Wednesday, September 26, 2012

සංජීව සහ මාලක අප ගෙන යන්නේ කොතැනකටද?


අන්තර් විශ්වවිද්‍යාලීය ශිෂ්‍යබල මණ්ඩලයේ කැඳවුම්කරු සංජීව බණ්ඩාර ඊයේ කොළඹ කොටුවේ මහේස්ත්‍රාත් අධිකරණයේ මහේස්ත්‍රාත් කනිෂ්ක විජේරත්න විසින් ඇප පිට මුදාහරින ලදී. අගෝස්තු 29 වෙනිදා කොළඹ කොටුවේ පැවති නිදහස් අධ්‍යාපනය රැකගැනීම වෙනුවෙන් පැවති රැලියේදී පොලිස් භටයින්ට පහර දීම මොහුට විරුද්ධව තිබු චෝදනාව විය. සංජීව අත් අඩංගුවට ගනු ලැබුයේ මෙම විරෝධතා රැලිය අවසන්වී බස් රථයක තම නිවෙස බලා යමින් සිටියදී සාමාන්‍ය ඇඳුමින් සැරසුණු පොලිස් නිලධාරීන් විසිනි. නමුත් මීට පෙර ඔහු අත් අඩංගුවට ගත අවස්ථාවේදී පොලිසිය කියාසිටියේ ඔහු කොටුවේ දුම්රිය පල ඉදිරි පස උසාවිය විසින් උද්ගෝෂණ කිරීම තහනම් කොට තිබු ස්ථානයේ උද්ගොෂණයේ නිරතවී සිටි හෙයින් අත් අඩංගුවට ගත් බවකි. කෙසේ වුවද ශිෂ්‍යයින්ගේ ඉල්ලීම් මර්ධනය කිරීම සඳහා රජය

Monday, September 24, 2012

දේශපේ‍්‍රමී විශ්වවිද්‍යාල ආචාර්යවරුනි, නුඹලා මේ පාවාදෙන්නෙ නුඹලාගේම ආත්මයයි!

දේශපේ‍්‍රමී විශ්වවිද්‍යාල ආචාර්්‍යවරුන්ගේ සංගමයේ රූකඩ සංදර්ශනයත් සමගම ඇමතිවරයාගේ අලූත් න්‍යාය පත‍්‍රය කරලියට පැමිනීය. ඌරන් කැකුණ තලන විට හබන් කුකුලන්ට රජ මගුල් කියන්නාක් සේ රජය සහ විශ්වවිද්‍යාල වෘත්තීය සමිති අතර ඇති අර්බුදය අස්සේ තම පෞද්ගලික වාසි තකා තම ඇඳිවත උනාදැමීමට මේ උදවියට හැකිවිය. තමන්ගේ වෘත්තීය සමිතියේ නමවත් හරියට කියාගන්න බැරි මේ පුද්ගලයින් තම සගයින්ගේ අයිතිවාසිකම් පාවාදෙමින් කරන මෙම නරිනාඩගම දෙස අපි උපේක්ෂාවෙන් බලා සිටිමු.

Sunday, September 23, 2012

මේ නිදිගැට හැර අවදි විය යුතු කාලයයි.!

ඉඩි අමීන් මැරුණේ කොහොමදැයි ඔබ දනී , ගඩාෆි මැරුණේ කොහොමදැයි ඔබ දනී , හොස්නි මුබාරක්ට සිදු වුනේ මොකද්දැයි ඔබ දනී , හිට්ලර්ට හා මුසොලනීට වුන දේද ඔබ නොදන්නවා විය නොහැක....
නෙල්සන් මැන්ඩෙලා , විලදිමීර් ඉලීච් ලෙනින් , ඒබ්‍රහම් ලින්කන් , ජවහර්ලාල් නේරු , හට හිමි තැනද ඔබ දනී නම් අසන්නට ප්‍රශ්නයක් ඇත මහින්ද මාමා ගෙන් .......

""දෙසීයකට වැඩි උපදේශකයන් (පිල්ලෙයාන් ඇතුළුව ) පිරිසක් ,

ආචාර්ය-සිසු අරගලවලට පෙ.ස.ප. සහය

අධ්‍යාපන අයිතිය රැකගැනීම වෙනුවෙන් විශ්වවිද්‍යාල ආචාර්යවරුන් සහ විශ්වවිද්‍යාල ශිෂ්‍යයින් හෙට ගාල්ලෙන් සහ නුවර සිට ආරම්භ කරන පාගමන්වලට සිය සහයෝගය ලබා දෙන බව පෙරටුගාමී සමාජවාදී පක්ෂය පවසයි. ඒ අනුව තම පක්ෂය ඊට සමගාමීව ක්‍රියාමාර්ග රාශියක් සංවිධානය කළ බව නිවේදනයක් නිකුත් කරමින් පෙරටුගාමී සමාජවාදී පක්ෂයේ දේශපාලන මණ්ඩලය පවසයි.

එම නිවේදනය මෙසේය.

කාලයක් තිස්සේ ලංකාවේ පාලන බලය හෙබ වූ පක්ෂ විසින් අනුගමනය කරනු ලැබූ නව ලිබරල් ධනවාදී සමාජ-ආර්ථික ප‍්‍රතිපත්තිය මත පදනම්ව සිදු කළ අධ්‍යාපන සංහාරය මේ වන විට බරපතළ අර්බුදයක් දක්වා වර්ධනය වී ඇත. මේ වසරේ විශ්වවිද්‍යාල විවෘතව පැවතියේ මාස දෙකක පමණ කාලයක් වන අතර, විභාග ප‍්‍රතිඵල අක‍්‍රමිකතා, විභාග ප‍්‍රශ්න පත‍්‍ර දෝෂ ආදී හේතු මත පාසල් අධ්‍යාපනයේද බරපතළ බිඳ වැටීමක් සිදුව ඇත. මෙම අර්බුද පැන නැගී ඇත්තේ ප‍්‍රතිපාදන කප්පාදුව, ගුරු හිඟය, පාසල් වැසීම, කාර්මික විද්‍යාල බිඳ දැමීම ආදී කාලයක් තිස්සේ පවතින කප්පාදුවට අමතරවය. අධ්‍යාපනය වෙළඳ භාණ්ඩයක් බවට පත් කිරීමත්, රජය අධ්‍යාපනයේ වගකීමෙන් ඉවත් වී සමාජ ස්ථර අධ්‍යාපනයෙන් පිටමං කිරීමත් රජයේ නිල ප‍්‍රතිපත්තිය බවට පත්ව ඇත. වත්මන් අර්බුදයේ සැබෑ මූලය එම ප‍්‍රතිපත්තිය වන අතර රාජපක්ෂ ආණ්ඩුව විසින් එය අලුත් වටයකින් වර්ධනය කර ඇත.

