහස් කරන්න, පැහැර ගැනීමේ අතුරුදහන් කිරීමේ සංස්කෘතිය වහාම නතර කරන්න, උතුරේ හමුදා කඳවුරු හදන්න සහ ආණ්ඩුවේ පටු දේශපාලන වුවමනාවන් වෙනුවෙන් කරන ඉඩම් කොල්ලය වහාම නතර කරන්න. ඒ විතරක් නොවෙයි, කිසිදු නීති විභාගයකින් තොරව රඳවාගෙන සිටින සියලුම දේශපාලන සිරකරුවන් වහාම නිදහස් කරන්න. 

සම අයිතිය ව්‍යාපාරයේ සම ලේකම් පලනිවේල් රිචඩ් මහතා 

යාපනය විශ්වවිද්‍යාලයේ සිසුන් හතර දෙනා දින 45කට වඩා වැඩි ගණනක් තිස්සේ රඳවාගෙන සිටිනවා. පසුගිය නොවැම්බර් මාසයේ දී සිසුන් පැවැත්වූ උද්ඝෝෂණයට හමුදාව හා පොලිසිය පහර දුන්නාට පස්සේ, සිසුන් 40දෙනකුට වැඩි පිරිසක් හමුදාව විසින් පරීක්ෂණයට ලක් කළා. සිසුන් 13දෙනෙක් අත්අඩංගුවට ගත්තා. ඒ අතරින් සිසුන් සිව් දෙනකු තවමත් රඳවාගෙන සිටිනවා. 

ජනතාවගේ අයිතීන් දෙන්න බැරි ආණ්ඩු අවුරුදු තිහක් තිස්සේ එල්.ටී.ටී.ඊ. සංවිධානය පෙන්වලා ජනතාවගේ ප‍්‍රශ්න යටපත් කළා. දැන් ඒ වෙනුවෙන් ජාතික ප‍්‍රජාවන් අතර විරසකභාවය වර්ධනය කරන්න උත්සාහ කරනවා. සතුරුභාවය ඇති කරන්න උත්සාහ කරනවා. මේ ජාතිවාදී දේශපාලනය පරාජය කළ යුතුයි. එහෙම නොකළොත් මහා ඛේදවාචකයකට මුහුණ දෙන්නයි සිදු වෙන්නේ. 

නිදහස් මාධ්‍ය ව්‍යාපාරයේ කැඳවුම්කරු සුනිල් ජයසේකර මහතා 

ජනතාවගේ අදහස් පළ කිරීමට ඇති අයිතිය ප‍්‍රජාතන්ත‍්‍රවාදයේදී ඉතාම වැදගත්. පහනක් දැල්වීම කියන්නේත් අදහස් පළ කිරීමක්. එය අධිකරණය පවා පිළිගෙන තිබෙනවා. ඒ අයිතිය පිළිගත් අවස්ථාවක් තමයි, වත්මන් ජනාධිපතිවරයා ජනඝෝෂා නමින් කළ උද්ඝෝෂණයේදී බෙර නාද කළ පුද්ගලයකුට පොලිසියෙන් කළ පහරදීම පිළිබඳ පැවති නඩු විභාගය. මේ සිසුන් අත්අඩංගුවට ගෙන සිටින්නේ පහනක් දැල්වීම මගින් තමන්ගේ හැඟීම් ප‍්‍රකාශ කිරීමට උත්සාහ කළ නිසා. තුවක්කු නිහඬ වූ පමණින් සාමය ඇති වන්නේ නැහැ. සාමය සහ සහජීවනය ඇති වන්න නම් ප‍්‍රජාතන්ත‍්‍රවාදය අවශ්‍යයි. 

සිංහල පීරියඩ් එකට එන ආමි සර්ලා

බල්ලගෙ වැඬේ බූරුවා කරන්න ගියොත් හරි බූරුවා ගෙ වැඬේ බල්ලා කරන්න ගියොත් හරි මොකද වෙන්නෙ? 

මේ කතාව මතක් වුණේ පසුගිය දවසක අනාවරණය වුණු පුවතක් නිසා. මේ පුවත තමයි උතුරේ පාසල්වල දරුවන්ට සිංහල භාෂාව උගන්වන්න හමුදා නිලධාරීන් යොදවන්න තීරණය කර තිබීම. 

උතුරේ දරුවන්ට සිංහල භාෂාව උගන්වන්න හමුදා නිලධාරීන් ! 

ඔව්! කාරණය ඇත්තක්. කිලිනොච්චිය, තුනුක්කායි, මුලතිව් කියන ප‍්‍රදේශවල පාසල් එකසිය තුනක් ඒ සඳහා දැනටමත් තෝරාගෙන අවසන්. මේ වෙද්දි කලාප අධ්‍යක්ෂවරුන් ලිඛිතවම දැනුවත් කරලයි තියෙන්නෙ. අදාළ හමුදා නිලධාරීන්ට කාලසටහන් ලබා දෙන ලෙස. ගුරු ව්‍යවස්ථාව පවා උල්ලංඝනය කරල මේ දිනවල සිද්ධ වෙන්නෙ හමුදා නිලධාරීන් ගුරු වෘත්තියට ඇතුළත් කරන එකයි. 

දැන් ඔබට ප‍්‍රශ්න කරන්න පුළුවන් ඇයි හමුදා නිලධාරියෙක්ට ගුරුවරයෙක් වෙන්න බැරිද කියල. නමුත් අප ඉදිරියේ ඇති ප‍්‍රශ්නය වනුයේ හමුදා නිලධාරියාගේ මෙම ගුරු භූමිකාව කුමක් අරබයාද යන්නයි. 

යුද්ධය අවසන් කළ බව කියා වසර තුනකට අධික කාලයක් ඉක්මවා ගොස් තිබුණත් උතුරට නිදහස හිමි වෙලා තියෙනවද? දෙමළ ජනතාව ඒ නිදහස භුක්ති විඳිනවද? හමුදා මුරපොළවල් , කඳවුරු වෙනුවට සිවිල් පරිපාලනයක් වෙනුවෙන් උතුර නිදහස් කර තියෙනවද? ඒ 9මාර්ගය අලුත් වුණාට උතුරු ජනතාවගෙ හද ගැස්මේ තිගැස්ම වෙනස් වෙලා තියෙනවද? 

දකුණට අනුව උතුර නිදහස්ය. ඒත් ඒ නිදහස් උතුර නිදහස් නම් තවමත් පැහැර ගැනීම් සිදු වෙන්නෙ ඇයි? සාක්ෂි මකාදැමුණු ඝාතන සිදු වෙන්නෙ ඇයි? එල්ටීටීඊ සාමාජිකයන් යැයි ලේබල් කරමින් විශ්වවිද්‍යාල ශිෂ්‍යයන් කඳවුරු තුළට ගාල් කරන්නෙ ඇයි? නම් ලැයිස්තු හදමින් තරුණයන් ලුහුබඳින්නෙ ඇයි? නිවෙස් ඉදිරිපිට නිවැසියන්ගෙ ඡායාරූප ප‍්‍රදර්ශනය කර තබන ලෙස අණ කරන්නෙ ඇයි? කඳවුරු එකින් එක ඉවත් කරනවා වෙනුවට දිනෙන් දින හන්දියක් හන්දියක් ගාණේ කඳවුරු, මුරපොළවල් ඇති කරන්නෙ ඇයි? පහනක් දැල්වීමක් වරදක් ලෙස සලකමින් විලංගු දමන්නෙ ඇයි? 

තත්වය මෙසේ පවතිද්දී තමයි උතුරේ පාසල් වෙත ‘සිංහල’ උගන්වන්නට යැයි කියමින් හමුදා නිලධාරීන් ගුරු පුටුවේ හිදුවන්නෙ. අදටත් හමුදා නිලධාරීන් ඉදිරියේ උතුරේ මිනිස්සුන්ගෙ සියලඟ වෙවුලවන තත්වයක් තුළ ගුරුවරුන් ලෙස හමුදාව? 

හමුදා විනයට අනුගත සොල්දාදුවන් ඉගැන්වීමට යෙදවීමෙන් සිදුවන්නේ උතුරේ දරුවන් අධ්‍යාපන විනයට යොමු කිරීම නොව හමුදා විනයට බලහත්කාරයෙන් යටත් කිරීමය. විචාරවත් නිර්මාණශීලී මිනිසුන් හමුදා විනය තුළ බිහි වන්නේ නැති බව පැහැදිලිය. නමෝ විත්තියෙන්ම ‘Yes sir’ ‘OK sir’ ලා විනා ‘No sir’ කියන අභියෝගාත්මක මිනිසා හමුදා විනයක් තුළ කිසි කලෙක බිහි වන්නේ නැහැ. ඇත්ත ඒකයි. 

අනෙක් පසින් පසුගිය කාලය තුළ හමුදා නිලධාරීන් වෙත එල්ල වූ අපරාධ, අපචාර චෝදනා ද සුළුපටු ඒවා නොවන බව ඔබ දන්නවා. අයෙක් ස්ත‍්‍රී අපචාරයකට චෝදනා ලබද්දී තවත් අයෙක් ළමා අපචාරයකට චෝදනා ලබනවා. හමුදා භටයන් යොදවාගෙන කැලෑ කැපුවාට, වැව් හෑරුවාට, නගර මධ්‍යයේ උද්‍යාන හැදුවාට, ඒවායේ මල් හිටෙව්වාට වසර තිහක මිලිටරි මානසිකත්වය ඇති ජීවිත සාමාන්‍ය ජීවිතය වෙත නැවත කැඳවීම පහසු නැහැ. ආරක්ෂක බලධාරීන් ඔවුන්ගේ එම ජීවන ගැටලුවට පිළියම් ලබාදෙනු වෙනුවට කරන්නේ එම මානසිකත්වයෙන් වැඩ ගැනීමට සැලැසුම් කිරීමයි. එනම් විරුද්ධවාදීන් මර්දනයට යෙදවීමයි. එහිදී සොල්දාදුවන් හා ජනතාව යන දෙගොල්ලම මර්දනකාරී යාන්ත‍්‍රණයේ ගොදුරු බවට පත් වෙනවා. 

යුද්ධයක් පැවැති සමයේත් ඉන් පසුවත් මිලිටරි සපත්තුවට පෑගී, පොඩි වී සිටින මිනිසුන්ට නැවත නැවතත් දල්වන්නෙ රතු එළිම නෙවෙයිද? 

මෙහිදී තවත් විශේෂ කරුණක් වන්නේ මේ මිලිටරි ආඥාදායකත්වය උතුරට පමණක්ද යන්නයි. මේ වන විට විශ්වවිද්‍යාලයට ඇතුළත් වීමට සුදුසුකම් ලබා සිටින ශිෂ්‍යයන්ට හමුදා කඳවුරු තුළ පුහුණුවක් ආරම්භ කර අවසන්. නමට ‘නායකත්ව පුහුණුව’ වුණාට වැඬේ ක‍්‍රියාත්මක වෙන්නෙ කොහොමද කියන්න දැන් රටම දන්නවා. ශිෂ්‍යයො අත-පය කඩාගෙන ආබාධිත වෙනවා විතරක් නෙවෙයි මරණයේ ගොදුරක් බවටම පත් වුණා. මේ විදියට හමුදා කඳවුරු තුළ කෙරෙන නායකත්ව පුහුණුව, පෞරුෂ වර්ධනය කුමක්ද? 

විදුහල්පතිවරුන් වෙත ‘කර්නල්’ තනතුරු ප‍්‍රදානය කිරීමත් මේ හා බැඳුණු තවත් විශේෂ කාරණයක්. එහිදීත් විදුහල්පතිවරුන්ටත් හමුදා පුහුණුවකට යටත් වෙන්න සිද්ධ වුණා. අන්තිමට විදුහලට ආවේ කර්නල් නිල ඇඳුමෙන් සැරසුණු ‘කර්නල් විදුහල්පතිතුමා.’ විදුහල්පතිවරයාගේ සිට ශිෂ්‍යයා දක්වාම මොකක්ද මේ කරන්න හදන මිලිටරි බලපෑම. 

එපමණක් නොවෙයි විශ්වවිද්‍යාල වෙත හමුදාව මැදිහත් වීම දිනෙන් දින ඉහළ යමින් තියෙනවා. එක පැත්තකින් ශිෂ්‍යයන් ත‍්‍රස්තවාදීන් විදිහට ලේබල් කරනවා. අත්අඩංගුවට ගන්නවා. ඔළු පළනවා. මේ හැම මොහොතකම මිලිටරි සපත්තුව එල්ල වෙන්නෙත් අධ්‍යාපන අයිතිය විතරක් නෙමෙයි මිනිස්සුන්ගෙ ජීවත් වීමේ අයිතීන් වෙනුවෙන් හඬ නඟපු ශිෂ්‍යයන්ගෙ පපුවට. අනෙක් කාරණය තමයි උපාධිධාරීන් දහස් ගාණක් ප‍්‍රාදේශීය ලේකම් කාර්යාලවලයි, අමාත්‍යාංශවලයි ඇගමැළි කඩද්දි, ඇයි ඉගැන්වීමේ කාර්යය සඳහා හමුදා නිලධාරීන්ම අවශ්‍ය වුණේ කියන එක. ගුරු සේවා ව්‍යවස්ථාවට අනුව උපාධිධාරීන්ව ගුරු සේවයට අනුයුක්ත කිරීමේ වරදක් ඇත්තේම නෑ. 

දැනුමින් සමන්විත මානව සම්පතක් සිටිය දී ඔවුන් පසෙකට දමා ලෙෆ්ටිනන්ට්ලා, කර්නල්ලා, බි‍්‍රගේඩියර්ලා ගුරුවරුන් ලෙස වෙස් ගන්වන්නට හදන්නෙ බලය වෙනුවෙන් මුළු මහත් සමාජයම මිලිටරිකරණය කිරීම මිස වෙන කුමක් වෙනුවෙන්ද? 

