skip to main |
skip to sidebar
10:57 AM
Unknown
"උසස් පෙළ සමත් සියලු තරුණ තරුණියන්ට උසස් අධ්‍යාපනය හැදෑරීමේ අයිතිය සුරැකිය යුතු වන අතර මම ඒ අභියෝගය භාර ගනිමි. ඒ පළමු පියවර ලෙස නව සරසවි පාඨමාලා ආරම්භ කිරීම තුලින් සහ සරසවි පහසුකම් පුළුල් කිරීම තුලින් විශ්වවිද්‍යාල වලට බඳවා ගන්නා ශිෂ්‍ය සංඛ්‍යාව වැඩි කිරීමට මම පියවර ගන්නෙමි.විවෘත විශ්වවිද්‍යාල අධ්‍යාපනය පුළුල් කිරීම සඳහා අවශ්‍ය පහසුකම් හා ප්‍රතිපාදන සපයන්නෙමි..."
මේ ජනාධිපතිවරයාගේ මහින්ද චින්තන ප්‍රතිපත්ති ප්‍රකාශයේ 65 වන පිටුවේ සඳහන් සැමට සරසවි වැඩසටහන යටතේ මුලින්ම සඳහන් වන කාරණයකි.මෙම ප්‍රතිපතති ප්‍රකාශය එලි දක්වා මේ වන විට වසර 8 ක කාලයක් ගත වී ඇති අතර මහින්ද චින්තන ඉදිරි දැක්මක්ද එලි දක්වා බොහෝ කල්ය. පසුගිය මාර්තු මස 1 වන දින උසස් අධ්‍යාපන අමාත්‍යාංශයේ ප්‍රගතිය සොයා බැලීම සඳහා එම අමාත්‍යංශයට ගිය ජනාධිපතිවරයා ඔහුගේ මහින්ද චින්තන ප්‍රතිපත්ති ක්‍රියාත්මක කිරීම උදෙසා වූ කදිම අදහස් ඉදිරිපත් කළේය. උසස් පෙළ විභාගයෙන් A සමාර්ථ තුනක් ලබා ගත සිසුන් පවා විශ්වවිද්‍යාල ප්‍රවේශය අහිමි වන බව ආඩම්බරකාර තාත්තාට තේරුම් ගොස් ඇත්තේ වසර අටකට පසුවය. ඊට විසදුම් ලෙස ජනාධිපතිවරයාගේ යෝජනාව වන්නේ අදාල සිසුන් ශිෂ්‍යත්ව ලබා දී හෝ පුද්ගලික විශ්වවිද්‍යාලකට ඇතුලත කිරීමයි.මාලඹේ හොර උපාධි කඩය යනු දැනට ලංකාවේ හොඳම පෞද්ගලික රෝහල සතු උසස් විශ්වවිද්‍යාලයක් බව ආඩම්බරයෙන් කතා මත දොඩන අමාත්‍යවරයාගේ යෝජනාව වන්නේ මාලඹේ හොර උපාධි කඩයට ඇදල සිසුන් ඇතුලත කිරීම සිදු කල හැකි බවයි. ජනාධිපතිතුමනි , මහින්ද චින්තන ප්‍රතිපත්ති ප්‍රකාශයේ ඔබම යලි යලි කියවා බැලිය යුතු බව අපගේ හැඟීමයි. නව සරසවි පාඨමාලා ඇති කර ,බඳවා ගන්නා සිසුන් ශිෂ්‍ය සංඛ්‍යාව වැඩි කිරීමට ඔබ පොරොන්දු දුන්නේ කාටද? මාලඹේ පෞද්ගලික වෛද්‍ය විද්‍යාලය යනු මෙරට වෛද්‍ය සභාව තවමත් පිලි නොගන්නා උපාධියක් ලබාදෙන හොර උපාධි කඩයක් බව නොදැනීමට තරම් ආඩම්බරකාර තාත්තාගේ සංවේදී පිතෘත්වයට කුමක් සිදූ වීද?මාලඹේ වෛද්‍ය විද්‍යාලයට සායනික පුහුණු කටයුතු කිරීමට අවශ්‍ය පහසුකම් සැපයීමට රුපියල් මිලියන 600 ක ණය මුදලක් නිකුත් කිරීමට මුල්‍යය වත්කම් තිබු ආණ්ඩුවේ බලධාරීන්ට ජාතික විශ්වවිද්‍යාල පද්දතිය රැකගැනීමට වඩා පෞද්ගලික විශ්වවිද්‍යල නඟා සිටුවීමට ඇති උවමනාව කුමක්ද?
මෙරට ජාතික විශ්වවිද්‍යාලයකට ඇතුලත් වී උපාධිය සම්පුර්ණ කිරීමට උපරිම සුසුකම් ඇති අයවලුන් පවා මෙරට තුල පවා කිසිඳු පිළිගැනීමක් නැති උපාධි කඩ තුලට දැක්කීමට ඔබට ඇති අයිතිය කුමක්ද?
අදටත් නිසි අනුමැතියකින් තොරව පවත්වාගෙන නොයන හොර උපාධි කඩවලට නීතිමය භාවයක් ලබා දීමට සුක්ෂම ලෙස කෙරෙන මෙවන් කටයුතු පිලිබඳ ලාංකීය ශිෂ්‍ය ව්‍යාපාරය අවදියෙන් බව මතක් කර දෙනු කැමැත්තෙමු.....