Saturday, September 22, 2012

නිදහස් අධ්‍යාපනයත් අධ්‍යාපනයේ නිදහසත් වෙනුවෙන් පෙළගැසෙමු...!!

වර්තමානය වන විට ශ්‍රී ලංකාවේ නිදහස් අධ්‍යාපනය ඉතාමත්ම දැඩි ලෙස අර්බුදකාරී තත්වයකට පත්ව ඇති මෙම කාළ වකවානුව විශ්වවිද්‍යාල සිසුන් ලෙස අප හට ඉතාමත්ම තීරණාත්මක බව ඔබ අප සැම හොදාකාරව දන්නෙමු. මන්ද එක වසර ප්‍රාථමික අධ්‍යාපනයේ සිට මේ දක්වාම නිදහස් අධ්‍යාපනයෙන් පෝෂණය වූ අප සැම අපට මේ දක්වා නිදහසේ අකුරු කිරීමට උපකාරී වූ නිදහස් අධ්‍යාපනය රැක ගැනීමට එකාවන්ව පෙරට ආ යුතු කාළයයි මේ..

මෙම මස 24 දින සිට 28 යන දිනයන්හි ශ්‍රී ලංකාවේ සියලුම විශ්වවිද්‍යාල නියෝජනය වන ලෙස පේරාදෙනිය ගලහ මංසන්ධියේ සිට කොළඹ කොටුව දක්වා දැවැන්ත පා ගමනක් සංවිධානය කර ඇති අතර එහි දෙවන දවස එනම් සැම්තැම්බර් මස 25 වන දින මාවනැල්ල නගරයේ සිට අඹේපුස්ස මංසන්ධිය දක්වා වූ පා ගමන අප විශ්වවිද්‍යාලයේ මූලිකත්වයෙන් සිදු කිරීමට නියමිතය.කවදත් ශ්‍රී ලංකාවේ අධ්‍යාපන අයිතීන් සුරක්ෂිත කිරීම වෙනුවෙන් පෙනී සිටි සබරගමුව විශ්වවිද්‍යාල සිසුන් වන අපද නිදහස් අධ්‍යාපන සංහාරයට එරෙහිව සියලු දෙනා සමග එක්ව එකාවන්ව පෙළ ගැසෙමු..!!


අධ්‍යාපනය විනාශ කිරීමට දගලන්නේ පරිනත මිනිසුන් බිහි වනවා වැලකීමටයි.

අපට පෙනෙන්නේ සෑම තැනම අරගල වල සටහන්ය. සිසුන් පමණක් නොව විශ්වවිද්‍යාල ආචාර්ය වරුන්ද , අනධ්‍යන සේවකයන්ද , පාසල් ගුරුවරුන් ද සිසුන් ද සෑම දෙනාම එකම අරමුණක් වෙනුවෙන් වෙන වෙනම සටන් වදිමින් සිටී, තැන තැන වල කුඩා වශයෙන් සටන් ඇවිලෙමින් පවතී. සාම්ප්‍රදායික මතවාද මේ සටන් එක් කිරීමට බාධාවක්ව පවතී. ඒ අවසරයෙන් පාලකයෝ තව දුරටත් නිහඩව තම දුර්දාන්ත පාලනයේ යෙදෙමින් සිටී. විශ්ව විද්‍යාලය අර්බුධය දිගින් දිගටම දිග්ගැසෙමින් පවතී.

අ.වි.ශි.බ.ම දැවැන්ත පාගමන

Friday, September 21, 2012

මේ ක‍්‍රමයට අධ්‍යාපනය උවමනා ඔවුන්ගේ වැඩ කර ගන්න සුවච කීකරු සේවකයින් නිර්මාණය කරන්නත්, විකුණන්න සහ මිලදී ගන්නත් පමණයි

ලලිත් සහ කුගන්ට එල්ල වූ මර්දනයත් ශිෂ්‍ය ව්‍යාපාරයට එල්ල වී ඇති මර්දනයත් අතර පොදු ස්වභාවයක් ඇතැයි පෙරටුගාමී සමාජවාදී පක්ෂය පවසයි.

මර්දනයෙන් තොරව නව ලිබරල් ධනවාදය ක්‍රියාත්මක කළ නොහැකි තැනට පාලකයින් පත්ව ඇති බවද එම පක්ෂය පෙන්වා දෙයි. නීති විරෝධීව අත්අඩංගුවට ගත් අන්තර් විශ්වවිද්‍යාලයීය ශිෂ්‍ය බල මණ්ඩලයේ කැඳවුම්කරු සංජීව බණ්ඩාර මහතා වහාම නිදහස් කරන ලෙසද එම පක්ෂය බල කළේය.

අද පෙරටුගාමී සමාජවාදී පක්ෂයේ ප්‍රධාන කාර්යාලයේ පැවති මාධ්‍ය හමුවකදී එම පක්ෂයේ ප්‍රචාරක ලේකම් පුබුදු ජයගොඩ මහතා මේ බව පැවසීය. ඔහු වැඩිදුරටත් මෙසේද පැවසීය.

අත්අඩංගුවට ගත් අන්තර් විශ්වවිද්‍යාලයීය ශිෂ්‍ය බලමණ්ඩල‍යේ කැඳවුම්කරු වහා නිදහස් කරනු! – SSU

කොළඹ අපරාධ විමර්ශන ‍කොට්ඨාශය මගින් අත්අඩංගුවට ගත් අන්තර් විශ්වවිද්‍යාලයීය ශිෂ්‍ය බලමණ්ඩල‍යේ කැඳවුම්කරු සංජීව බණ්ඩාර මහතා වහා නිදහස් කරන ‍ලෙස සමාජවාදී ශිෂ්‍ය සංගමය විසින් නි‍වේදනයක් නිකුත් කරමින් පවසා ඇත.