ආශිකා බ‍්‍රාහ්මණ

Tuesday, December 25, 2012

යාපනයේ සරසවි ශිෂ්‍ය මර්ධනය උග්‍රවෙයි; තවත් සිසුවියන් තිදෙනෙක් ‘ ත්‍රස්ත විමර්ෂණයට ‘

යාපනය විශ්ව විද්‍යාලයේ සිසුන් හට කෙලවරක් නොවන ‘ ඊනියා ත්‍රස්ත විමර්ෂණ ඒකකයේ ‘ ප්‍රශ්ණ කිරීම්වලට මුහුණ දීමට සිදුවී තිබේ. දැන් ඔවුන්ගේ අලුත්ම ඉලක්කය වී ඇත්තේ ශිෂ්‍යාවන් වන අතර ප්‍රශ්ණ කිරීම් වලට භාජනය වන සිසුවියන් සංඛ්‍යාව දිනෙන් දින ඉහළ යමින්පවතී. අද (24) දිනයේදීද සිසුවියන් ත්‍රිදෙනෙකු ප්‍රශ්ණ කිරීම සඳහායැයි කියමින් වව්නියාව ත්‍රස්ත විමර්ෂණ ඒකකයට කැඳවා ඇත.

නොවැම්බර් 29 වැනිදා රාත්‍රියේදී මහා ශිෂ්‍ය සංගමයේ ලේකම්වරයා ඇතුළ තවත් සිසුන් රැසක් අත්අඩංගුවට ගැනීමෙන් පසුව ත්‍රස්ත විමර්ෂණ ඒකක විසින් ප්‍රශ්ණ කිරීම් වලට යැයි කියමින් වව්නියාව කාර්යාලයට කැදවූ සිසුන් සංඛ්‍යාව අති විශාල බව යාපනය සරසවියේ ආචාර්යවරයෙකු පැවසීය.
පසුගිය සතියේදී සිසුවියන් සිව්දෙනෙකුට වව්නියාව ත්‍රස්ථ විමර්ෂණ ඒකකයට පැමිණෙන ලෙස දැනුම්දුන් අතර පසුව දැනුම් ත්‍රස්ත විමර්ෂණ ඒකකය මගින් දැනුම් දුන්නේ ඉන් දෙදෙනකුට පමණ ප්‍රකාශ ලබාගැනීමට පැමිණෙන ලෙසයි.

මීට දින කීපයකට පෙරදී තවත් සිසුවියන් 5 දෙනෙක්ද ,ඉන් පසු දිනයකදී තවත් දෙදෙනෙකුට සහ ඊළඟ දිනයේදී තවත් තිදෙනෙක් වව්නියා ත්‍රස්ථ විමර්ෂණ ඒකකයට කැඳවා ප්‍රශ්ණ කිරීම් සිදුකර තිබේ.
හිටිහැටියේ දෙන දුරකථක ඇමතුම්වලින් මෙම සිසුන්ට ප්‍රශ්ණ කිරීම සඳහා වව්නියාව කාර්යාලයට පැමිණෙන ලෙස දැනම් දෙයි. එපමණක් නොව තවමත් දිනපතාම පිරිමි සිසුන්ගෙන්ද ත්‍රස්ථ විමර්ෂණ ඒකකය ප්‍රශ්ණ කරමින් සිටිති.

මේ අතර යාපනය සරසවිය අවට විශාල වශයෙන් බුද්ධි අංශ සාමාජිකයන් ගැවසෙනු දැකගත හැකි අතර යාපනය ශිෂ්‍ය මර්ධන මේවන විට ඉතා උග්‍රතත්ත්වයකට පත්ව ඇත. බොහෝ සිසුන් දැඩි භීතියට පත්ව සිටින අතර සමහරුන් රට ඇතැර යෑමට පවා කල්පනා කර ඇතැයි වාර්තා වෙයි.

ඊනියා ත්‍රස්ත විමර්ෂණ පනත 1979 දී සිට ක්‍රියාත්මක වන ත්‍රස්ත මර්ධන පනතට අනුව අත්අඩංගුවට ගන්නා පුද්ගලයෙකු දින 99 ක් දක්වා රඳවා තබාගැනීමේ නියෝගයක් නිකුත් කිරීමේ බලය ආරක්ෂක අමාත්‍යංශ ලේකම් හට බලය තිබේ.

යාපනය සරසවියේ මහා ශිෂ්‍ය සංගමයේ සභාපති බී.බවානන්දන්, එම සංගමයේ ලේකම් පී. දර්ශනාන්ත් ,ශාස්ත්‍ර පීඨයේ ශිෂ්‍ය සංගමයේ සභාපති කේ. ජෙනමෙයි ජයන්ත් සහ විද්‍යා පීඨ ශිෂ්‍ය එස්. සොලමන් යන සිසුන් වෙත ආරක්ෂක අමාතංශ ලේකම්වරයා විසින් නිකුත් කරන ලද මාස තුනක රැඳවුම් නියෝග යටතේ වැළිකන්ද හමුදා රැඳවුම් කඳවුරේ රඳවාගෙන සිටින ලබයි.

Monday, December 24, 2012

O/L විද්‍යා ප්‍රශ්න පත්‍රය එළියට ආවේ දුරකතනයක් අස්සේ


බඹරය වැල්ලේ කැරකෙන තාක්කල් හොඳය. ඒ කාලයේදී ගහන - ගහන හැම ගේමම හරි යන්නේය. මේ කාලයේදී සිකුරා නළලේ නටයි. එහෙත් හෙනහුරා නළලට ගොඩවීමට වැඩි කලක් යන්නේ නැත. ඒ කාලයට බඹර කප්පිත්තකුටවත් බඹරය කරකවන්නට නොහැක.

මේ කතාව ලිව්වේ අද වන විට විභාග දෙපාර්තමේන්තුවත්, එය මෙහෙයවන විභාග කොමසාරිස්වරයා සහ අධ්‍යාපන ඇමැතිවරයාත් දමන සෙල්ලම් දුටු විට වෙන කියන්නට දෙයක් නැති නිසාය. සාමාන්‍ය පෙළ විභාගයේ ප්‍රශ්න පත්‍ර, විභාගයට කලින් පිටවූ බවක් දැන් කොමසාරිස්වරයාට හෝ අධ්‍යාපන ඇමැතිවරයාට මතක නැත. දැන් කතා කරන්නේ කාලගුණය ගැනය. එමඟින් සාමාන්‍ය පෙළ විභාගයට ලියන සිසු සිසුවියන් පත්වූ අසීරුතාව ගැනය.

ඒ ගැන කතා කළ යුතුය. එහෙත් තමන්ගෙන් වූ වරද වසා ගන්නට ඒ ගැන අතිශයෝක්තියෙන් කතා කිරීමත්, වරද යට ගසන්නට දරන උත්සාහයත් හෙළිදරව් කළ යුතුය. සිසුන්ගේ කරුමයට කාලගුණය හරහට හිටියේය. එමඟින් ප්‍රශ්නපත්‍ර පිටවූ කතාව යට ගියේය. කොමසාරිස්වරයාත්, අධ්‍යාපන ඇමැතිවරයාත් කරකවන බඹරය තවදුරටත් වැල්ලේ කැරකෙන බව මුලින්ම ලිව්වේ ඒ නිසාය.

පහේ ශිෂ්‍යත්ව විභාගයේ ප්‍රශ්නපත්‍ර පිට විය. ඒ පසුගිය අගෝස්තුවේදීය. විභාග කොමසාරිස්වරයා ඒ ගැන සෙවීම අපරාධ පරීක්‍ෂණ දෙපාර්තමේන්තුවට බාර කෙළේය. කොටින්ම එසේ කිරීමෙන් අනතුරුව කොමසාරිස්වරයා අත පිසදා ගත්තේය. මේ සම්බන්ධයෙන් විමසූ විට ඔහු කියන්නේ අපරාධ පරීක්‍ෂණ දෙපාර්තමේන්තුව ඒ ගැන බලා ගනු ඇති බවකි.

අද, මේ දෙසැම්බරයේද සිදුවී ඇත්තේ එයමය. පුරුදු පරිදි සාමාන්‍ය පෙළ ප්‍රශ්න පත්‍ර පිට වීමේ සිද්ධිය ගැන සෙවීම අපරාධ පරීක්‍ෂණ දෙපාර්තමේන්තුවට පැවැරිණි. අධ්‍යාපන ඇමැති බන්දුල ගුණවර්ධන මහතා කිව්වේ 'මට විභාග දෙපාර්තමේන්තුව විශ්වාසයි' යනුවෙනි.

සා. පෙළ විද්‍යාව ප්‍රශ්න පත්‍රයේ ප්‍රශ්න දහනවයක්ම ටියුෂන් ගුරුවරයකු වූ සම්පත් අත්තටගේ නැමැත්තකු විසින් ලබාදී තිබිණි. ඔහු අපරාධ පරීක්‍ෂණ දෙපාර්තමේන්තුවට පවසා තිබුණේ තමන් වසර ‍ෙදාළහක් තිස්සේ මෙම විෂය උගන්වන නිසා අනුමාන නිවැරැදි වූ බවයි. ඔහුගේ මැජික් බලයෙන් ඔහු විභාගයට එන ප්‍රශ්න ඉදිරියෙන් සිනා මුහුණක සලකුණක්ද දමා තිබිණි. එයද අත්දැකීමෙන් කළා විය හැකිය.

මේ තරම් කරුණු තිබියදීත් විභාග කොමසාරිස්වරයා අදාළ ටියුෂන් ගුරුවරයා පිට වරදක් පටවන්නට සූදානම් නැත.

අපද එසේමය. ගෙඩිය පිටින් ඔහුගේ පිට දමා අත පිසදා ගන්නට අපද සූදානම් නැත. මෙය කාලයක් තිස්සේ සිදු කෙරෙන ජාතික විභාගවල ප්‍රශ්නපත්‍ර පිට කිරීමේ ජාවාරමක තවත් එක් සිද්ධියක් පමණි. 'මව්බිම' ගවේෂණ මඟින් හෙළිදරව් වූ ආකාරයට මේ පිටුපස රජයේ මුද්‍රණාලයේ නිලධාරීන් සිටී. විශ්වවිද්‍යාලයක නිලධාරීන් දෙදෙනකු සිටී. ඉන් එක් අයකු විද්‍යාගාර සහායකයෙකි. මෙවර සාමාන්‍ය පෙළ විභාගයේ ගණිතය, බුද්ධාගම සහ ඉතිහාසය යන ප්‍රශ්නපත්‍රද පිට වී ඇත.
'කොහොමද එහෙම කියන්නෙ? මොනවද තියෙන සාක්‍ෂි?'

අපරාධ පරීක්‍ෂණ දෙපාර්තමේන්තුවේ නිලධාරීන් දැන් පිම්මේ දිවවිත් 'මව්බිම' කර්තෘ මණ්ඩලයෙන් එසේ ප්‍රශ්න කරනු ඇත. හදිසි නොවන්න.
තරමක් විශාල ප්‍රමාණයේ ජංගම දුරකතනයක පසුපස ඇති බැටරිය ඉවත් කොට, ඒ වෙනුවට ප්‍රශ්න පත්‍රය ඒ තුළ බහා අදාළ විශ්වවිද්‍යාලයට රැගෙනවිත් ඇත. හෙළිදරව් වන ආකාරයට විද්‍යාව ප්‍රශ්න පත්‍රය අදාළ ටියුෂන් ගුරුවරයාට අලෙවි කර ඇත්තේ මේ කියන විශ්වවිද්‍යාලයේ මුලින් කී විද්‍යාගාර සහායකයාය. වහරේ භාෂාවෙන් කියන්නේ නම් ඔහු මීටරයකි. ඔහු අදාළ ටියුෂන් ගුරුවරයාට ප්‍රශ්න පත්‍රය ලබාදී නැත. ඒ වෙනුවට ඔහු ප්‍රශ්න පත්‍රය කියවා ඇත්තේ ටියුෂන් ගුරුවරයාට ලියා ගන්නා ලෙස පවසමින් යැයි කියැවේ. එහෙත් තවත් ගැටලුවක් ඇත. එකම විෂය උගන්වන දෙදෙනකු එසේ ප්‍රශ්නපත්‍ර මාරු කරගෙන තමන්ට එන්නට සිටින සිසුන් තවකෙකුට ලබා දෙයිද?

'මේවා හෝල් ක්ලාස්වල දෙන්න එපා. ඉන්ඩිවිජුවල් ක්ලාස්වල විතරක් දෙන්න.'

අදාළ පුද්ගලයා එවැනි උපදෙසක්ද දී ඇති බව කියැවේ. මේ ප්‍රශ්නපත්‍ර ඔහු ඉහළ මිල ගණන්වලට තනි තනි සිසුන් සිටින පන්තිවලදී ලබා දෙයි. මෙම විද්‍යාගාර සහායකයා ගම්පහ ප්‍රදේශයේ සහ නිට්ටඹුව ප්‍රදේශයේ එවැනි පන්ති රැසක් කරගෙන යයි. නමුත් පෙර කී ටියුෂන් ගුරුවරයා වැඩේ අනා ගත්තේය. ඔහු ගුරාගේ උපදෙස ඇසුවේ නැත. ඒ නිසා වැඩේ මාට්ටු වූ බව ගුරා තමන්ගේ හිතවතුන් ගණනාවකටම පවසා ඇත.

මෙම ගුරා ගණිතය ප්‍රශ්න පත්‍රයද මෙසේ රුපියල් ලක්‍ෂ එකහමාරකට විකිණීමට උත්සාහ දරා ඇත. ඉතිහාසයද එසේමය. එහෙත් අදාළ ගුරුවරුන් ප්‍රශ්න පත්‍රය ඉල්ලා ඇත. ගුරා එය ප්‍රතික්‍ෂේප කර ඇත. තමන් ළඟ ඇති ප්‍රශ්න පත්‍රය ලියා ගන්නා ලෙස ඔහු දුන් උපදෙසට එම ගුරුවරුන් එකඟ නොවීම නිසා ගනුදෙනුව සිදු වී නැත.
දැනට අපරාධ පරීක්‍ෂණ දෙපාර්තමේන්තුව මඟින් ප්‍රශ්න කර ඇති ටියුෂන් ගුරුවරයා මිනුවන්ගොඩ එක්තරා පෞද්ගලික පන්ති පවත්වන ආයතනයකදී පවසා ඇත්තේ තමන්ගේ අනුමාන ප්‍රශ්නවලින් විස්සකට ආසන්න සංඛ්‍යාවක් විභාග ප්‍රශ්න පත්‍රයේ නොතිබුණහොත් තමන් මිනුවන්ගොඩ නගරයේ බඩ ගාන බවයි. නිට්ටඹුවේදීද ඔහු මේ කතාව කියා තිබේ.