10:40 AM
Unknown
සිසුන්ගේ උපාධි සිහිනය භාවිත කරමින් ඔවුන් පෞද්ගලික විශ්වවිද්‍යාලවලට ගාල් කිරීමට රජය උත්සාහ දරන්නේ යැයි අන්තර් විශ්වවිද්‍යාල ශිෂ්‍ය බල මණ්ඩලය පවසයි.
සිසු අවශ්‍යතාවන් සිය දේශපාලන අවශ්‍යතා වෙනුවෙන් යොදාගැනීම ඉතා නින්දිත යැයි පවසන අන්තර් විශ්වවිද්‍යාල ශිෂ්‍ය බල මණ්ඩලයේ කැඳවුම්කරු සංජීව බණ්ඩාර මහතා පවසන්නේ රාජ්‍ය විශ්වවිද්‍යාල පද්ධතිය සඳහා වැඩි ශිෂ්‍ය පිරිසක් මෙවර බඳවාගන්නා බව රජය සඳහන් කළද ඒ වෙනුවෙන් වන විධිමත් වැඩපිළිවෙළක් රජය සතුව නැති බවයි.
විශ්වවිද්‍යාල පද්ධතියේ ඒ ඒ පීඨයන්ට අදාළව බඳවා ගනු ලබන ශිෂ්‍ය සංඛ්‍යාවේ කප්පාදු කිරීමක් මෙවර සිදුකර ඇතැයි පෙන්වා දෙමින් සංජීව බණ්ඩාර මහතා මෙසේ කීය.
සම්පත්වල හිඟකම නිසා "පේරාදෙණිය විශ්වවිද්‍යාලයේ කෘෂි පීඨයේ සත්ත්ව පාලනය හා මත්ස්‍ය විද්‍යාව පාඨමාලාව ඉදිරියට පවත්වාගෙන යන්න නොහැකි බවට පීඨ මණ්ඩලය තීරණය කරලා තියෙනවා. එහි කළමනාකරණ පීඨයට මීට පෙර වර්ෂවලදී සිසුන් 150ක් බඳවා ගත්තත් මේ වර්ෂයේදී එය 50 දක්වා අඩු කරලා අමතර බඳවාගැනීම් 50ක් එකතු කරලා. සම්පූර්ණයෙන් බඳවාගන්නෙ සිසුන් 100යි.
සබරගමුව විශ්වවිද්‍යාලයේ ව්‍යවහාරික විද්‍යා පීඨයේ පාඨමාලා දෙකකට අදාළව සිසුන් 90කගේ පුරප්පාඩු තියෙනවා. ඒ සඳහා සිසුන් බඳවාගන්න වැඩපිළිවෙළක් නැහැ. විශ්වවිද්‍යාල පද්ධතිය සඳහා මෙවර සිසුන් 26,500ක් බඳවාගන්න බවට රජය ප්‍රකාශ නිකුත් කළත් 22,000ක පමණ පිරිසක් බඳවාගන්න පමණයි ඔවුන් කටයුතු කරන්නෙ. උසස් අධ්‍යාපන අමාත්‍යංශයට ගියපු අවස්ථාවක ජනාධිපතිවරයාත් පැහැදිලිවම කිව්වා ශිෂ්‍යත්ව හරි දීලා උසස් අධ්‍යාපනය වෙනුවෙන් ළමයි පෞද්ගලික විශ්වවිද්‍යාලවලට සම්බන්ධ කරන්න කියලා."
සිය අරමුණු වෙනුවෙන් උසස් අධ්‍යාපන අවස්ථා කප්පාදු කිරීමට රජය දරන වෑයමට එරෙහිව සියලු දෙනා පෙළ ගැසිය යුතු බවද සංජීව බණ්ඩාර මහතා අවධාරණය කළේය.
10:32 AM
Unknown
ගෙන ඒමට නියමිත පෞද්ගලික විශ්වවිද්‍යාල පනත අහෝසිකිරීම, අධ්‍යාපනයට දළ ජාතික ආදායමෙන් 6%ක් වෙන්කර ගැනීම, ප්‍රෝඩාකාරී සපිරි පාසල් ව්‍යාපෘතිය අහෝසි කර පැසල්වලට අවශ්‍ය පරිදි මුදල් ප්‍රතිපාදන වෙන්කිරීම, අධ්‍යාපනය මිලිටරිකරණය නැවතීම වැනි කරුණු කිහිපයක් මුල්කරගනිමින් ඒකාබද්ධ ප්‍රකාශයක් නිකුත් කිරීමට කටයුතු කරන බව නිදහස් අධ්‍යාපනය සුරැකීමේ ජාතික ව්‍යාපාරයේ කැඳවුම්කරු ජ්‍යෙෂ්ඨ කථිකාචාර්ය දේවක පුංචිහේවා මහතා පවසයි.
ඊයේ (03) කොළඹදී බහුජන සංවිධාන රැසකගේ සහභාගිත්වයෙන් පැවැති සාකච්ඡා සභාවේදී මෙම එකඟතාවයට පැමිණි බව ඔහු පවසයි. මේ අනුව ඉදිරියේදී ඒකාබද්ධ ප්‍රකාශය ජනතාව හමුවේ තැබීමටත් තව තවත් වෘත්තීය සමිති ඇතුළු බහුජන සංවිධාන නිදහස් අධ්‍යාපනය දිනාගැනීමේ අරගලයට සම්බන්ධ කර ගැනීමටත් තම සංවිධානය බලාපොරොත්තු වන බවද හෙතෙම පැවසීය.