එහි ජාතික සංවිධායක නලින්ද ජයතිස්ස මහතා‍ගේ අත්සනින් නිකුත්කර ඇති එම නි‍වේදනය පහත පළ‍වේ.

‘‘අද (19) සවස කොළඹ ලිප්ටන් වටරවුම ප‍්‍රදේශයේදී අන්තර් විශ්වවිද්‍යාලයීය ශිෂ්‍ය බලමණ්ඩලයේ කැඳවුම්කරු සංජීව බණ්ඩාර සොයුරා කොළඹ අපරාධ විමර්ශන

Wednesday, September 19, 2012

UNP යැයි හංවඩු නොගසා සරසවි ඇදුරන් මගට බහින්න පෙර අර්බුදයට විසඳුම් ලබාදිය යුතුයි - එජාප මහලේකම්

Thissa attanayake
වෘත්තීය අරගලයක නිරතව සිටින විශ්වවිද්‍යාල ආචාර්යවරුන් එජාප සාමාජිකයන් ලෙස හංවඩු ගැසීම සාධාරණ නැතැයි එක්‌සත් ජාතික පක්‌ෂයේ මහ ලේකම් තිස්‌ස අත්තනායක මහතා පැවැසීය. ඔවුන්ගෙන් බහුතරයක්‌ පසුගිය ජනාධිපතිවරණයේදී ජනාධිපති මහින්ද රාජපක්‌ෂ මහතාගේ ජයග්‍රහණයට උරදුන් බවද තිස්‌ස අත්තනායක මහතා කීවේය.

කොළඹ පිහිටි විපක්‌ෂ නායක කාර්යාලයේ ඊයේ (18 වැනිදා) පැවැති ප්‍රවෘත්ති සාකච්ඡාවේදී වැඩිදුරටත් අදහස්‌ දැක්‌වූ තිස්‌ස අත්තනායක මහතා-

Tuesday, September 18, 2012

නෙලුම් කුළුනෙ අනුහස්

ඇමෙරිකන් ඩොලර් මිලියන් 100ක් නොහොත් රුපියල් මිලියන එකොලොස්දහසක් නොහොත් රුපියල් කෝටි 1100 ක වියදමින් ගොඩ නැගෙන නෙළුම් කුළුණ නම් වූ මීටර් 350ක් වන සම්ප්‍රේෂණ කුලුණ ට පසු ගිය දා මුල් ගල තැබිණි.

ඒ සමග ශ්‍රී ලංකාවට මෙතෙක් තිබූ ලොකුම අඩු පාඩුව සම්පූර්ණ වූ බව හද පිරි ප්‍රීතියෙන් යුතුව නිවේදනය කරයි. ශ්‍රී ලංකාව මෙතෙක් ඌන සංවර්ධිත රාජ්‍යයක් වශයෙන් හැඳින්වූයේ මෙවැනි කුලුනක් නැති නිසා බවත්, කුලුන සමග ශ්‍රී ලංකාවාසි ජනතාවට බොහෝ වාසි ලැබෙන බවත් ඒ සමග හෙලිදරව් වෙයි. ශ්‍රීලංකාවේ සියලු පාසැල් රාජකීය ශාන්ත ‍තෝමස් මට්ටමට එක ‍රැයෙන් උසස් වෙනු ඇත. ඒවාට අවශ්‍ය පමණටත් වඩා ගුරු වරුන්, උපකරණ හා ලී බඩු, පුස්තකාල ලැබෙනු ඇත. අධ්‍යාපනය නගරබද ගම්බද බේදයකින් තොරව සියලු දෙනාට ලැබෙනු ඇත.

Monday, September 17, 2012

තවදුරටත් වෙන්ව සිටීමෙන් ඵලක් නැත, එක් වීමට කාලය පැමිණ ඇත

අපට පෙනෙන්නේ සෑම තැනම අරගල වල සටහන්ය. සිසුන් පමණක් නොව විශ්වවිද්‍යාල ආචාර්ය වරුන්ද, අනධ්යන සේවකයන්ද , පාසල් ගුරුවරුන්ද සිසුන්ද සෑම දෙනාම එකම අරමුණක් වෙනුවෙන් වෙන වෙනම සටන් වදිමින් සිටී, තැන තැන වල කුඩා වශයෙන් සටන් ඇවිලෙමින් පවතී.නමුත් තවමත් සාර්ථකව එක්ව අරමුණ කරා සටන් වදිනවා දක්නට නොමැත. සාම්ප්‍රදායික මතවාද මේ සටන් එක් කිරීමට බාධාවක්ව පවතී.ඒ අවසරයෙන් පාලකයෝ තව දුරටත් නිහඩව තම දුර්දාන්ත පාලනයේ යෙදෙමින් සිටී. විශවවිද්‍යාලය අර්බුධය දිගින් දිගටම දිග්ගැසෙමින් පවතී.ආණ්ඩුව තවත් ඡන්දයක් ජයගෙන අවසන්ය. සාමාන්‍ය ජනතාව තව දුරටත් එදා වේල හා බඩගෝස්තරය වෙනුවෙන් ආණ්ඩුව රකිමින් සිටී.ඔවුන් සාධාරණය, ප්‍රබල විපක්ෂයක්  විකල්පයක් නොමැති කල්හි ජනතාවගේ ක්‍රියාව සාධාරණය.තව දුරටත් ඡන්දය භාවිතා කිරීමෙන් වැළකීම හා ඡන්දය කුරුටු ගෑම හැර ඔවුන්ට විකල්පයක් නැතයි ඔවුන් සිතමින් සිටී.

Friday, September 14, 2012

පෞද්ගලික විශ්වවිද්‍යාල සහ මහින්ද චින්තනය UGC යේ එකම රාක්කයක...

ඔබ මෙහි දකින්නේ උසස් අධ්‍යාපන අමාත්‍යාංශ ලේකම් තුමා ආචාර්ය සුනිල් ජයන්ත නවරත්නගේ කාර්යාලයේ දසුනකි. මෙහි දැක්වෙන්නේ පෞද්ගලික විශ්වවිද්‍යාලත් මහින්ද චින්තනයත් එකම රාක්කයක අඩුක් කර ඇති ආකාරයයි. එනම්, වත්මන් අධ්‍යාපන අර්බුදයේ සැබෑ හේතු හා ඒවා නොවිසඳීමට අදාල ආණ්ඩුවේ ප‍්‍රතිපත්තියයි.