අදාළ ටියුෂන් ගුරුවරයා බේරා ගැනීමට අපට අවශ්‍යතාවක් නැත. එසේම ඔහුව පමණක් හම ගසා මේ ජාවාරමේ ඉතිරි පුරුක්වලට වැඩෙන්නට ඉඩදීමද කළ නොහැක්කකි. මුලින් කී විද්‍යාගාර සහායකයාට දේශපාලන සම්බන්ධකම් මෙන්ම අදාළ විශ්වවිද්‍යාලයේ පාලනාධිකාරියේ සමීප සම්බන්ධකම්ද ඇත. ඔහුට එරෙහිව විනය චෝදනා එල්ල වූ අවස්ථා දෙකකදීම පාලනාධිකාරියෙන් ඔහු ගලවාගෙන ඇත. එම චෝදනා එල්ල වූ වැරැදි ඔහුව සේවයෙන් පහ කරන්නට වුවද ප්‍රමාණවත් බව කියැවේ.


අපරාධ පරීක්ෂණ දෙපාර්තමේන්තු නිලධාරීන් අදාළ ටියුෂන් ගුරුවරයා රැගෙන ඔහු තමන්ගේ අනුමාන ප්‍රශ්න පත්‍රය මුද්‍රණය කළ මුද්‍රණාලයට ගොස් එහි සිටිය වුන්ගෙන් ප්‍රශ්න කළ බව 'දිනපතා මව්බිම' වාර්තා කළේය. මාධ්‍ය සංදර්ශන තිබ්බාට වැඩක් නැත. අදාළ විද්‍යාගාර සහායකයා සහ මෙම ප්‍රශ්නපත්‍ර ජාවාරමේ සිටින්න වුන් ප්‍රශ්නපත්‍රය ඔවුන්ගේ අතින් පිට නොකිරීමට වග බලා ගනී. එම නිසා මුද්‍රණාලයේ ඇත්තේ අදාළ ටියුෂන් ගුරුවරයාගේ අත් අකුරුය.

මුලින් පැවැසූ පරිදි මෙම ලිපිය පළ වූ පසු අපරාධ පරීක්‍ෂණ දෙපාර්තමේන්තු නිලධාරීන් අප සොයා ඒමට හදිසි නොවන්න. කිරිබත්ගොඩ, කැලණිය, ගම්පහ ආදී ප්‍රදේශවල රස්තියාදුවක් ගැසුවහොත් මෙහි සඳහන් නොකළ අප සොයාගත් විස්තරද ඔබට දැන ගැනීමට හැකියාව ලැබේ. අදාළ විශ්වවිද්‍යාලයීය විද්‍යාගාර සහායකයා පවසන්නේ තමන් මීට පෙර ජාතික මට්ටමේ විභාග හයකදී මෙම සෙල්ලම දැමූ බවයි. ඒවා 'ඉන්ඩිවිජුවල් ක්ලාස්'වලදී සිසුන්ට ලබාදුන් බවයි. මේ පිළිබඳ විස්තර අදාළ රස්තියාදුව අතරතුරදී පාසල් සිසුන්ගෙන් ලබා ගැනීමට හැකිය.

ගම්පහ ප්‍රදේශයේ ජනප්‍රිය පාසල් දෙකක සිසු සිසුවියන් අපට පැවැසුවේ මෙම විද්‍යාව ප්‍රශ්න පත්‍රය, අනිවාර්යයෙන්ම විභාගයට එන බව පවසමින් ප්‍රකට ව්‍යාපාරිකයකුගේ පුත්‍රයකු තමන්ට ලබා දුන් බවයි. විභාගයෙන් පසු බලන විට ඒ, විභාග ප්‍රශ්න පත්‍රයමය. බහුවරණ ප්‍රශ්නවල නිවැරැදි පිළිතුර හැර, වැරැදි පිළිතුරු පවා ප්‍රශ්න පත්‍රයේ ඒවාමය. විශේෂත්වය වන්නේ අදාළ ප්‍රකට ව්‍යාපාරිකයාගේ පුත්‍රයා ප්‍රශ්නපත්‍ර පිට කිරීමේ සිද්ධියට අපරාධ පරීක්‍ෂණ දෙපාර්තමේන්තු නිලධාරීන් ප්‍රශ්න කළ ටියුෂන් ගුරුවරයාගේ පන්තියක් අහලකින්වත් ගොස් නොතිබීමයි.

ලංකාවේ ජාතික විභාගවල විශ්වාසය අද වන විට මේ ජාවාරම්කරුවන්ගේ අතට වැටී තිබේ. ගැටලුව වන්නේ ඒ බව පිළිගැනීමට විභාග කොමසාරිස්වරයා හෝ අධ්‍යාපන ඇමැතිවරයා හෝ අදාළ බලධාරීන් මැළි වීමයි. පහේ ශිෂ්‍යත්වයේ ප්‍රශ්නපත්‍ර පිට වීමට අදාළව කිසිදු වැරැදිකරුවකු අත්අඩංගුවට ගෙන නැත. හූනා කිව්වා සේ කිව හැකිය. මේ සිද්ධියටද වන්නේ ඒ සෙතේමය. උසස් පෙළ ඉසෙඩ් අගය වැරැද්දූවන්ද නිදහසේ සිටී. ඉතින්, ප්‍රශ්නපත්‍ර පිට කිරීමත් හොඳ ආදායම් මාර්ගයකි.
සිතන්නට නොදන්නා යාන්ත්‍රික අනාගත පරපුරක් බිහි කර ගැනීමේ රට කරවන ඇත්තන්ගේ අරමුණට මේ ජාවාරම්කරුවන් සපයන්නේ මිල කළ නොහැකි සේවයකි. මේ සිදුවීම්වලට අදාළ පරීක්‍ෂණ යට ගසන්නේ ඒ සේවයට උපහාර පිදීමට දැයි යන ගැටලුව මතු වේ. දැන් සිලබස් අවශ්‍ය නැත. විභාග ලිවීමට අවශ්‍ය වන්නේ මුදල් පමණි. ඒ කන්නන්ගර මැතිඳුන් මරා දමන හැටිය.

mawbima

Friday, December 21, 2012

සුසර ප්‍රභාශි - සිත් කතරට පිනි දිය ඉසින මියුරු ගී වැස්ස

ශ්‍රී ලංකා රජරට විශ්වවිද්‍යාලයීය මහා ශිෂ්‍ය සංගමය හා කලා අනුකමිටුව එක්ව සංවිධානය කළ “සුසර ප්‍රභාශි - සිත් කතරට පිනි දිය ඉසින මියුරු ගී වැස්ස” සංගීතමය වැඩසටහන දෙසැම්බර් මස 14 වන දින රජරට විශ්වවිද්‍යාලයීය සුගතපාල ද සිල්වා එළිමහන් රංග පීඨයේදී පැවැත්වින.

රජරට සරසවි මානව මානවිකාවන්ගේ ගී පද රචනා, තනු නිර්මාණ, ගායන, වාදන ඈසි විවිධ නිර්මාණ කාර්යයෙන් අංකුර නිර්මාණකරුවන්ට වේදිකාවක් නිර්මාණය කිරීම මෙහි ප්‍රධාන අරමුණ විය. ඒ අනුව මෙහිදී නව ගීත නිර්මාණ 16 ක් එළි දැක්වීම සිදු කෙරින.

මෙම සියලු නිර්මාණ වල පද රචනා, තනු නිර්මාණය සහ ගායනය සිදු කරනු ලැබුවේ රජරට විශ්වවිද්‍යාලයේ ඉගෙනුම ලබන සිසු සිසුවියන් විසිනි. මෙම වැඩසටහනට සමගාමීව රජරට විශ්වවිද්‍යාලයේ සමාජීය විද්‍යා හා මානව ශාස්ත්‍ර පීඨයේ අවසන් වසරේ ඉගෙනුම ලබන නාලක සම්පත් බණ්ඩාර දිසානායක බණ්ඩාර සහ සිදත් මධීර රන්දෙනි හේරත් සහෝදරයින් දෙදෙනා නිර්මාණය කළ “ ඉරමල ” කාව්‍ය සංග්‍රහය එලි දැක්වීමද සිදු කෙරින.

හිත් පිත් නැති රොබෝ මානසිකත්වයන් උදෙසා සමාජය මෙහෙයවාලන්නට කැස කවන ඊනියා බලවේග හමුවේ නොසැලී උඩුගං බලා මානව හිතවාදී කලාවක් උදෙසා සුසර ප්‍රභාශි සිය ප්‍රභාව සමාජ ගත කරනු ඇත.



අ.පො.ස සපෙළ විභාගයට විද්‍යාව, ගණිත ප්‍රශ්න පත්‍ර රුපියල් අටදහස බැගින් විකුණයි

සාමාන්‍ය පෙළ විභාගයේ විද්‍යාව 1 සහ ගණිතය 1 ප්‍රශ්න පත්‍රවලට සමාන ප්‍රශ්නපත්‍ර විභාගයට පෙර රුපියල් අටදහසක්‌ බැගින් අයකර වේයන්ගොඩ ප්‍රදේශයේ අලෙවි කර තිබේ.

විද්‍යාව ප්‍රශ්න පත්‍රය වෙනමත් ගණිතය ප්‍රශ්න පත්‍රය වෙනමත් මෙලෙස අලෙවි කර ඇත.

පසුගිය 16 වැනිදා විද්‍යාව ප්‍රශ්න පත්‍රයට අදාළ විභාගයට පෙර විද්‍යාව ප්‍රශ්න පත්‍රය ද එදිනම සවස 17 වැනිදාට නියමිතව තිබූ ගණිතය ප්‍රශ්න පත්‍රයද අලෙවි කර ඇත්තේ ගෙන් ගෙට යමිනි. ගණිතය ප්‍රශ්න පත්‍රය අලෙවි කිරීමට පැමිණි පුද්ගලයන් අත සාමාන්‍ය පෙළ ප්‍රශ්න පත්‍රය හා විද්‍යාව අනුමාන ප්‍රශ්න පත්‍රයද තිබී ඇති අතර එම ප්‍රශ්නපත්‍ර සන්සන්දනය කර සත්‍යය වටහාගෙන ගණිතය ප්‍රශ්න පත්‍රය මිලට ගන්නා ලෙස නිවසේ හිමියන්ට දන්වා ඇත. නැවත විද්‍යාව ප්‍රශ්න පත්‍රය හා අනුමාන ප්‍රශ්න පත්‍රය අතර සමානතා දුටු බොහෝ පිරිස්‌ ගණිතය අනුමාන ප්‍රශ්න පත්‍රය ද මිලට ගැනීමට පෙළඹී තිබේ.

විද්‍යාව අනුමාන ප්‍රශ්න පත්‍රය ප්‍රදේශයේ ටියුෂන් ගුරුවරයෙක්‌ (සිද්ධියට සම්බන්ධ යෑයි සැකකරන ගුරුවරයා නොවේ) මිලට ගෙන සිසුන් අතර බෙදා හැර ඇතැයිද විශ්වාස කටයුතු ආරංචි මාර්ග අනාවරණය කළේය.

විද්‍යාව 1 ප්‍රශ්න පත්‍රයේ ප්‍රශ්න 19 ක්‌ ටියුෂන් ගුරුවරයකු විසින් සකසන ලද අනුමාන ප්‍රශ්න පත්‍රයකට ඇතුළත් වීම පිළිබඳව අපරාධ පරීක්‍ෂණ දෙපාර්තමේන්තුව මේ වන විට පරීක්‍ෂණ ආරම්භ කර ඇත.


නිලන්ත මදුරාවල

සිංහල ජනතාව සමග සංහිඳියාවෙන් කටයුතු කරනවා. රවුෆ් හකීම් ඇමැතිවරයා ජාතිවාදී අඳුරු තත්ත්වයකට රට රැගෙන යනවා.-රම්සි බාඩා

රවුෆ් හකීම් මහතා අධිකරණ ඇමැතිවරයා වශයෙන් පත්වූ පසු 2011 හා 2012 නීති විද්‍යාල ප්‍රවේශ විභාගයෙන් සමත් වන මුස්‌ලිම් ශිෂ්‍ය සංඛ්‍යාවේ අසාමාන්‍ය වැඩිවීමක්‌ සිදුවී ඇතැයි ජාතික විද්වත් සභාවේ සාමාජික නීතිඥ යලිත් විමලසුරේන්ද්‍ර මහතා පැවැසීය.

කොළඹ ජාතික පුස්‌තකාල හා ප්‍රලේඛන සම්මන්ත්‍රණ ශාලාවේදී ජාතික විද්වත් සභාව පෙරේදා (19 වැනිදා) පැවැත්වූ මාධ්‍ය හමුවකදී ඒ මහතා මේ බැව් කියා සිsටියේය.

ඒ මහතා මෙසේද ප්‍රකාශ කළේය.

නීතියේ න්‍යායන් අතර තිබෙනව කොතැන හෝ අයුක්‌තියක්‌ තිබේ නම් සමස්‌ථයම අයුක්‌තියට ලක්‌වන බව. අප දක්‌වන්නේ මුස්‌ලිම් විරෝධයක්‌ නොවේ. විභාගයෙන් සමත් වූ සියලු දෙනා සිංහල වුණා නම් එයත් වැරදියි.

නීති විද්‍යාල ප්‍රවේශ විභාගය හුදෙක්‌ සරල දෙයක්‌ නොවේ. ඉතාම තරගකාරීයි. වසරකට විසිදහසක්‌ (20000) පමණ ඉල්ලුම් කරන හත්දාහක (7000) ට ආසන්න සංඛ්‍යාවකට සාමාන්‍යයෙන් විභාගයට පෙනී සිටීමට ලැබෙනා දෙසිය විසිහපක්‌ (225) පමණ උපාධිය හැදැරීමට බඳවා ගන්නා ඉතාම තරගකාරී තත්ත්වයක්‌.

නීතිඥ වෘත්තීය උසස්‌ රැකියාවක්‌ ලෙස සැලකෙනවා. විශාල ආදායමක්‌ ඔවුන්ට උපයන්න පුළුවන්. මේ අනුව එම නීතිඥ සාමාජිකයා නියෝජනය කරන පවුල් සමාජයේ ඉහළට පැමිණෙනවා. තම නිලය, බලය හා ධනය යොදවලා පටු ජාතිවාදී වැඩපිළිවෙළක්‌ නීති ප්‍රවේශ විභාගයට යොදනව නම් ඉතා බරපතල තත්ත්වයක්‌. යුක්‌තියේ ක්‍රියාවලිය කඩා වැටෙනවා. නුසුදුස්‌සන් පත්වෙනවා.