සිසුන් ආචාර්යවරුන් අනධ්‍යන සේවකයින් සියලූ දෙනා අද මහපාරේදී හමුවේ. ඒ කපිලවස්තුපුර සර්වඥධාතූන් බලන්න යන්න නොව, තම අයිතීන් දිනා ගැනීමේ සටනේදීය. මාස ගනනක් සරසවි වසා දමා ඇත. ඒත් ආණ්ඩුවට නම් මේගැන වගේ වගක් නැත.

Thursday, September 13, 2012

අපි බයද ...අපිව බය කරන්න පුලුවන්ද?

අපි අපගේ අරගලයේ තීරණාත්මක මංසන්ධියකට පැමිණ සිටිමු. මේ වනාහි අපගේ එකමුතුභාවය, ශක්තිය සහ කැපකිරීම පමණක් නො ව අපගේ මානව අභිමානය ද පරික්ෂාවට ලක්කෙරෙන මොහොත යි. සියලු ආකාරයේ තර්ජන, ගර්ජන, බියවැද්දීම්, අපහාස, උපහාස, අවමන්, අවලාද සියල්ලට මුහුණ දෙමින් අපි ඉදියට ම ඇදුනෙමු. අපට එරෙහි ව ගෙනා සියලු තර්ක විතර්කවලට ඇති තරම් පිළිතුරු දුන්නෙමු; කුඩා දරුවෙකුට පවා තේරෙන තරම් සරල ව, විස්තරාත්මක ව, සන්සුන් ව, කරුණින් කරුණ, සියල්ල පැහැදිලි කළෙමු. ඉතා ම නිහතමානී නම්‍යශීලි මිනිසුන් ලෙස යම් සාධාරණ එකඟතාවකට පැමිණීම සඳහා අවංක සිතින් සාකච්ඡාවලට සහභාගී වීමු; තවදුරටත් සහභාගී වෙමින් සිටිමු. ඉවසිලිවන්ත ව, විනයගරුක ව, නීතිගරුක ව, වගකීමෙන් යුතු ව අපගේ අදහස සමාජගත කිරීම සඳහා වෙහෙසුනෙමු.

උන්ගේ පුත්තු ගගන තලේ ,අපේ පුත්තු මහ පාරේ

මහින්ද රාජපක්ෂ ජනාධිපතිතුමාගේ පොඩි පුතනුවන් තම උපාධිය සම්පුර්ණ කරගෙන පශ්චාත් උපාදිය සදහා සැරසෙන බව දැනගන්නට ලැබුණි. මට මතක ලෙස ඔහු සරසවියට ඇතුලත් වුයේ අපටත් පසුවය. නමුත් අපට අද සිදුව ඇත්තේ අපගේ උපාධි සිහිනය පසෙකලා බලා සිටීමටය. ඔහුට ඔහුගේ දරුවන් වටිනවා සේම අපගේ දෙමවුපියන්ට අපව වටිනා බව මතක කර දීමට කැමැත්තෙමු. අපගේ දෙමවුපියන්ට ද අපටද අනාගත බලාපොරොත්තු දහසක් ඇත. අපට ඉහලට යාමට ඇති එකම මග අධ්‍යාපනය පමණි. අපගේ දෙමවුපියන්ට අපව පිටරට ගොස් ඉගැන්වීමට මුදල් නැත. නමුත් ආණ්ඩුව විනාශ කරමින් යන නිදහස් අධ්‍යාපනයේ නාමයෙන් අපගේ හැකියාවේ නාමයෙන් අද අප උපාධි සිහිනය දකින්නෙමු.

ආදරණීය නංගියේ මල්ලියේ, ඇහැ ඇරපන්...

විශ්ව විද්‍යාලවල ඉන්න ආදරණීය නංගියේ මල්ලියේ උඹල ගෙදරට වෙලා නිවාඩු ගත කරපු කාලෙ හොදටම ඇති දැන්. උඹල ගෙදර ඉද්දි ආණ්ඩුව උඹලගෙ ලෙචාල (lecturers) දඩයම් කරනව. ඔන්න දැන් ලෙචාල සේවය අත් හැර ගියා සේ සලකල වෙන උන්ගෙන් උඹලගෙ කැම්පස් එක පුරවන්නයි හදන්නෙ. සමහර විට උබල ආපහු කැම්පස් එද්දි හමුදාවෙ කට්ටිය ඉදිවි උබලට උගන්නන්න. උඹල තාම හිතනව නම් මේක උඹලට අදාල නෑ කියල, ගෙදරට වෙලාම බලන් ඉදපන් කැම්පස් අරිනකම්. එදාට උඹලට උගන්නන්න උඹලගෙ ආදරනීය ලෙචාල නැති වෙයි. උඹල අද පාරට බැස්සෙ නැත්නම් හෙට උඹට විතරක් නෙමෙයි උඹගෙ දරුවන්ටත් පාරෙම තමයි ඉන්න වෙන්නෙ. අන්න ඒ නිසයි අපි කියන්නෙ උඹලට පුලුවන් විදියට මේ සටනට සහයොගය දෙන්න ඕන කියල. පටන් ගනින් අදම, උබලගෙ ගෙදරින්ම දැනුවත් කරපන් ගෙදර මිනිස්සු ටික, උඹගෙ අම්ම තාත්ත, අල්ලපු ගෙදර උඹගෙම නෑදෑයොන්ව, උඹල ඔක්කොම පාරට බැස්සොත් මේ සටන අමාරු නෑ දිනන්න, එදාට දිනන්නෙ උඹලගෙ ආචාර්යවරු විතරක් නෙමෙයි,

උඹත් දිනනව...!!

උඹගෙ ඉපදෙන්න ඉන්න දරුවත් දිනනව...!!

සියල්ලෝම එකතු විය යුතුයි..!!

මේ සටන අපි වෙනුවෙනුයි..!!

සෑම විටම හැකි තාක් මිනිසුන් දැනුවත් කරන්න..!!
ලියන්න ..!!

කතා කරන්න..!!!