ඇතැම් අය රැකියාවලින් ඉවත් වී මේ විභාගයට පෙනී සිටින්නේ. මොනරාගල හා ත්‍රිකුණාමලය වැනි ඈත පළාත්වලින් කොළඹට පැමිණ අධ්‍යාපන කටයුතුකර මෙම විභාගයට ඇතැම් අය මුහුණ දෙන්නෙ.

2004 වර්ෂයේදී අංක 491 දරන ප්‍රකාශයෙන් ශේ්‍රෂ්ඨාධිකරණයේදී අගවිනිසුරුවරිය දන්වා තිබෙනවා. යුක්‌ති සහගතව හා නිරවුල්ව නීති ප්‍රවේශ විභාගය පවත්වන ලෙස යනුවෙන් විමලසුරේන්ද්‍ර මහතා තවදුරටත් ප්‍රකාශ කළේය.

ජාතික විද්වත් සභාවේ සභික නීතිඥ ප්‍රියදර්ශන ගමගේ මහතා අදහස්‌ පළ කරමින් මෙසේ කියා සිටියේය.

2011 නීති ප්‍රවේශ විභාග ප්‍රතිඵල අස්‌වාභාවිකයි. විභාග අංකය අපහැදිලි වන ආකාරයට සංකේත අංකයක්‌ එකතුකර තිබෙනවා. අප සංකේත අංක ඉවත්කර ගවේෂනය කළා. එක ළඟ විභාග අංක තියෙන මුස්‌ලිම් ළමයි විසි දෙනෙක්‌ සමත්වී තිබෙනවා. සහෝදරයෝ දෙදෙනෙක්‌ නීති විභාග ප්‍රවේශ විභාගයෙන් සමත් වුණොත් නීති විද්‍යාලය ඒ පිළිබඳ විශේෂ සමීක්‍ෂණයක්‌ කරන්නේ යෑයි ඒ මහතා අවසන් වශයෙන් ප්‍රකාශ කළේය.

නීති ප්‍රවේශ විභාගය සඳහා සිංහල මාධ්‍යයෙන් ඉදිරිපත් වූ ශිෂ්‍යයකු වූ රම්සි බාඩා මහතා අදහස්‌ දක්‌වමින් මෙසේ කියා සිටියේය.

අප සිංහල ජනතාව සමග සංහිඳියාවෙන් කටයුතු කරනවා. රවුෆ් හකීම් ඇමැතිවරයා ජාතිවාදී අඳුරු තත්ත්වයකට රට රැගෙන යනවා. අක්‍රමිකතා සිදුකොට නීතිඥයන් වන ඇතැම් අය විනිසුරුවරුන් ලෙස පත්වේවි. ඔවුන් කොහොම යුක්‌තිය ඉටුකරයිද?

අප මේ අක්‍රමිකතාවයට විරෝධය දක්‌වමින් පෙත්සමක්‌ සකස්‌ කොට මේ සඳහා විරෝධය දක්‌වන අයගේ අත්සන් ලබාගෙන රජයට ඉදිරිපත් කරනවා. උද්ඝෝෂණ ව්‍යාපාරයක්‌ ගෙන යාමටත් සැලසුම්කර තිබෙනවා. දැඩි ක්‍රියාමාර්ග ගන්නවා. සංවිධානයක්‌ පිහිටුවා මෙම අක්‍රමිකතාවයට එරෙහිව අඛණ්‌ඩව කටයුතු කරනවා.

නැවත විභාගය පවත්වන ලෙස අප ඉල්ලා සිටිනවා. රහස්‌ පොලිස්‌ පරීක්‍ෂණයක්‌ සිදුකළ යුතුයි. ප්‍රශ්නපත්‍ර කලින් පිටවීමක්‌ සිදුවූයේද යන්න හා උත්තර පත්‍ර සඳහා ලකුණු දීමේදී මේ අක්‍රමිකතාවය සිදුවුණාදැයි සොයා බැලිය යුතුයි.

ඒ මහතා විසින් 2011 හා 2012 වසරවලට අදාළ නීති ප්‍රවේශ විභාගයේ දත්ත වාර්තාවක්‌ද ඉදිරිපත් කරන ලදී. නීතිඥ සමුදු හේවගේ මහතාද මෙහිදී අදහස්‌ දැක්‌වීය.


තෝරාගත් වසර  තෝරාගත් මුස්‌ලිම් සිසුන්
සම්පූර්ණ ගණන ගණන

2003       208       05

2004        212       03

2005        269       07

2006         249       09

2007         247       04

2008       261          08

2009       242         14

2010       237         09

2011        238       51

2012        309       78

2012 වසරේ ප්‍රථම ස්‌ථාන 3 ම මුස්‌ලිම් ලබ්ධිකයන් වන අතර පළමු 10 දෙනාගෙන් 6 දෙනෙකුම මුස්‌ලිම් ලබ්ධිකයන්ය. පළමු ස්‌ථාන 50 න් 28 ක්‌ මුස්‌ලිම් ලබ්ධිකයන්ය.

නීතිඥ යලිත් විමලසුරේන්ද්‍ර
චනක්‍ය ජයගොඩ

Wednesday, December 19, 2012

බිහිරන්ට ඇසීමට වඩාත් වැඩි ශබ්දයක් අවශ්‍යයි - වෛද්‍ය පීඨ ශිෂ්‍ය කි‍්‍රයාකාරී කමිටුවේ කැඳවුම්කරු නජිත් ඉන්දික සහෝදරයා

Najith Indika - MFSAC
ආණ්ඩුවේ වාර්තාවන්ට අනුවම මේ රටේ ජනතාවගෙන් 41%කගේ දවසක ආදායම රුපියල් 200 ට අඩුයි. එහෙම මිනිස්සු ඉන්න රටක තමයි ඔවුන් රුපියල් ලක්ෂ 65කට උපාධි ගන්න අධ්‍යාපන ක‍්‍රමයක් ස්ථාපිත කරන්න යන්නේ. මේක සරල ජනවහරකින් කිව්වොත් රටේ මිනිස්සුන්ට කුඩු කන්න පිච්චිය නැතිව ඉද්දි අණ්ඩුව බල්ලන්ට හැට්ට මහනවා මේක අපේ ප‍්‍රශ්නයක් නෙමෙයි. සමාජ ප‍්‍රශ්නයක්’’ යි වෛද්‍ය පීඨ ශිෂ්‍ය කි‍්‍රයාකාරී කමිටුවේ කැඳවුම්කරු නජිත් ඉන්දික සහෝදරයා ඊයේ මරදාන CSR ශාලාවේදී පැවති මාධ්‍ය හමුවේදී පැවසීය.

වැඩිදුරටත් අදහස් දැක්වූ ඔහු ,

‘‘මාලඹේ පෞද්ගලික වෛද්‍ය විද්‍යාලය ආරම්භ කළේ 2009 සැප්තැම්බර් පළමුවැනිදා. මේ වෙනකොට අවුරුදු 03ක් ඉක්මවලා. ආරම්භයේ සිටම සියලූ ආයතන, ජනතාව නොමග යැවූ මෙම වංචාකාරී ව්‍යපෘතියේ (SAITM) මුල් නම වුණේSouth Asian Institute of technology & management. පස්සේ හොර රහසේම ඒකSouth Asian Institute of technology & madicine බවට පත් වුණා. මෙහෙම පැවතුන මේ ආයතනයට පූර්ණ රාජ්‍ය අනුග‍්‍රහය ලැබුණේ 2010 රාජපක්ෂ ජනාධිපතිවරයාගේ දෙවන පත්වීමෙන් පස්සෙ. උසස් අධ්‍යාපන ඇමතිවරයා විදියට පත් වුණු එස්.බී. දිසානායක මහත්තයගෙ එකම වැඬේ වුණේ අධ්‍යාපන පෞද්ගලීකකරණය සුද්ද කරන එක. රජයේ විශ්වවිද්‍යාල කඩා වැටෙන්න ඉඩදීල ඔවුන් තම අධ්‍යාපන ප‍්‍රතිපත්තිය විදියට ‘‘අධ්‍යාපන පෞද්ගලීකකරණය’’ පිළිගන්න බව ප‍්‍රකාශ කළා. ප‍්‍රකාශ කළා විතරක් නෙමෙයි ඒ ඔස්සේ වැඩ කළා. රජරට වෛද්‍ය පීඨයේ අනාගතය අවිනිශ්චිතව තියෙද්දි අවශ්‍ය ප‍්‍රතිපාදන නොමැති කමින් මාලඹේ උපාධි කඩයට විශේෂ ගැසට් පත‍්‍රයක් මගින් රුපියල් මිලියන 600ක ණයක් ලබාදුන්නා රාජ්‍ය බැංකුවකින්. රජයේ මාධ්‍ය යෙදාගනිමින් විශාල ප‍්‍රමාණයක් ලබාදුන්නා.

එහෙම කරපු මාලඹේ උපාධි කඩයේ අද තත්වය මොකද්ද? සායනික පුහුණුවක් ලබාදීමට ක‍්‍රමවේදයක් නෑ. නමුත් වසරකට කණ්ඩායම් 02ක් බඳවා ගන්නවා. ආවේ එක් ශිෂ්‍යයෙක්ගෙන් ලක්ෂ 65ක්නෙ. ඕන දෙයක් විකුණනකොට වගේම අධ්‍යාපනය විකිණීමෙදිත් ලාභ සෙවීම තමයි ප‍්‍රමුඛ අරමුණ වෙන්නෙ. උසස්පෙළ අසමත් සිසුන් දෙදෙනෙක්ගෙ තොරතුරු හෙළිදරව් කළා. තවත් ඕනෑතරම් ඇති. ඇයි මේකෙදි වැදගත් වෙන්නෙ රුපියල් ලක්ෂ 65 ගෙවීම මිස විභාග සමත් වීම හෝ දක්ෂකම, උනන්දුව නෙවෙයි. මේ ‘‘මාලඹේ’’ මොඩල් එක තමයි ආණ්ඩුව තමන්ගේ ප‍්‍රතිපත්තිය වශයෙන් තෝරාගෙන තියෙන්නෙ. මෙකෙදි රටේ 98%ක් වෙච්ච දරුවන් අධ්‍යාපනයෙන් පිටමං කරන අතරේ 1%ක් 2%ක් වෙච්ච අතලොස්සක් වෙනුවෙන් විශ්වවිද්‍යාල හදන ප‍්‍රතිපත්තියක්.

ඒ නිසයි අපි විරුද්ධ. අධ්‍යාපනය වෙළඳ භාණ්ඩයක් කිරීමට අපි විරුද්ධයි. මේ අඩුපාඩුකම් මැද්දෙ හරි කි‍්‍රයාත්මක වන මේ නිදහස් අධ්‍යාපන ක‍්‍රමවේදය විනාශ කරනවට අපි විරුද්ධයි. ඒ මේ රටේ අතිමහත් බහුතරයක් දරුවන්ට අධ්‍යාපනය ලැබීමට ඇති අයිතිය වෙනුවෙන් අපි පෙනී සිටින නිසා. නමුත් ආණ්ඩුව තමන්ගේ ප‍්‍රතිපත්තිය කි‍්‍රයාත්මක කරන්න උත්සාහ කරනවා. හොඳම උදාහරණය අධ්‍යාපනයට ද.දේ.නි. 6%ක් ඉල්ලා විශ්වවිද්‍යාල ආචාර්යවරුන් සිදුකෙරුනු අරගලයෙන් පස්සෙ අයවැයේදි 1.8% සිට 1.5% දක්වා තවත් පහත හෙලීම. රටේ දින 5කට වරක් පාසලක් වැහෙනවා. විශ්වවිද්‍යාල බලන් ඉද්දි කඩාවැටෙනවා. ආචාර්යවරුන් පෞද්ගලික උපාධි කඩ කරා ඇදී යනවා වැඩි වැටුප් සොයාගෙන. මෙහෙම නිදහස් අධ්‍යාපන ක‍්‍රමය වට්ටවමින් තමයි ඔවුන් ‘‘මාලඹේ මොඩල් එක’‘ මේ සමාජෙට ආදේශ කරන්න යන්නෙ. මාලඹේ පෞද්ගලික වෛද්‍ය විද්‍යාලය තමයි මේ ව්‍යාපෘතියේ ‘‘නියමු ව්‍යාපෘතිය’’ මාලඹේ කරේ තියාගෙන පෙන්න පෙන්න තමයි ඔවුන් මේ ගමන යන්න හදන්නේ. ඒ නිසා මාලඹේ උපාධි කඩය පරාජය කළ යුතුයි. ඒ ආණ්ඩුවේ මේ ජනතා ද්‍රෝහී ගමන අනෙක් පැත්තට හරවන පළමු පියවර ඒක නිසා. ඒ පදනමිනුයි අපි ඊට විරුද්ධව අරගල කරන්නේ. දැන් කොතලාවල ආරක්ෂක විශ්වවිද්‍යාලයෙත් වෛද්‍ය උපාධිය මුදලට විකිණීමට සූදානම් වෙනවා. අපි මේ තත්වයට විරුද්ධව අරගල කරනවා.

මාලඹේ උපාධි කඩය තරම්ම පැරණිය ඊට එරෙහිව කළ අපේ අරගලය. අපි වෛද්‍ය පීඨ ශිෂ්‍ය කි‍්‍රයාකාරී කමිටුව විදියට විවිධ කි‍්‍රයාමාර්ග ගත්තා. උද්ඝෝෂණ, දැනුවත් කිරීම්, පාගමන් ආදී විශාල අරගලයක් ගෙනගියා. ඒ හරහා අපිට පුළුවන් වුණා රටේ විශාල මතවාදයක් මීට එරෙහිව නිර්මාණ්‍ය කරන්න. නමුත් තවමත් මාලඹේ උපාධි කඩය පවතිනවා.කියමනක් තියෙනවා ‘‘බිහිරන්ට ඇසීමට වඩාත් වැඩි ශබ්දයක් අවශ්‍ය’’ වේ. කියලා. අපි සූදානම් ආණ්ඩුවේ බිහිරන්ට ඇසෙන මට්ටමේ විශාල ශබ්දයක් නගන්න.