නරබිලි යදින මග මරුවෝ

අපේ රටේ පාරවල් සියල්ලම පාහේ නොම්මර එකට අලුත්වැඩියා කර තිබුණ ද මිනිසුන්ගේ මොළය අලුත්වැඩියා කළ නොහැකි තරම් පරිහානිගත වී තිබේ. මෙබඳු පරිහානිගත බූරු මොළ සහිත සරීර කූඩු අතට සුක්‌කානමක්‌ හසු වූ විට කියන්නට බැරි තරම් විනාසයක්‌ සිදු වේ. මහ මඟ ගමන් කරමින් සිටි නව යොවුන් දැරියක්‌ සහ ඇගේ මව බීමත් රියෑදුරකු විසින් බස්‌ රථයකට යට කර මරා දමන ලදැයි ඊයේ (12 වැනිදා) 'දිවයිනේ' පළවිය. මියගිය දැරිය දීප්තිමත් ශිෂ්‍යාවකි. ඇය ළඟ එන විද්‍යාලයීය ත්‍යාග ප්‍රදානෝත්සවයේදී ඉංග්‍රීSසි භාෂාව වෙනුවෙන් ත්‍යාගයක්‌ භාර ගැනීමට ද නියමිතව සිටියා ය. මේ බස්‌ රථය පැද වූ රියෑදුරා රියෑදුරෙක්‌ යෑයි කීවාට රියෑදුරෙක්‌ නොවේ. රියේ කොන්දොස්‌තර ය. ඒකාට මොළය මෙන්ම රිය පැදවීමට ලයිසන් ද නැත. මව සහ දුව රියට යට වූ පසුත් රිය නො නැවැත්වූ මී හරක්‌ ඩ්‍රැයිවර් දිගටම යද්දී පොලිසිය රිය හඹා ගොස්‌ එය නවත්වා ගත්තේ ය.

දළ දේශීය නිෂ්පාදිතයෙන් අධ්‍යාපනය සඳහා 6% ක් සහ සෞඛ්‍යය සඳහා 3% ක් වෙන් කරගැනීම සඳහා වූ ඉන්දියානු අරගලය - 9 is Mine

මෙරට විශ්වවිද්‍යාල ආචාර්යවරුන් විසින් ‘අධ්‍යාපනය සඳහා දළ දේශීය නිෂ්පාදිතයෙන් 6% වෙන් කළ යුතුය’ යන ඉල්ලීම ඉදිරිපත් කළ විට උසස් අධ්‍යාපන අමාත්‍යවරයා එය ‘පිස්සු කතාවක්’ යයි උපහාසයට ලක් කළේය. ඉන් පසු කරලියට පැමිණි නේකාකාර පඬියෝ (මේ වචනයෙහි අයිතිය නලින් ද සිල්වා සතු ය) ඉර හඳ දිවුරා කිව්වේ මේ 6% ඉල්ලීම සාධාරණ ඉල්ලීමක් නො වේ ය කියා ය. ගණිත මහාචාර්ය නලින් ද සිල්වා එක්තරා රූපවාහිනී වැඩසටහනක දී ‘මට ගණිතය උගන්වන්නට එනවා ද?’යි තර්ජනාත්මක ව විමසමින් දළ දේශීය නිෂ්පාදිතය යන සංකල්පය ම උඩුයටිකුරු කොට අච්චාරුවක් කළේය. ඇමතිවරයාට අනුව 6% යනු පෞද්ගලික අංශය, දෙමාපියන් සහ රජය යන සියලු පාර්ශ්වයන් විසින් අධ්‍යාපනයට කරන ආයෝජනයෙහි එකතුව යි.

Wednesday, September 12, 2012

විදුහල්පති "කර්නල්" පුහුණුව ඇරඹේ


විදුහල්පතිවරුන්ට "කර්නල්" නාමය ලබාදෙන ජාතික ශිෂ්‍ය භට බළකා පුහුණුව රන්ටැඹේ ජාතික ශිෂ්‍ය භට බළකා පුහුණු කඳවුරේ දී ඊයේ (11වැනිදා) ආරම්භ කෙරිණි.මෙම පුහුණුව සඳහා කොළඹ ප්‍රධාන පෙළේ පාසල්වල විදුහල්පතිවරුන් හා විදුහල්පතිවරියන් විසිතුන් දෙනකු සහභාගිව සිටින අතර අධ්‍යාපන අමාත්‍යාංශයේ අතිරේක ලේකම්වරයකුද පුහුණුවට එක්‌ව සිටියි. පුහුණු කාලය සතියක්‌ වන නමුත් රන්ටැඹේ යැමට සහ ඒමට ගතවන කාලය අනුව පුහුණුව දින පහකට සීමා වන බව විදුහල්පතිවරු පවසති. විදුහල්පතිවරු දස දෙනෙක්‌ සහ විදුහල්පතිවරියෝ දහතුන් දෙනෙක්‌ පුහුණුවට එක්‌ව සිටිති. මෙම පුහුණුවෙන් පසුව ඔවුන්ට "කර්නල්"නාමය හිමිවෙයි.

සමස්ථ පාසල් අධ්‍යාපන ක්ෂේත්‍රයේ බර සෘජුවම දෙමාපියන් මත පැටවීම ඉලක්කකරගනිමින් ක්‍රියාතමකවන වත්මන් වැඩසටහන කිසිදු බාධාවකින් තොරව සිදුකරගැනීට අවශ්‍ය කරන පසුබිම සකසාගැනීම මෙවැනි වැඩසටහන්වල අරමුණ බව ඉතා පැහැදිලිය. ඉතා දුශ්කර ප්‍රදේශවල මෙන්ම නාගරික ප‍්‍රදේශවල සේවයකරන ගුරුවරුන්ට ඇති එකම ගැටලුව කර්නල් තනතුරක් නොතිබීම බව ඕනෑමඅයකුට තේරුම්ගතහැකි කාරණාවකි. එවන් තත්වයක් තුල ක්‍රියාත්මක කරන මෙවැනි වැඩසටහන් වලින් වත්මන් රජය අපේක්ෂා කරන්නේ, පාසල් පද්ධතියද දේෂපාලනීකරණය කර තමන්ගේ ජනතා විරෝධී න්‍යායපත්‍ර පහසුවෙන් ක්‍රියාත්මක කරගැනීමට අවශ්‍ය පසුබිම සකසාගැනීම බව ඉතා පැහැදිලිය.
Source - IUSF

Tuesday, September 11, 2012

ආදරණීය මාමි වෙත...