මේක සමාජ ප‍්‍රශ්නයක්. මුළු සමාජයම එකතුවෙලා මේ අධ්‍යාපන සංහාරයට, ආණ්ඩුවේ මේ අධ්‍යාපන ප‍්‍රතිපත්තියට විරුද්ධව සටන් කළ යුතුයි. ඉදිරි මාස 6 තුළ අපි දැවැන්ත අරගලයක් අරඹනවා. අනෙකුත් සහෝදර විශ්වවිද්‍යාල සිසුන්, වෛද්‍යවරුන්, දෙමාපියන්, වෘත්තීය සමිති හා ආචාර්යවරු ආදි බලවේග එකතු කරගත් දැවැන්ත අරගලයක් ඉදිරි වසරේ ආරම්භ කරනවා. ඒ කැපකිරීමට අපි සූදානම්. ආණ්ඩුවට චන්ද්‍රිකා, උල්කාපාත පෙන්නලා මේ ප‍්‍රශ්නෙ යටගහන්න දෙන්නෙ නෑ වගේම ඔවුන්ට උපාධි විකිණීම ගැන තීරණයක් ගන්න වෙන් මට්ටමට අපගේ අරගලය ඉදිරි කාලයේ ගෙන එනවා.’’

මාධ්‍ය ඒකකය
වෛද්‍ය පීඨ ශිෂ්‍ය කි‍්‍රයාකාරී කමිටුව

Monday, December 17, 2012

සාපෙළ ප‍්‍රශ්න පත‍්‍ර කලින් පිටවීම අධ්‍යාපනයේ සමස්ත අර්බුදයේම ප‍්‍රකාශනයක්

Duminda Nagamuwa - FLSF
සාමාන්‍ය පෙළ විභාග ප්‍රශ්න පත්‍ර කලින් පිටවීම අධ්‍යාපන ක්ෂේත්‍රයේ සමස්ත අර්බුදයේම ප්‍රකාශනයක් බවත් ආණ්ඩුවට බලය සම්බන්ධ කරුණුවලදී වරදින්නේ නැති නමුත් ජනතාවගේ ජීවිත සම්බන්ධ ගැටලුවලදී නිතරම වැරදීම් සිදු වන බවත් පෙරටුගාමී සමාජවාදී පක්ෂයේ දේශපාලන මණ්ඩල සභික දුමින්ද නාගමුව මහතා පවසයි.

සාමාන්‍ය පෙළ විද්‍යාව ප්‍රශ්න පත්‍රය කලින් පිටවීම පිළිබඳව නිවේදනයක් නිකුත් කරමින් ඔහු පෙන්වා දෙන්නේ අධ්‍යාපනය හා අධ්‍යාපන සඳහාත් අධ්‍යාපනය මුදලට විකිණීම සඳහාත් නිර්මාණය වී ඇති තරගය නිසා මෙවැනි තත්වයක් ඇති වන බවයි.

දුමින්ද නාගමුව මහතා නිකුත් කළ නිවේදනය‍ මෙසේය.

"දෙසැම්බර් 15වැනිදා පැවැත් වුණු අධ්‍යයන පොදු සහතික පත‍්‍ර සාමාන්‍ය පෙළ විභාගයේ විද්‍යාව ප‍්‍රශ්න පත‍්‍රය පිටවී ඇති බවට තොරතුරු වාර්තා වෙමින් තිබේ. ඒ අනුව විද්‍යාව බහුවරණ ප‍්‍රශ්න පත‍්‍රයේ ප‍්‍රශ්න 19ක් පෞද්ගලික උපකාරක පන්ති පවත්වන ගුරුවරයකු විසින් විභාගයට පෙර ආදර්ශ ප‍්‍රශ්න පත‍්‍රයක් හරහා සිසුන්ට ලබා දී ඇතැයි වාර්තා වී තිබේ. ඒ අනුව, විභාගයට පෙනී සිටි ඇතැම් සිසුන්ට විභාගයේ ප‍්‍රශ්න කලින් ලැබී තිබූ බවද අති බහුතරයක් සිසුන් ඒ හේතුවෙන් අසමානතාවට හා අසාධාරණයට ලක්ව ඇති බවද පැහැදිලිය.

අධ්‍යාපනයට හා විභාග ක‍්‍රියාවලියට අදාළව මෙවැනි සිදුවීම් වාර්තා වූ පළමු අවස්ථාව මෙය නොවේ. මීට පෙරද ගුරු අත්පොත්වල වැරදි, පෙළපොත්වල වැරදි, විෂය නිර්දේශ සකස් කිරීමේ ව්‍යාකූලතා ආදිය වාර්තා වූ අතර ජයේ විභාග පැවැත්වීමේදී විභාග ප‍්‍රශ්නපත‍්‍රවල හා විභාග ප‍්‍රතිඵලවල ගැටලුකාරී තත්වයන් නිරන්තරයෙන් උද්ගත විය. නිදසුනක් ලෙස 2012අගෝස්තු මස පැවැත් වූ උසස් පෙළ විභාගයේ ප‍්‍රශ්න පත‍්‍රවල බරපතළ දෝෂ පැවති අතර 2011උසස් පෙළ විභාගයේ ප‍්‍රතිඵල සම්බන්ධයෙන් ඇති වූ ව්‍යාකූලතා නිසා සිසුහු පීඩාවට පත් වූහ. 2012අගෝස්තු මස පැවති පහ ශ්‍රේණියේ ශිෂ්‍යත්ව විභාගයේ ප‍්‍රශ්න පත‍්‍ර පිට වූ බව වාර්තා වූ නමුත් ආණ්ඩුව විධිමත් පරීක්ෂණයක් නොපවත්වාම එය ප‍්‍රතික්ෂේප කළේය. දැන් මෙවර සාමාන්‍ය පෙළ විභාගයට අදාළවද ප‍්‍රශ්න පත‍්‍ර පිටවීම පිළිබඳ චෝදනා එල්ල වී තිබේ. මේ තත්වය තුළ පාසල් අධ්‍යාපනයත් විභාග ක‍්‍රියාවලියත් පිළිබඳ විශ්වාසය බරපතළ ලෙස බිඳ වැටී තිබෙන අතර සිසුන්ගේ අධ්‍යාපන කටයුතුවලට එය සැලකිය යුතු බාධාවක් සිදු කර ඇත.

ලංකාවේ පාලකයින්ට අසමත්වීම්, අකාර්යක්ෂමතා සහ අත්වැරදීම් බහුලවම සිදු වන ක්ෂේත‍්‍ර ලෙස අධ්‍යාපනය, සෞඛ්‍ය සේවය වැනි ජනතාවගේ ජීවිතවලට බලපාන ක්ෂේත‍්‍ර ඉදිරියෙන් තිබේ. තමන්ගේ බලය රැක ගැනීම පිළිබඳ ප‍්‍රශ්නයේදී ඊට අදාළ ක්ෂේත‍්‍රවල පාලකයින්ට වැරදීම් සිදු වන්නේ නැත. ආණ්ඩුවේ පාලන කටයුතුවලට අදාළ ක්ෂේත‍්‍රවලදී හෝ එවැනි අනෙකුත් කටයුතුවලදී වංචා සිදුවීමට ඇති ඉඩකඩ අවම කර ඇති අතර ඒවා වහාම අනාවරණය කර ගැනේ. නිදසුනක් ලෙස අවසර නොමැති ගිනි අවි හෝ ව්‍යාජ මුදල් නෝට්ටු මුද්‍රණය කිරීම වැනි වංචාවන්ට ආණ්ඩුව ඉඩ තබන්නේ නැත. ඒ එය ඔවුන්ගේ බලය සමග සම්බන්ධිත නිසාය. ආණ්ඩුව නිතරම පාහේ අත්වැරදීම් හා මගහැරීම් පිළිබඳ මැසිවිලි නගන්නේ අධ්‍යාපනය, සෞඛ්‍ය සේවය වැනි ජනතාවගේ ජීවිතවලට අදාළ ක්ෂේත‍්‍රයන්හිදීය. මෙම පාලකයින් ප‍්‍රමුඛතාවයේ ලා සලකන්නේ සමාජයේ යහපැවැත්ම නොව සිය බලය රැක ගැනීම පමණක් බව මෙවැනි උදාහරණවලින් තව දුරටත් පැහැදලි වේ.

අනෙකුත් ක්ෂේත‍්‍ර මෙන්ම අධ්‍යාපන ක්ෂේත‍්‍රයද බරපතළ ලෙස දේශපාලනීකරණයට ලක් කර ඇත. විශේෂයෙන් විභාග දෙපාර්තමේන්තුව ගත් කල සුදුස්සන් පසෙක සිටියදී සිය දේශපාලන හිතවතුන් එහි මුල් පුටුවලට පත් කිරීම විසින් ක‍්‍රියාවලිය තවදුරටත් දුර්වල කර ඇත. ලංකාවේ පාලකයින්ගේ මෙම පසුගාමී ස්වභාවයද අධ්‍යාපනයේ බිඳ වැටීමට සැලකිය යුතු දායකත්වයක් ලබා දී ඇත. එපමණක් නොව, පෞද්ගලික උපකාරක පන්ති පවත්වන ගුරුවරුන් විසින් විභාග ප‍්‍රශ්න පත‍්‍ර සොරකම් කිරීම පිළිබඳ සිදුවීම් දෛනිකව වාර්තා වන්නේ අධ්‍යාපනය සඳහාත් අධ්‍යාපනය මුදලට විකිණීම සඳහාත් නිර්මාණය කර ඇති තරගය හේතුවෙනි. වත්මන් නව ලිබරල් ධනවාදී ක‍්‍රමය තුළ අධ්‍යාපනය අධ්‍යාපනික අරමුණුවලින් විතැන් කොට වෙළඳ අරමුණු හා ලාභ අරමුණු වෙත යොමු කොට ඇත. මෙවැනි ප‍්‍රශ්න උද්ගත වන්නේ සිසුන්ට අධ්‍යාපනය ලබා දීමේ අරමුණට වඩා වැඩිපුර ලාභ ලැබීමේ අරමුණු ප‍්‍රමුඛත්වයට පැමිණීම හේතුවෙනි. එබැවින් ලංකාවේ අධ්‍යාපනය සම්බන්ධයෙන් ඇති වී තිබෙන මෙම අර්බුදකාරී තත්වය සමස්ත සමාජ අර්බුදයකම කොටසක් බව අපගේ අදහසයි.

දැනටමත් පාසල් පද්ධතියේ සම්පත් හා ගුරුවරු සම්බන්ධයෙන් පවතින විෂමතාව නිසා අසාධාරණයට ලක්ව සිටින සිසුන් විභාග ප‍්‍රශ්න පත‍්‍ර කලින් පිටවීම නිසා තවදුරටත් අසමානතාවට ලක්වීම වළක්වන ලෙසද විභාග ක‍්‍රියාවලියේ සිදු වන අක‍්‍රමිකතාවන්ට වහා විසඳුම් සොයන ලෙසද ආණ්ඩුවට බල කරන්නැයි සමස්ත ජනතාවගෙන් ඉල්ලා සිටින අපි අධ්‍යාපනය වෙළඳ භාණ්ඩයක් බවට පත් කරන වත්මන් සමාජ ආර්ථික උපාය මාර්ගය වෙනස් කර අධ්‍යාපනය සමාජ දායාදයක් කිරීමේ හා සියල්ලන්ගේම මූලික මිනිස් අයිතියක් බවට පත් කිරීමේ අරගලයකට ප‍්‍රවේශ වන ලෙසද ඉල්ලා සිටිමු. "

විභාග දෙපාර්තමේන්තුව නැමති රන් දෙවොලට හෙන වැදී හමාරයි.