මාමා කියා කියන්නද අයියේ කියා කියන්නද මට හිතා ගන්න බෑ අයියෝ, රනිල් නම් අයියා ඔයැයිට මම මාමි කියන්නම්. ඇත්තටම මාමි ඔයැයි උසස් අධ්‍යාපන ඇමති උනයින් පස්සේ මම කැම්පස් එකේ ඉන්න කාලෙට වැඩිය වැඩි කාලයක් ගත කරේ ගෙදර පවුලේ උදවිය එක්ක. අපිට එහෙම ගත කරන්න වෙන්නේ එක්කෝ වැකේශන් එකට නැති නම් වෙන විශේෂ නිවාඩු දවසක විතරයි.

අපේ ලෙක්චරස්ලටත් එහෙමයි. ඒ සර්ලට ගෙදර ඉන්න වෙලාවක් ඇත්තෙම නැති තරම්. දැන් ඒ අදුරු යුගය නෑ. ඔයැයි සෝ ගේ‍්‍රට් මාමි. මට ඔයාව අල්ලගෙන ඉබින්න හිතෙනවා. ඔයා කොට නිසා මට ඔයාගේ නලලම ඉඹින්න පුලූවන්. ඒත් ඉතින් රටේ මිනිස්සු මොනවා නොකියයිද මම ඔයාව ඉම්බොත්. එයාලට තේරෙන්නේ නෑ නේ මේ හැමදේම කරන්නේ ඔයා අපිට තියෙන ආදරේ නිසා කියලා.

ඇත්තටම මාමේ අර Z මෙව්වා මෙහෙම කරලා එහෙම එකතුකරන විදිහ කිව්වේ මාමා නේද? හොරා, ...බොරු කියන්න එපා හොදෙ. මම දන්නවා ඒක හොයාගන්න ඇත්තෙත් ඔයා කියලා. ඔයාගේ ඔය චූටි මොලේට ඔව්වත් මහ වැඩ නෙමේ නේ. මාමටයි මාමගෙ උසස් අමාත්‍යංශේ අයටයි ඊට පහල අමාත්‍යංශේ අයටයි පින් සිද්ද වෙන්න අපේ මල්ලි තාම ගෙදර. අපි අවුරුදු දහතුනක් ඉස්කෝලේ ගියා. මල්ලිටයි මටයි කතා කරන්න හම්බ වුන වෙලාවල් ගොඩක් අඩුයි. දැන් මමයි මල්ලි දවසේ පැය විසි හතරෙම කතා කරනවා. පොඩි කාලේ කරන්න බැරි උන සෙල්ලම් අපි දැන් කරනවා. ඊයේ ගිනි ගිනි බෝලේ කරා. පෙරේදා කොපර කොපර පිපිඤ්ඤා කරා. අද උදේ එලූවන් කන්න යනකොට මල්ලි සිංහයා උනා එළුවට ගන්න කෙනෙක් නැතුව ඒක අතර මග නැවැත්තුවා. අපරාදේ...ඒ වෙලාවේ මාමා ලග ඉදිය නම් කියලා හිතුනා.

දැන් කැම්පස් වල ඉන්නේ කොටි නේද මාමේ. අපේ අම්මලට නම් විකාර. මම නම් බයෙන් ඉන්නේ අපේ මල්ලිව කැම්පස් යවන්න. හදිස්සියේ මල්ලිගේ නරක තැනක් කොටියෙක් කෑවොත්, මොකෝ ආයේ වවන්න කියලද.. මාමා එක පාරක් පේරාදෙණියේ කැම්පස් එකට ඇවිල්ලා අර විවෘත කරපු මෙව්වා එකක් ආයේ විවෘත කරන්න ගිහින් කොටියා කෑව සිද්දිය අහනකොටත් ඇග කිලිපොලා යනවා. ඒක නෙමේ මාමේ.. සරසවි වල ඉන්න ඇදුරෝ හෙන නෝටි කට්ටිය නේද? දෙන දේ කාලා ඇදලා ඉන්නේ නැතුව තව අනම් මනම් ඉල්ලන්නත් එනවා. හ.. මට නම් පුදුම තරහක් එන්නේ එයාලා එක්ක. මේ කැම්පස් කියන ඒවා ඔක්කොම වහලා දාන්න ඕන. වහලා දාලා සල්ලි දීලා උගන්නන්න ඕන. එතකොට එයාලා ඉල්ලන දේවල් දෙන්න පුලූවන් නේ. 

දැන් නම් කැම්පස් කියන එක අපිටත් එපා වෙලා තියෙන්නේ. මාමාට ඕන උනෙත් ඒක නේද? මාමා හරිම කුප්පයි මාමේ. ලබන අවුරුද්දේ කැම්පස් යන්න තේරුන ලමයි දැන් කොත්තු දානවා, කඩවල් ගානේ බඩු විකුනනවා.. අන්න බලන්න එයාලා ස්වයං රැකියා වල නියැලිලා ඉන්නේ. ඒක අපේ රටට කොච්චර හොදද? ලබන අවුරුද්දේ කැම්පස් එන ලමයි ගාන අඩු වේවි. ඊට පස්සේ තව අඩුවේවි. අපි මෙව්ව නැත්තටම නැති කරලා දාන්න ඕන. අන්න ඊට පස්සේ අර ලමයා කොත්තු දාලා, බඩු විකුනලා හම්බ කරන සල්ලි වලින් එයාටම එයාගෙ ඉගෙනීමට වියදම් කරගන්න පුලූවන්. අපේ අල්ලපු ගෙදර එකා මේ පාරත් විභාගේ ලිව්වා. මම දන්නවා ඌ මේ පාරත් ෆෙල්. අන්තිම ගොන් මැටි හරකෙක්. පොරගේ පන්තියේ ඉන්නේ හෙන බ‍්‍රයිට් කොල්ලෙක්ගෙන් කොපි කරන්න ගියාම ඌ පෙන්නුවේ නෑ කිය කිය අඩනවා. ආයේ පාරක් විභාගේ ලියන්න ගියොත් නම් මම ඌට කනට දෙකක් ගහනවා. ඇයි වදේ මෙච්චර හොද රස්සා තියෙද්දේ මොන ලබ්බකට මේ විභාගේ ලියනවද මංදා. ඊලග පාර ඡන්දේ ඉල්ලන්න දාලා ඌව ඡන්දෙන් දින්නවනවා. ඊට පස්සේ බැරියෑ පොරටත් උසස් අධ්‍යාපන ඇමති වෙන්න. නැද්ද මම අහන්නේ. ආන්න ඊට පස්සේ පුලූවන් අර කොපි කරන්න නොදුන්න එකාගේ පඩි අඩු කරන්න. කොච්චර ඉගෙන ගත්තත් මෝටර් බයික් එකෙක් ලෙක්චර්ස් දෙන්න යන කොට අර වෙඩි නොවදින මෙව්වා එකකින් ඇවිල්ලා කොලොප්පම් කරන්න... හූ කියන්න...