මෙවර අපොස ස/පෙළ විභාගයේ විද්‍යාව බහුවරණ ප‍්‍රශ්ණ පත‍්‍රයේ ප‍්‍රශ්න හතලිහෙන් 19ක් අනුමාණ කර ඇති බවත් මෙය 542,260 ක් වූ විභාග අපේක්‍ෂකයින්ට සිදුවූ බරපතල අසාධාරණයක් බවත් එබැවින් වහා මේ පිළිබඳව පරීක්‍ෂණයක් පවත්වන ලෙසත් ලංකා ගුරු සේවා සංගමයේ ප‍්‍රධාන ලේකම් මහින්ද ජයසිංහ මහතා පවසයි. ඔහු මේ පිළිබඳව ප‍්‍රකාශ කළේ අද (16) නිපොන් හෝටලයේදී පැවති මාධ්‍ය හමුවක් අමතමිනි. ඔහු එහිදී දැක්වූ අදහස් පහත පළවේ.
"ඔබ කව්රුත් දන්නවා මේ වන විට සාමාන්‍ය පෙළ විභාගය පැවැත්වෙන බව. ඊයේ (15) වන විට විෂයන් පහක් අවසන් වී තවත් විෂයන් හතරක් පමනයි පැවැතැවීමට නියමිතව තිබෙන්නෙ. දැනට පවත්වනු ලැබූ සමහර විෂයන් වල තොරතුරු ළමුන් අතට පත්ව ඇතැයි කටකතා අහන්නට ලැබිලා තියෙනවා. නමුත් ඒ කටකතා මත පදනම් වෙලා රටට යමක් කියන්න අපට පුලූවන් කමක් තිබුනෙ නෑ. ඊයෙ දවසෙ අවසන් වුනා,විද්‍යාව පළවෙනි ප‍්‍රශ්න පත‍්‍රය හා දෙවන ප‍්‍රශ්න පත‍්‍රය. එය පැවැත්වුනා ඊයේ උදෑසන 8.30 සිට දහවල් 1.30 දක්වා. එම විභාගය අවසන් වීමත් සමගම රටේ මතු වුනා මහා ආන්දෝලනාත්මක තත්වයක්. එහි තිබුනු සමහර ප‍්‍රශ්න මුද්‍රණයේ වෙනසක්වත් නොමැතිව මීට පෙර බෙදාහැර තිබුනා එක්තරා උපකාරක පන්ති ගුරුවරයකු විසින්. අපි පසුගිය කාලෙ දිගින් දිගටම ජාතික විභාග පද්ධතියෙ තියෙන දුර්වල කම් ගැන අවධාරණය කරා විභාග දෙපාර්තමේන්තුවේ තියෙන අඩුපාඩුකම්. ඒ වගේම විභාග පද්ධතිය පවත්වාගෙන යාමේදී අතිවන ගැටලූ අපි පෙන්වා දුන්නා. මේකෙන් හරි පැහැදිලියි අපි මේ පිළිඹදව කරපු අනාවරණ කිසිවක් අදාළ බලධාරීන්ගෙ පැත්තෙන් අවධානයට ගෙන නැති බව. ඊයෙ ලබාදුන් විද්‍යාව පළවෙනි ප‍්‍රශ්න පත‍්‍රයේ පිළිතුරු සැපයීමට ප‍්‍රශ්න හතලිහක් තිබුනා. එම ප‍්‍රශ්න වලින් විසි දෙවන ප‍්‍රශ්නයේ සිට හතලිස්වන ප‍්‍රශ්නය දක්වා ප‍්‍රශ්න දහනවයක් ඒ විදියටම ඊට කළින්විද්‍යාවේ මහා ගෙදර,වසර ගණනාවක විශේෂඥ දැනුම හා අත්දැකීම් පදනම් කරගෙන පසුගිය වසර වල මෙන්ම මෙවරද මෙම අනුමාන ප‍්‍රශ්න පත‍්‍රය සපයනු ලබන්නේ විද්‍යාවේ මහා ඇදුරු විසින් කියලා. මෙම විද්‍යාවේ මහා ඇදුරු මීට කලින් සපයළා තියෙනවා ප‍්‍රශ්න පනහක්. ඒ ප‍්‍රශ්න වලින් සමහර ප‍්‍රශ්න වලට ඔහු දාල තියෙනවා විශේෂ ලකුණක්ඒ තමයි හිනා මුහුණක්. එය හැම එකටම නෑහැ. ප‍්‍රශ්න පනහෙන් විසි හයකට පමණක් තියෙනවා එම හිනා මුහුන. එම ප‍්‍රශ්න විසිහයෙන් දහනවයක්ම ඊයෙ ලබාදුන් විද්‍යාව පළවෙනි ප‍්‍රශ්න පත‍්‍රයේ තියෙනවා. ඒවායින් පශ්න දෙකක තියෙනවා සුළු වෙනසක්ඒ තමයි විසිදෙවන ප‍්‍රශ්නයේ වරණ දෙකක පමණක් වෙනසක් කර තිබෙනවා. නමුත් ප‍්‍රශ්නයේ කිසිඳු වෙනසක් නෑ. එය එහෙම්පිටින්ම සමාන්‍යයි. විසිතුන්වන ප‍්‍රශ්නයේත් ප‍්‍රශ්නය එහෙම්පිටින්ම සමානයි. එහි තිබෙනවා සෙන්ටිගේ‍්‍රඩ් අංශක තිහ කියලා වරණයක්. ඒ වෙනුවට ඔහුගේ තියෙන වරණය තමයි සෙන්ටිගේ‍්‍රඩ් අංශක තිස්පහ. මේ වෙනස්කම් දෙක හැර කිසිඳු වෙනසක් ඔහු ලබාදුන් අනුමාන ප‍්‍රශ්න පත‍්‍රයේ නැහැ.
අපි අහනවා මේ විදියට අනුමාන කළ හැක්කේ කුමන සත්වයාටද විභාග ප‍්‍රශ්නපත‍්‍රයක් ප‍්‍රශ්න හතලිහයිඑයින් දහනවයක්ම අනුමාන කර තිබෙනවාප‍්‍රශ්න දෙකක සුළු වෙනස්කම් දෙකක් හැරෙන්නට ඉතිරි දාහතම සමාන වී තිබෙනවා. සමහර විද්‍යාත්මක කැරුණු අපි හිතමු අනුමාණ කරා කියලානමුත් මේ විදියට අකුරක්වත් වෙනස්වෙන්නෙ නැතුව අනුමාණ කරන්න පුලූවන් කමක් නෑ අපි විස්වාස කරණ වදියට. මේකෙ ප‍්‍රශ්න දෙකක් තියෙනවා ඒවා මෙහෙමයි. අධිවේගී මාර්ග වනාන්තර ප‍්‍රදේශ හරහා තැනීමෙන් වනජීවීන් සංචරණය කරණ ස්වභාවික මන්පෙත් ඇහිරෙයිමෙය ජෛව විවිධත්වයට බලපෑම් අති කරයි,මෙයට පිළියමක් ලෙස වඩාත් සුදුසු වන්නේප‍්‍රශ්නය ඒකමයි. ඔහු ඊයේ මාධ්‍යට ඔහුගේ පැත්තෙන් ප‍්‍රකාශයක් ඉදිරිපත් කර තිබෙනවාඔහු අභියෝග කර තිබෙනවාමම විද්‍යාවේ මහා ඇදිරි`දුවරයෙක් ඒ නිසා මට මෙවැනි අනුමාණ කිරීම් කළ හැකියි කියා. අපි අහනවා මෙවැනි ප‍්‍රශ්න කොහොමද අනුමාණ කරන්නෙ කියලාමෙවැනි ප‍්‍රශ්න අකුරක්වත් නෑර අනුමාණ කරන්න තරම් කෙතරම් බුද්ධිමතෙක්ද ඔහු එතකොට. අනිත් ප‍්‍රශ්නය හතලිස් වන ප‍්‍රශ්නයබුන්දලආණවිලූන්දාව වැනි ශ‍්‍රී ලංකාවේ කරදිය ආශ‍්‍රිත තෙත් බිම් ලෝක උරුම ලෙස පිළිගෙන ඇති,ආවේණික ජීව විශේෂ පැවතීම මෙන්ම විශාල ලෙස සංචාරක පක්ෂීන් පැමිනීමද මේවායේ විශේෂ ලක්ෂණ වෙයි එවැණි තෙත් බිමකට ජළ යෝජනා ක‍්‍රමයකින් පිටවන මිරිදිය එක්වීමෙන් සිදුවිය හැකි හානිය නිවැරදිව විස්තර කෙරෙන ප‍්‍රකාශය තෝරන්නකියලා ප‍්‍රකාශ හතරක් දී තිබෙනවා. එම ප‍්‍රශ්නය ඒ අයුරින්ම ඔහුගේ අනුමාන ප‍්‍රශ්න පත‍්‍රයේ හතලිස් නව වන ප‍්‍රශ්නය ලෙසට ලබා දී තිබෙනවා. අපි අහනවා මෙහෙම අනුමාණ කරන්න පුලුවන් කාටදමොන ජගතෙකුටදමේ ප‍්‍රශ්න දෙක විශේෂයෙන් අරන් පෙන්නුවේමේ ප‍්‍රශ්න දෙක විද්‍යාවේ සාමාන්‍ය දැනීම මැනීම සඳහා ලබා දී තිබෙන ප‍්‍රශ්න. තවත් ප‍්‍රශ්න තිබෙනවා ඒවා සමහර විද්‍යාත්මක කරුණු. ඒ වගේ ඒවා සමාන වෙන්න පුලුවන් මොකක් හරි කරල උපකල්පනය කරා කියලා හරි හිතමුකොඒ කිසිම ප‍්‍රශ්නෙක රූප සටහන් වල වත් කිසි`දු වෙනසක් නැහැ. මේ වෙනකොට අපොස සා/පෙළ විභාගය සඳහා ලංකාව පුරාම ශිෂ්‍ය ශිෂ්‍යාවො 542,260 ක් පෙනී සිටිනවා.
මෙවැනි සිදුවීම්වලින් බරපතල හානිය වෙන්නෙ ඒ සියළුම දෙනාට. අපි මීට කලින් සිටම අධ්‍යාපන අමාත්‍යාංශයෙ සිදුවෙන බරපතල අකටයුතුකම් ගැන කියා සිටියා. පසුගිය ශිෂ්‍යත්ව විභාගයේදී අපි එම සිදුවීම් හෙළිදරව් කරා. නමුත් අවසානයේ වුනේ මොකක්දලංකා ගුරු සේවා සංගමය මගින් හෙළිදරව් කරපු සිදුවීම් සම්බන්ධයෙන් පරීක්‍ෂණ නොරක මාව දඩු කඳේ ගහන්න උත්සාහ කරා. මේක තමයි ආණ්ඩුව මගින් ඒවට දීපු පිළිතුර. නමුත් දැන් නැවතත් අපි කියපු කාරණා තහවුරු වෙනවා මෙවැනි සිදුවීම් මගින්. ඒ නිසා අපි කියනවා මේ සිදුවීම් ගැන විභාග දෙපාර්තමේන්තුවත්අධ්‍යාපන අමාත්‍යාංශයත් සාධාරණ පරීක්‍ෂණයක් කළ යුතුයි. එහෙම සාධාරණ පරීක්‍ෂණයක් කරල රටට ඇත්ත කරුණු හෙළිදරව් කළ යුතුයි. එහෙම නැතුව නිකම්ම නිකම් වාර්තා ඉදිරිපත් කරලා මෙවැනි බරපතල සිද්ධීන් වලට විසඳුම් සොයන්න බැහැ.
542,260 කට වෙලා තියෙන බරපතල අසාධාරණයට අධ්‍යාපන අමාත්‍යාංශය විසඳුම් ලබා දිය යුතුයි. එහෙම නැතිව පසුගිය කාලෙ මේ වගේ සිදුවීම්වලදි අධ්‍යාපන ඇමතිවරයා ඒව යට ගහන්න කියපු කථා කියලා මේක යටගහන්න සූදානම් වෙන්න එපා."
                                  තවත් චායාරූප මෙතනින්

Saturday, December 8, 2012

කොතලාවල ආරක්ෂක විශ්වවිද්‍යාලය හරහා වෛද්‍ය උපාධිය විකිණීමේ සූදානමක්


''අපි විරුද්ධ මාලඹේ කියන වචනෙට නෙවෙයි. පෞද්ගලික වෛද්‍ය විද්‍යාලය මාලඹේ දාලා තියෙන හින්ද නෙවෙයි. උපාධිය ලක්ෂ 65 ක් හින්ද නෙවෙයි. ඒක නෙවිල් ප්‍රනාන්දු මහත්මයා දාල තියෙන හින්ද නෙවෙයි.අපි පෞදගලිකරණයට විරුද්ධ පැහැදිලි පදනමක ඉඳලා. ඒක නිසා නෙවිල් ප්‍රනාන්දු ඒක කලත් අපි විරුද්ධයි. ගොඨභය රාජපක්ෂ ඒක කලත් අපි විරුද්ධයි. අපි ඊට විරුද්ධව සටන් කරනවා''

යි වෛද්‍ය පීඨ ශිෂ්‍ය ක්‍රියාකාරී කමිටුවේ කැඳවුම්කරු නජිත් ඉන්දික මහතා පැවසුවේය. ඒ මරදාන සමාජ හා සාමුහික කේන්ද්‍රයේ දී වෛද්‍ය පීඨ ශිෂ්‍ය ක්‍රියාකාරී කමිටුව විසින් පැවැත්වූ මාධ්‍ය හමුවක් අමතමිනි. එහිදී වැඩිදුරටත් අදහස් දැක්වූ ඒ මහතා :-

"වෛද්‍ය පීඨ ශිෂ්‍ය ක්‍රියාකාරී කමිටුව වශයෙන් අපි මාලඹේ පෞද්ගලික වෛද්‍ය විද්‍යාලයට විරුද්ධව පසුගිය කාලය මුළුල්ලේ අරගල කළා.මේ වන විටත් අරගල කරමින් ඉන්නවා. ඒ පැහැදිලි පදනමක් මත ඉඳගෙන. ආණ්ඩුව උත්සහ කරනවා පෞද්ගලික විශ්ව විද්‍යාල ඉදිකරමින්, ප්‍රතිපාදන කප්පාදු කරමින් , පාසල් වසා දමමින් රටේ අධ්‍යාපන ක්‍රමය බවට පෞද්ගලික අධ්‍යාපනය පත්කිරීමට. මාලඹේ පෞද්ගලික වෛද්‍ය විද්‍යාලය එහි නියමු ව්‍යාපෘතිය ලෙසිනුයි ක්‍රියාත්මක වෙන්නේ. ඒ නිසා තමයි මාලඹේ උපාධි කඩය වසා දැමිය යුතුයි කියන දැඩි අධිෂ්ඨානශීලි අරගලයකට වෛද්‍ය ශිෂ්‍යන් අවතීර්ණ වෙලා ඉන්නේ.

දැන් තවත් ගැටළුවක් මතුවෙලා තියෙනවා. ඒ තමයි කොතලාවල ආරක්ෂක විශ්ව විද්‍යාලය නම් ආයතනය පිළිබඳව ගැටලුව. මීට වසර 03 කට පෙර එහි වෛද්‍ය උපාධි පාඨමාලාවක් ආරම්භ කළා. එහි තර්කානුකුල පදනම ලෙස ඔවුන් ඉදිරිපත් කලේ ආරක්ෂක අංශ වලට වෛද්‍යවරු අවශ්‍යයි කියන ඒක. නමුත් රට තුල ඒ සඳහා ක්‍රමවේදයක් තිබුනා. රටේ දරුණු යුද්ධයක් පවති කාලෙකවත් එහෙම ආයතනයක් ඉදිරිපත් නොකර,ආරක්ෂක අංශවලට වෛද්‍යවරු ගැන අමුතුවෙන් කතා කිරීමේ ගැටළුවක් තිබුනා. තවත් කාරණයක් තමයි මෙහි කණ්ඩායමක සිසුන් 25 දෙනයි බඳවා ගන්නේ. සිසුන් 25 කට මොකටද වෙනම වෛද්‍ය පීඨයක් කියල ගැටළුවකුත් තියෙනවා. ඔවුන් ඇතුලත් කරගන්නේ සම්මුඛ පරීක්ෂණ 5 කින් අනතුරුව, සැම ශිෂ්‍යයෙක්ම රුපියල් ලක්ෂ 186 ක වත්කම් සහතික පෙන්නුවට පස්සේ'

ඒ වගේම තමයි සිසුන් හා ආයතනය අතර ගිවිසුම උනේ වසර 10 ක් ආරක්ෂක අංශ වල පමණක් සේවය කල යුතුයි කියන කාරණය. බරපතල ගැටලුව තමයි ඔවුන් ක්‍රමවේදයක් හදලා තියෙනවා රුපියල් ලක්ෂ 31 ක් ගෙවලා එම ගිවිසුමෙන් නිදහස් වෙන්න.

දැන් අපි විශේෂයෙන් ඒ ගැන කතා කරන්නේ මේ වෙද්දී නොනිල තොරතුරු ලැබිල තියෙනවා ඉදිරි වසර වල මෙයට සාමාන්‍ය පෞද්ගලික වෛද්‍ය විද්‍යාලයක් ලෙස සිසුන් බඳවා ගන්න බවටත් වෛද්‍ය උපාධිය විකිණීම ආරම්භ කරන බවටත්. මේ වන විටත් මෙමගින් රාජ්‍ය සරසවි වලට තර්ජනයන් එල්ල වෙලා තියෙනවා. රුහුණ විශ්ව විද්‍යාලයේ වෛද්‍ය පීඨයේ පමණක් ආචාර්ය වරු 8 දෙනෙක් මෙහි සේවය කරනවා.ආචාර්ය වරයෙක් මුළුමනින්ම ඉවත්වෙමින් කොතලාවල ආරක්ෂක විශ්ව විද්‍යාලයට ඇතුලත් වෙලා.කොළඹ ජාතික රෝහලේ සායනික පුහුණුවටත් මෙහි සිසුන් පැමිණෙනවා. ඒ හරහා ගැටළු මතුවෙලා තියෙනවා කොළඹ විශ්ව විද්‍යාලයේ වෛද්‍ය පීඨයට.

තවත් දෙයක් තමයි පසුගිය සිකුරාදා 30/11/2012 වෙනිදා වෛද්‍ය පීඨධිපති හා ආරක්ෂක ලේකම් වරයා අතර සාකච්ඡාවක් පවත්වලා තියෙනවා. අපි අහනවා මොකද්ද ආරක්ෂක ලේකම්ට වෛද්‍ය පීඨ වල විතරක් විසඳන්න තියෙන ආරක්ෂක ගැටලුව. හරි පැහැදිලියි. මේ හදන්නේ PMC ආරම්භ කරන්න. මාලඹේ ව්‍යාපෘතියෙන් පස්සේ කොකටත් තෛලය වෙච්ච ආරක්ෂක අංශ පාවිච්චි කරලා අධ්‍යාපන පෞද්ගලික කරගන්න. අපි එකට ඉඩදෙන්නේ නැ.

අපි විරුද්ධ මාලඹේ කියන වචනෙට නෙවෙයි. නෙවිල් ප්‍රනාන්දුට අපි විරුද්ධ වෙනවා.ගොඨභය රාජපක්ෂ ටත් අපි විරුද්ධ වෙනවා.

ඉදිරියේදී වරක් පරාජය කරපු පෞද්ගලික විශ්ව විද්‍යාල පනතත් ආයේ ඉදිරිපත් කරන්න ආණ්ඩුව සුදානම් වෙනවා. අධ්‍යාපනයට වෙන්කළ මුදල 1.5% දක්වා අඩු කරලා.ආණ්ඩුවට අධ්‍යාපන පැහැදිලි ප්‍රතිපත්තියක් තියෙනවා. ඒ තමයි අධ්‍යාපනය විකිණිම. වෙළඳ භාණ්ඩයක් බවට පත් කිරීම.

ඉදිරියේ දී වෛද්‍ය පීඨ ශිෂ්‍ය ක්‍රියාකාරී කමිටුව විදියට දැවැන්ත ක්‍රියාමාර්ග වලට අවතීර්ණ වෙනවා. මාලඹේ පෞද්ගලික වෛද්‍ය විද්‍යාලය මෙන්ම අනෙක් අධ්‍යාපන සංහාරයට එරෙහිව සියලු බලවේග ගෙන දැවැන්ත ක්‍රියාමාර්ග රාශියක් ගන්නවා.

ඉතිහාසය දැවැන්ත කැපකිරීමක් කරලා අධ්‍යාපනය රැකගන්න අපි සිටිනවා. අපි ජනතාවගෙන් ඉල්ලා සිටිනවා අපිත් එක්ක එකතු වෙන්න කියලා."

මෙම අවස්ථාවට කොළඹ හා ජයවර්ධනපුර විශ්ව විද්‍යාලන්හි වෛද්‍ය පීඨ ශිෂ්‍ය සංගම් සභාපතිවරුන් ඇතුළු පිරිසක් සම්බන්ධ විය.

Thursday, December 6, 2012

අත්අඩංගුවට ගත් යාපනය සරසවි සිසුන් වහා නිදහස් කරනු ! - IUSF/FUTA

යාපනය විශ්වවිද්‍යාලය තුළ වර්ථමානය වන විට උද්ගතව ඇති තත්වය පිළිබඳව දැනුවත් කිරීමට හා අත්අඩංගුවට ගෙන සිටින සිසුන් නිදහස් කරන ලෙස බලකරමින් අ.වි.ශි.බ.ම හා විශ්වවිද්‍යාල ආචාර්යවරුන්ගේ සමිති සම්මේලනය පසුගිය 03 වැනිදා ඒකාබද්ධව මාධ්‍ය සාකච්ඡාවක් පවත්වන ලදී.


එහිදී අදහස් දැක්වූ අන්තර් විශ්වවිද්‍යාලයීය ශිෂ්‍ය බලමණ්ඩලයේ කැඳවුම්කරු සංජීව බණ්ඩාර සහෝදරයා,

මීට දින කිහිපයකට උඩදී අප දැනුවත් කළ පරිදි මේ වන විට යාපනය විශ්වවිද්‍යාලය තුළ මතුවී ඇත්තේ ඉතාමත් බරපතල තත්වයක්. යාපනය විශ්වවිද්‍යාලයේ ශිෂ්‍යයන්ට හා ශිෂ්‍ය ක‍්‍රියාකාරිකයන්ට එරෙහිව රජයේ ආරක්ෂක අංශ විසින් බරපතල මර්දනයක්, ප‍්‍රචණ්ඩත්වයක් මුදාහරිමින් තියෙනවා. මේ වන විට යාපනය විශ්වවිද්‍යාලයේ මහා ශිෂ්‍ය සංගමයේ ලේකම් සහෝදරයා ඇතුළු ශිෂ්‍ය ක‍්‍රියාකාරිකයන් 4 ක් අත්අඩංගුවට ගෙන ඇති අතර තවත් ශිෂ්‍ය නායකයින් ගණනාවක් අත්අඩංගුවට ගැනීම සඳහා විශාල මෙහෙයුමක් ක‍්‍රියාත්මකයි.

ගණකාධිකරණ පීඨයේ සභාපති දර්මන් හා විද්‍යා පීඨයේ සොලමන් යන සහෝදරවරුන් පසුගිය 30 වෙනිදා දහවල් අත්අඩංගුවට ගෙන තියෙනවා. ඒ ඔවුන්ට විරුද්ධව පැමිනිල්ලක් විභාගකිරීමට ඇතැයි කියමින්  කෝපායි පොලිසිය කළ කැඳවීමකට අනුව  පොලිස් ස්ථානයට ගිය අවස්ථාවේදීයි. මහා ශිෂ්‍ය සංගමයේ ලේකම් පරමලිංගම් දර්ශනාත් හා ගනේෂලිංගම් සුදර්ශන් යන සහෝදරවරුන්ව පසුගිය 30 වෙනිදා මධ්‍යම රාත‍්‍රියේ නිවෙස්වලට පැමිණ අත්අඩංගුවට ගෙන තියෙනවා. දැනට දින දෙකකට වඩා වැඩි කාලයක් ගතවී ඇතත්  තවමත් ඔවුන්ව කිසිදු අධිකරණයකට ඉදිරිපත් කිරීමට හෝ නිදහස් කිරීමට කටයුතු කර නැහැ. විශ්වවිද්‍යාලය අවට විශාල හමුදා සෙබළුන් ප‍්‍රමාණයක් රඳවා තබමින් යුධ පිටියක වැනි ස්වභාවයක් ඇති අතර යාපනය නගරය තුළ විශාල මර්දනයක් ක‍්‍රියාත්මකයි. 28 වෙනිදා යාපනය විශ්වවිද්‍යාලයේ ශිෂ්‍යයො සිදුකරපු උද්ඝෝෂණයට එල්ලකරන ලද අමානුෂික ප‍්‍රහාරය වගේම මේ විදිහට බොරු චෝදනා එල්ල කරල  ශිෂ්‍ය ක‍්‍රියාකාරිකයො අත්අඩංගුවට ගැනීමත්  අවිශිබම ලෙස අපි දැඩි පිළිකුලෙන් යුතුව හෙළා දකිනවා. ඒ විතරක් නෙවෙයි අත්අඩංගුවට ගත් මේ සියළුම සහෝදරවරු වහාම නිදහස් කරන්න කියන බලපෑමත් යාපනය විශ්වවිද්‍යාලය තුළ සිසුන්ට නිදහසේ ඉගෙන ගත හැකි වටපිටාවක් නිර්මාණය කරන්න වගේම දිගින් දිගටම ආරක්ෂක අංශ මැදිහත්වීමෙන් සිදුකරන බලපෑම නතරකරන්න කියන බලපෑමත් අපි ආණ්ඩුවට කරනවා.

ආණ්ඩුව උතුරේ මර්දනය ක‍්‍රියාත්මක කරන අතර තුර ඒ සියලූ සැහැසිකම් දකුණේ ජනතාවට සාධාරණීකරණය කිරීම සඳහා රාජ්‍ය මාධ්‍ය යොදාගනිමින් ව්‍යාජ ප‍්‍රචාරයන් දියත්කරනවා.  දකුණේ ජනතාව සිය අයිතීන් වෙනුවෙන් අරගල කරද්දීත් අනුගමණය කලෙත් ඒ ප‍්‍රතිපත්තියම තමයි.

ගෙවුණු වසර තුනකට අධික යුද කාලීන වකවානුව  තුළ උතුරු නැගෙනහිර පළාත් තුළ විශාල වශයෙනුත් දකුණේ යම් යම් ප‍්‍රදේශවලත් සිංහල දෙමළ මුස්ලිම් සියලූම ජාතික ප‍්‍රජාවන්ට එරෙහිව විශාල ත‍්‍රස්තවාදයක් දෙපාර්ශවයෙන්ම ක‍්‍රියාත්මක වූනා. LTTE සංවිධානය පැත්තෙන් වගේම රජයේ පාර්ශවයෙනුත් ක‍්‍රියාත්මක වුණු ත‍්‍රස්තවාදය එතරම්ම භයානකයි. මේවන විටත් රජය උතුරෙදි වගේම දකුණෙදිත් ක‍්‍රියාත්මක කරමින් තියෙන්නේ ප‍්‍රජාතන්ත‍්‍රවාදයට, මානව නිදහසට එරෙහි ත‍්‍රස්ත‍්‍රවාදයම තමයි. අපි ශිෂ්‍ය ව්‍යාපාරය විදිහට කවාරාකාරයකවත් ත‍්‍රස්තවාදයක් අනුමත කරන්නේ නෑ. කවුරු කළත් ත‍්‍රස්තවාදය ත‍්‍රස්ත‍්‍රවාදයමයි. අද යාපනය තුළ ක‍්‍රියාත්මක වෙන  ත‍්‍රස්තවාදයක් තියෙනවා. ඊට එරෙහිව අපි කොන්දේසි විරහිතව අපගේ විරෝධය ප‍්‍රකාශකරනවා.  ත‍්‍රස්තවාදයට අපි විරුද්ධ බව ඇත්ත නමුත් දෙමළ ජනතාවට සිතන්න පතන්න තියෙන අයිතිය, ඔවුන්ගේ  විශ්වාසයන්  හා ඇදහිලි සඳහා ඔවුන්ට තියෙන අයිතිය, ඔවුන්ගේ මිනිසුන් සමරන්න තියෙන අයිතියට අපි ගරුකරනවා. මොකද ඒවා මානුෂීය කාරණා. ඒවට බලපෑම් කරන්න කිසිවකුටත් අයිතියක් නෑ. ඒවා තීරණය කිරීමේ අයිතිය රජයට පවරන්න කොහෙත්ම අපි එකඟ නෑ. ඔවුන් හිතන විදියට, ඔවුන්ගෙ විශ්වාසයන්ට, ඔවුන්ගෙ වීරයන්ට අපි එකඟ නොවෙන්න පුළුවන් ඒත් ඔවුන්ට එහෙම කරන්න එපා කියලා බලපෑම් කරන්න අපට තියෙන අයිතිය මොකද්ද? මැරුණු මිනිස්සු හරිද වැරදිද, ඔවුන්ගෙ මතවාදයන් අපි පිළිගන්නවද නැද්ද ඒදේවල් කුමක් වුවත්  දෙමළ ජනතාවට තමන්ගේ මියගිය මිනිසුන් සමරන්න අයිතියක් තිබෙනවා. ඒක උතුරේ ජනතාවට විතරක් නෙවෙයි දකුනේ ජනතාවටත් තියෙනවා. එවැනි සැමරුම් කරන එක නෙවෙයි ත‍්‍රස්තවාදය කියල කියන්නේ  ඒ අයිතිය ප‍්‍රචන්ඩත්වය යොදාගෙන වලක්වන එකයි. ආණ්ඩුව මේ කරන දේවල් වලින් යළිත් රට තල්ලූ කරමින් තිබෙන්නේ ජනඝාතක ජාතිවාදී යුද්ධයක් දෙසටයි. ජාතිවාදයන් කිසිවක් තනිව පවතින්නේ නෑ. මේවා එකිනෙකට අන්තර් සම්බන්ධිතයි. එක ජාතිවාදයක් පෝෂණය කරද්දී අනික් ජාතිවාදයත් පෝෂණය වෙනවා. රජය මැදිහත් වීමෙන් බොදුබල සේනා වැනි සංවිධාන හරහා මුස්ලිම් විරෝධී ජාතිවාදයක් හදන්න හදනවා. ඒ වගේම දෙමළ ජනතාවට විරුද්ධ ජාතිවාදයක් හදනවා. මෙය ඉතාම භයානක තත්ත්වයක්. අපි දන්නවා අවුරුදු 30 ක් තිස්සේ දෙකොන ඇවිලූණු යුද්ධයක් තිබුණා. දැන් මේ හදන්නෙ තුන්කොනම අවුලූවපු යුද්ධයක් වෙත රට තල්ලූ කරන්න. මේ විනාශයෙන් රටත් සමාජයත් ගලවා ගැනීමේ වගකීමක් අපි ඔබ කාටත් තියෙනවා. අපි ශිෂ්‍ය ව්‍යාපාරය විදිහට මේ ජාතිවාදී අගුලේ නොවැටී අන්‍යෝන්‍ය විමුක්තිය නිදහස වෙනුවෙන් සටන් වැදිය යුතුයි. මෙහිදී සිංහල ශිෂශ්‍යා සිංහල ජාතිවාදයෙන් මිදිය යුතුයි වගේම දෙමළ ශිෂ්‍යාටත් විශාල වගකිමක් තියෙනවා අන්තවාදයන්ට තල්ලූ නොවී සිය අයිතීන් දිනා ගැනීමේ අරගලය වෙනුවෙන් දකුණ හා අත්වැල් බැදගත යුතුයි. ඒ වෙනුවෙන් අන්තර් විශ්වවිද්‍යාලයීය ශිෂ්‍ය බලමණ්ඩලය විදිහට අපි කොන්දේසි විරහිතව සටන් කරන්න සුදානම්. අපි  ආණ්ඩුවට බලකරනවා අත්අඩංගුවට ගත් යාපනය විශ්වවිද්‍යාලයේ මහා ශිෂ්‍ය සංගමයේ ලේකම් සහෝදරයා ඇතුළු සහෝදරවරු 4දෙනාගේ ජීවිත ආරක්ෂාව තහවුරු කර ඔවුන් වහා නිදහස් කරන ලෙස. යාපනය විශ්වවිද්‍යාලයට සිදුකරන ආරක්ෂක අංශ මැදිහත්වීම් වහාම නවත්වල ඔවුන්ට නිදහසේ ඉගෙනගන්න ඉඩදිය යුතුයි.