මේ කරන කියන දේවල් වෙනුවෙන් මාමා ලබන ආත්මේ තව ටිකක් උස යන්න ඕන. ඉතින් මාමේ මම නවතින්නම්. මාමට තව තවත් අධ්‍යාපනේ කන්න ශක්තිය ලැබෙන්න ඕන. මාමා තව තව කෑගහන්න. තව තව කතා කියන්න. ඔය කක්කා කටින් පිටවෙන වචනයක් වචනයක් ගානේ රටේ මිනිස්සු ඇත්ත තේරුම් ගනීවි. ඔව් පරක්කු වෙලා හරි උන් ඇත්ත තේරුම් ගනීවි. 


මාමට කපිල වස්තු ධාතූන් වහන්සේලාගේ පිහිටයි !!!
මාමාගේ අම්මට දෙවි පිහිටයි (ඒක කැම්පස් වල
කොල්ලෝ කියන්න කියලා කිව්වේ) !!!

**** රත්ගමයා *****

Monday, September 10, 2012

මහත්වරුනි! මේ හෑල්ලු වන්නේ ජාතියේ අනාගතයයි! මේ නිවී යන්නේ ප්‍රඥවේ මහා පහන් සිළුවයි!

මීට දසක හතරකට නැතිනම් පහකට පමණ පෙර යාන්ත්‍රික විද්‍යාව පිළිබඳව ආචාර්ය උපාධිය ලබා පේරාදෙණිය විශ්වවිද්‍යාලයේ ඉංජිනේරු පීඨයට අනුයුක්‌තව සේවය කළ අති දක්‍ෂ තරුණ ඉංජිනේරුවරයකුට ලෝකයේ සුප්‍රකට, එංගලන්තයේ ඇව්රෝ ගුවන් යානා නිෂ්පාදන සමාගමෙන් කැඳවීමක්‌ ලැබිණි. ලංකාවත් එක්‌සත් රාජධානියත් අතර වූ රාජ්‍ය තාන්ත්‍රික සබඳතා හරහා සිදුවූ ඉතා ඉහළ මට්‌ටමේ කැඳවීමක්‌ සේ, මේ පිළිබඳව, අපට සටහන් තැබිය හැක.

නිමිත්ත වූයේ ඒ කාලයේදී 'ඇව්රෝ' ගුවන්යානා නිෂ්පාදනය කරන සමාගම මුහුණදී තිබූ, දැවැන්ත ගැටලුවකට පිළියම් සෙවීමට අන් මඟක්‌ නොමැති වූ කල, එම සමාගමේ බලධාරීහු ශ්‍රී ලංකාව නමැති රම්‍ය දිවයිනේ ජීවත් වූ ප්‍රඥවන්තයකුගේ පිළිසරණ සොයා යැමයි.

මේ ප්‍රඥවන්තයා අන් කවරකු හෝ නොව දැනට, ජීවතුන් අතර සිටින වයෝවෘද්ධතම ඉංජිනේරු මහාචාර්යවරයා වන, පේරාදෙණිය විශ්වවිද්‍යාලයේ ඉංජිනේරු පීඨයේ හිටපු මහාචාර්ය මහාලිංගම් මහතාය. මහනුවර මුල්ගම්පොල ප්‍රදේශයේ ජීවිතයේ සැඳෑ සුවය විවේකීව ගත කරන මහාචාර්ය මහාලිංගම් මහතා එදා එක්‌සත් රාජධානියේ ඇව්රෝ සමාගම වෙත පියාඹා ගියේ ඔවුන් විසින් නිෂ්පාදනය කරනු ලබන ඇව්රෝ ජෙට්‌ යානා ඇන්ජින්වල හටගෙන තිබූ යාන්ත්‍රික දොaෂයකට පිළියම් සෙවීමටය. ලෝකයේ විශිෂ්ටතම යාන්ත්‍රික ඉංජිනේරුවන්ගේ තියුණු පරීක්‍ෂාවට ලක්‌වූයේ නමුදු රෝග නිධානය සෙවීමට අපොහොසත් වූ ඇව්රෝ ජෙට්‌ ඇංජිමේ එන දෙදරීම (VIBRATION) සොයා ගැනීමත්, ඊට ස්‌ථිර පිළියමක්‌ යෙදීමත් එදා අපේ යාන්ත්‍රික ඉංජිනේරු මහාචාර්ය මහාලිංගම් වෙත පැවරී තිබුණ අභියෝගයයි. සුද්දන් විසින් අතහරිනු ලැබ තිබූ මෙම දැවැන්ත අභියෝගය දැඩි ආත්ම විශ්වාසයකින් යුතුව භාර ගත් අපේ මහාචාර්යතුමා, අවසානයේදී ඇව්රෝ සමාගම ම, මවිත කරවමින් ඇව්රෝ ජෙට්‌ ඇංජිමේ දෙදරීම නිට්‌ටාවටම සුවපත් කළේය.