මෙහිදී අදහස් දැක්වූ විශ්වවිද්‍යාලයීය ආචාර්ය සමිති සම්මේලනයේ සභාපති නිර්මාල් රංජිත් දේවසිරි මහතා,

පසුගිය සතියේ යාපනය විශ්වවිද්‍යාලයේ ඇතිවු තත්වය සම්බන්ධයෙන් විශ්වවිද්‍යාලයීය ආචාර්ය සමිති සම්මේලනයේ් බරපතල අවධානය යොමුවී තිබෙනවා. යාපනය විශ්වවිද්‍යාලයේ මෙම තත්වය අළුත් තත්වයක් නොවෙයි. පසුගිය කාලය පුරාම යාපනයේ ජන ජීවිතයට එල්ලවී ඇති බරපතල රාජ්‍ය මිලිටරීකරණයේම තවත් එක අවස්ථාවක්්. රජයේ මැදහත් වීම ඇතුළෙ දකුණේ මාධ්‍ය වල පලවන තොරතුරු අනුව නැවත කොටි ත‍්‍රස්තවාදය හිස එසවීමට ගත් උත්සහයක් ලෙසයි. එයට දකුණේ සිංහල බෞද්ධ සමාජයේ පොදු එකඟතාවක් ඇති බවක් පේනවා. උතුරේ මේ තත්වය අපිව නැවත ගෙනයනවා ජේ. ආර් ජයවර්ධන යුගයට. උගත් පාඩම් ප‍්‍රතිසංවිධානයක් ගැන පසුගිය කාලයේ කතා කරා. කේ. පී රාජ්‍ය වරප‍්‍රසාද විදීම පිළිබඳ ප‍්‍රශ්න කරපු වෙලාවක රජයේ ඇමති වරයෙක් එය ජනවර්ග අතර සංහිදියාව ඇති කිරීමට කටයුතු කිරීම ලෙස පිළිතුරු ලබා දුන්නා. මේ රජය එවැනි ප‍්‍රවේශයක් යාපනයේ සාමාන්‍ය ජනයා, විශ්වවිද්‍යාල සිසුන් සම්බන්ධයෙන් නැත්තේ ඇයි?

රජය කතා කරන්නේ ජාතීන් අතර එකඟතාව, සහෝදරකම, සහජීවනය, සමගිය පිළිබඳව. එය සැබෑවක්ද කියලා පොදු ජනතාවගේ ඇස් අරවන්න යාපනය විශ්වවිද්‍යාලයේ සිදුවීමම ප‍්‍රමාණවත් කියලයි මට සිතෙන්නේ. 71හා 89 අරගල කරපු සහෝදරවරුන්ටත් ත‍්‍රස්තවාදී ලේබලය ඇලෙව්වා. නමුත් අදටත් ඔවුන් සැමරීම සිදුකරනවා. නමුත් කනගාටුව තමයි රජය දමිළ ජනතාවට සම්බන්ධයෙන් එවැනි නම්‍යශීලී ප‍්‍රතිපත්තියක් අනුගමනය නොකිරීම. ඔවුන්ට තමන්ගේ මියගිය ජනතාව සමරන්න ඇති අයිතිය උල්ලංඝනය කරලා තිබෙනවා. මෙසේ වන්නේ උතුර පිළිබඳ දකුණේ ජනතාව සිතන ආකාරය පිළිබඳ ප‍්‍රශ්නයක් තිබෙන නිසා. උතුරේ ජනතාව දකුණට අවශ්‍ය විදිහට සිතිය යුතුයි කියා සිතීමම වැරදියි.

ඔවුන් හමුදාවේ මැදිහත් වීම් පිළිබඳව දැඩි කෝපයකිනුයි පසුවන්නේ. එනිසා ඔවුන්ට එරෙහිව හමුදාවේ මෙම අත්තනෝමතික මැදිහත්වීම් භයානක ප‍්‍රතිඵල ගෙනෙන්න ඉඩ තිබෙනවා. දකුණ තරම්වත් යාපනයේ ප‍්‍රජාතන්ත‍්‍රවාදී ඉඩක් නැහැ. උතුර මුළුමනින්ම මිලිටරීකරණය වු නගරයක්. ඒ ජනතාව තුළ ආණ්ඩුවට එකගතාවක් නැහැ. එවැනි තත්වයක් තුළත් උතුරේ විශ්වවිද්‍යාල ශිෂ්‍යයන් කෙරෙහි ආණ්ඩුවේ මැදිහත්වීම මේ ආකාරයේ නම් එය අනාගතයේ වඩාත් දරුණු ප‍්‍රතිඵල ඇතිකරාවි. ඒ වගේම විශ්වවිද්‍යාල තුළට දේශපාලන මැදිහත්වීම් නවත්වන්න කියලා ආචාර්යවරු ලෙස අපි පහුගිය කාලය පුරාවටම අරගලකලා. උපකුලපතිවරු ආණ්ඩුවේ ගැත්තන් බවට පත්ව ඇති නිසා මේ තත්වය ඇති වෙලා තිබෙන්නේ. අපි මේ තත්වය හෙළා දකිනවා. මෙය විශ්වවිද්‍යාල වල ප‍්‍රශ්නයක් නෙමෙයි පොදුවේ සමාජයක් ලෙස මුහුණදෙන ගැටළුවක්. මේ පිළිබඳව සමාජයක් ලෙස අපි අවධානය යොමුකර යුතුයි කියලා අපි කියනවා.

Tuesday, December 4, 2012

SAITM පිළිබඳ විධිමත් පරීක්ෂණයක්

මාල‍ඹේ ‍පෞද්ගලික ‍වෛද්‍ය විද්‍යාලය පිළිබඳ විධිමත් පරීක්ෂණයක් සිදුකිරීම සඳහා පාර්ලි‍මේන්තු ‍තේරීම් කාරක සභාවක් පත්කරන ‍ලෙස කථානායකවරයා‍ගෙන් ඉල්ලීමක් කර ඇතැයි වාර්තා ‍වේ.
විපක්ෂ‍යේ පාර්ලි‍මේන්තු මන්ත්‍රීවරුන් අට (08) ‍දෙ‍නෙකු‍ගේ අත්සනින් යුතුව එම ඉල්ලීම සිදුකර ඇත. ‍
මෙම ඉල්ලීම සිදුකර ඇති පාර්ලි‍මේන්තු මන්ත්‍රීවරුන් ‍ලෙස අනුර කුමාර දිසානායකජයන්ත කැට‍ගොඩවිජිත ‍හේරත්,සුනිල් හඳුන්නෙත්තිසුජීව ‍සේරසිංහකබීර් හසීම්හරීම් ප්‍රනාන්දුදයාසිරි ජය‍සේකර සහ අජිත් පී. ‍පෙ‍රේරා සඳහන් ‍වේ.
ඉහත සඳහන් මන්ත්‍රීවරුන්‍‍ විසින් ‍මේ පිළිබඳව කළ ඉල්ලීම ‍මෙ‍සේය.
                         ‘‘මාලඹේනව නුවර පාර ඔබ්බෙහිමිලේනියම් ඩ‍්‍රයිව් ලිපිනයේ පිහිටි South Asian Institute of Technology and Management (Pvt.) Ltd. (SAITM) නම් ආයතනයක් ශ‍්‍රී ලංකා ආයෝජන මණ්ඩලයේ ව්‍යාපෘතියක් ලෙස මේ වනවිට වෛද්‍ය පුහුණු පාඨමාලා පවත්වමින් තිබේ.
ශ‍්‍රී ලංකාව තුළ සෞඛ්‍ය ක්‍ෂේත‍්‍රයට අදාළ කවර හෝ උපාධියක් පිරිනැමීමේදී සෞඛ්‍ය අමාත්‍යාංශයේ හා ශ‍්‍රී ලංකා වෛද්‍ය සභාවේ අනුමැතිය ලබාගත යුතු වුවද මෙම ආයතනය ඒ කොන්දේසි මෙතෙක් ඉටුකර නැත.
එවකට සෞඛ්‍ය අමාත්‍යාංශයේ ලේකම් වෛද්‍ය රවීන්ද්‍ර රුබේරු මහතාගේ සභාපතිත්වයෙන් පත්කළ පංච පුද්ගල කමිටුවක් විසින් 2012.02.28 නිකුත් කළ වාර්තාවකින් මෙම ආයතනය සිදුකරන ලද වැරදි ගණනාවක් පෙන්වාදී ඇත.
2011 මැයි මාසයේ සිට South Asian Institute of Technology and Medicine (Pvt.) Ltd. ලෙස නම වෙනස් කරගත් මෙම ආයතනයශ‍්‍රී ලංකා වෛද්‍ය සභාව විසින් සිසුන් තවදුරටත් බඳවා නොගන්නා ලෙස දැනුම්දී තිබියදීත් එය නොසලකා ශිෂ්‍ය කණ්ඩායම් කීපයක් බඳවාගෙන ඇත.
එසේම සෞඛ්‍ය අමාත්‍යාංශයේ කිසිදු අනුමැතියකින් තොරව ශික්‍ෂණ රෝහලක් ලෙස නම් කර පෞද්ගලික රෝහලක් පවත්වාගෙන යන අතරඒ සඳහා ප‍්‍රචාරය ලබාදෙමින් සිසුන් බඳවා ගනිමින් සිටී. 1987 අංක 48 දරණ මානව පටක බද්ධ කිරීම පිළිබඳ පනත උල්ලංඝනය කරමින් මේ වනවිට මෙම ආයතනය මෘත ශරීරද ලබාගනිමින් තිබේ.
එක් ශිෂ්‍යයෙකුගෙන් රුපියල් ලක්‍ෂ 70ක් පමණ අයකර ගනිමින් පවත්වාගෙන යන මෙම ආයතනය ශ‍්‍රී ලංකාවේ නිදහස් අධ්‍යාපන ක‍්‍රමයට බලවත් තර්ජනයක් වන අතර සුදුසුකම් නොලත් වෛද්‍යවරු පිරිසක් බිහිකිරීමෙන් සෞඛ්‍ය සේවාවටද අනාගතයේ දැඩි හානියක් සිදුකරනු ඇත.
කරුණු මෙසේ තිබියදී ගරු උසස් අධ්‍යාපන අමාත්‍ය එස්.බී. දිසානායක මැතිතුමා විසින් 2012 අගෝස්තු 30 දින ගැසට් නිවේදනයක් මෙම ගරු සභාවට ඉදිරිපත් කරමින් SAITMආයතනයට වෛද්‍ය උපාධි ප‍්‍රදානය කිරීම සඳහා අවසරය ලබාදෙන ලදී.
මෙසේ හෙයින් South Asian Institute of Technology and Medicine (Pvt.) Ltd. ආයතනය පිළිබඳ විධිමත් පරීක්‍ෂණයක් සිදුකිරීම සඳහා පාර්ලිමේන්තු තේරීම් කාරක සභාවක් පත්කරන ලෙස ඉල්ලා සිටිමු''
-lankatruth

Saturday, December 1, 2012

ලෝකය දකිනු වස් මතුපරපුර උදෙසා පිදෙන බුද්ධි මෙහෙවර

Rajarata University OL Semina
ශ්‍රී ලංකා රජරට විශ්වවිද්‍යාලයේ ව්‍යවහාරික විද්‍යා පීඨ ශිෂ්‍ය සංගමය සහ මහා ශිෂ්‍ය සංගමය එක්ව වාර්ෂිකව සංවිධානය කෙරෙන "ලෝකය දකිනු වස් මතුපරපුර උදෙසා පිදෙන බුද්ධි මෙහෙවර" යන්න තේමාව කොටගත් සාමාන්‍ය පෙළ සම්මන්ත්‍රණ මාලාව මෙවරත් ඉතා සාර්ථක ලෙස පැවැත්වින. උතුරු මැද පළාතේ දුෂ්කර පාසල් වල දරුවන් ඉලක්ක කර ගනිමින් මෙම සම්මන්ත්‍රණ වාර්ෂිකව මාලාව පවත්වනු ලබයි

ඔක්තෝම්බර් මස 13 වන දා ආරම්භ වූ මෙමෙ සම්මන්ත්‍රණ මාලාව නොවැම්බර් මස 18 වන දින දකවා පැවැත්වින. මෙහි පළමු සම්මන්ත්‍රණය අනුරාධපුර SOS ළමා ගම්මානයේදී පැවැත්වුණු අතර එයට ළමාගම්මානයේ ජීවත් වන ළමුන් ඇතුළු SOS ළමා ගම්මානයේ ආධාර මත ඉගෙනුම ලබන අනුරාධපුර ප්‍රදේශයේ ළමුන්ද 50කට ආසන්න පිරිසක් සහභාගී විය.

අනතුරුව හොරොවුපතාන රුවන්වැලි මධ්‍ය මහා විද්‍යාලයේදී මෙම සම්මන්ත්‍රණ මාලාව දියත් කෙරුණු අතර ඒ සඳහා කහටගස්දිගිලිය, ගලෙන්බිඳුනුවැව, හොරොවුපතාන ආදී දුෂ්කර ප්‍රදේශ වල සිසු සිසුවියන් 200කට ආසන්න පිරිසක් සහභාගී විය. ගණිතය, විද්‍යාව හා ඉංග්‍රීසි යන ප්‍රධාන විෂයන් සඳහා ඉලක්ක ප්‍රශ්න පත්‍ර යොදාගනිමින් දියත් කල මෙමෙ සම්මන්ත්‍රණ මාලාව ශ්‍රීලංකා රජරට විශ්වවිද්‍යාලයේ ව්‍යවහාරික විද්‍යා පීඨයේ සිසු සිසුවියන් විසින් මෙහෙයවනු ලැබීය.