ඇව්රෝ ජෙට්‌ ඇංජින් නිෂ්පාදනය බෙහෙවින් ම අනතුරුදායක අඩියකට වැටී තිබූ අවස්‌ථාවක, මේ ප්‍රඥා සම්පන්න ශ්‍රී ලාංකික ඉංජිනේරුවරයා පෑ දක්‍ෂතාව පිළිබඳව මහත් සේ පැහැදුණු එක්‌සත් රාජධානිය, අපගේ මහාචාර්යතුමාගෙන් අයෑද සිටියේ, එතුමා කැමැති ඕනෑම වරයක්‌ ඉල්ලා සිටින ලෙසය. මේවා අතර, තම රටේ පුරවැසිකම, ඇව්රෝ සමාගමේ ඉහළම තනතුරක්‌, යාන වාහන ඇතුළු සියලු සැප සම්පත්ද එසේ යෝජනා කෙරිණ. එහෙත් අපගේ මේ ශ්‍රේෂ්ඨ මහාචාර්යතුමා ඔවුන්ගෙන් ඉල්ලා සිටියේ, එකම එක දෙයකි. ඒ පේරාදෙණිය විශ්වවිද්‍යාලයේ ඉංජිනේරු පීඨයේ ශිෂ්‍ය ප්‍රජාවගේ ප්‍රයෝජනය පිණිස තමන් හට ඇව්රෝ ජෙට්‌ ඇංජිමක්‌ ලබා දෙන ලෙස. ඉල්ලීම එසැණින්ම ඉටු වූයේ ඉහළම ගෞරවයද සහිතවය. මෙම ලිපිය කියවන ඔබ, ඒ අභිමානනීය පේරාදෙණිය විශ්වවිද්‍යාලයේ, ඉංජිනේරු පීඨයට ගොඩ වැදීමට කිසියම් අවස්‌ථාවක භාග්‍යය ලද හොත්, ඉංජිනේරු පීඨයේ අති දැවැන්ත පෝටිකෝව තුළින්, එහි ආලින්දයට ගොඩ වූ විගසින්ම, ඔබේ නෙතු ගැටෙන්නේ එදා එංගලන්තයේ ඇව්රෝ සමාගමෙන් මහාචාර්ය මහාලිංගම් ට ලැබුණු එකී ජෙට්‌ ඇංජිමයි. එහෙත් මේ යෝධ ජෙට්‌ ඇංජිම පසුබිමේ ඇත්තේ සැබැවින්ම, වර්තමානයේ කිසිවකුට හෝ අදහාගත නොහැකි ආශ්චර්යවත් කතාවකි. ස්‌වාර්ථය ඉදිරියෙන්ද, මාතෘ භූමිය දෙවැනි හා තුන්වැනි ස්‌ථානයේ ද තබමින්, ඕනෑම අශිෂ්ට වැඩක්‌, රුපියල් ශත, ඩොලර්, පවුම්, යුරෝ වෙනුවෙන් ඉටුකිරීමට සැදී පැහැදී සිටින ඊනියා බුද්ධිමතුන් සේම දේශපාලනඥයන් ගෙන්ද කිසිදු අඩුවක්‌ නැති මේ යුගයේ මිනිසුන්ට සැබැවින්ම මේවා සුරංගනා කතා නොවේද? නැතිනම් ඔවුනට අනුව මහාචාර්ය මහාලිංගම් යනු පට්‌ට මෝඩයෙකි.

මහත්වරුනි, අද මේ සිදුවන්නේ කුමක්‌ද? ස්‌වාර්ථය පසෙක ලා අන් අය වෙනුවෙන් හඬ නඟන මේ රටේ විශ්වවිද්‍යාල පද්ධතියේ, ආචාර්ය, මහාචාර්යවරුන් පට්‌ට මෝඩයන් සේ සලකා ඊනියා බලධාරීන් කටයුතු කරන ආකාරය නොවේද?

රටේ අධ්‍යාපනය උදෙසා අයවැයෙන් 6% ක්‌ ඉල්ලා සිටීම වරදක්‌ද? රටකට මෙලෝ වැඩක්‌ නැති එහෙම පිටින්ම සුදු අලියකු බවට පත්වී තිබෙන පළාත් සභා නඩත්තු කිරීමට රටේ ජාතික ධනයෙන් කොපමණ මුදලක්‌ අප වැය කරනවාද? රටක ආණ්‌ඩු නඩත්තු කරන ලෝකයේ ලොකුම ඇමැති මණ්‌ඩලයේ මැති ඇමැතිවරුන්ට පඩි ගෙවන මේ රටේ පොදු මහජනතාවගේ දරුවන්ට, අනාගතයේ උපදින දරුවන්ට, සිය නැණ නුවණ පහදා දීමට, අනාගත ශ්‍රී ලංකාව ප්‍රඥවන්තයන්ගේ දේශයක්‌ කිරීමට, අවශ්‍ය යටිතල පහසුකම් වැඩි දියුණු කරගැනීමට, අනාගත අභියෝගයන් හමුවේ අභිමානවත් දේශයක්‌ ගොඩ නැංවීමට අවශ්‍ය බුද්ධිමතුන් වැඩි වැඩියෙන් බිහිකිරීමට, තව තවත් ජාතික විශ්වවිද්‍යාල අලුතින් බිහිකිරීමට, දේශයේ බදු ගෙවන ජනතාව වෙනුවෙන්, ඔවුන් විසින් රජයට ලබාදුන් මුදලින්ම වාර්ෂිකව 6% ක්‌ රටේ අධ්‍යාපනය උදෙසා වැය කරන සේ ඉල්ලා සිටීම ශාපයක්‌ද? නැතිනම් 'ජාත්‍යන්තර කුමන්ත්‍රණයක්‌ද'?

මේ වන විට මාස දෙකකට වඩා දිග්ගැස්‌සී ඇති විශ්වවිද්‍යාල ආචාර්යවරුන්ගේ වර්ජනය නිසාම රටේ සමස්‌ත විශ්වවිද්‍යාල පද්ධතියම අකර්මණ්‍ය වී තිබේ. පඩි නැතිව අපේ ආචාර්යවරු මහාචාර්යවරු ගෙදරට වී සිටිති. විටෙක අපගේ හදවත් කම්පා කරවමින් ඔවුහු මහ මග සටන් පාඨ පුවරු ඔසවාගෙන ගමන් කරති.

සැබැවින්ම මේ අයුරින් මහ පාරේ රස්‌තියාදු වන්නේ, ශ්‍රී ලංකා මාතාවගේ කීර්ති කදම්භය නොවේද? ඔවුන් අතර මහාචාර්ය මහාලිංගම්ලා කී දෙනකු සිටිත්ද? කියා අපේ බලධාරීන් සිතන්නේ කවදාද? වටහාගන්නේ කවදාද?

පසුගිය දිනෙක ජනමාධ්‍ය ඇමැතිවරයා ඉතා පැහැදිලිවම ප්‍රකාශ කොට තිබුණේ, 6% ඉල්ලීම කිසිලෙසකින් හෝ ඉටු කළ නොහැකි බවය. මේ කියමන අප රටේ නමගිය කාටුන් ශිල්පියකු සිය කාටුනය සඳහා නිමිත්ත කරගෙන තිබුණේ, "අධ්‍යාපනයට 6% ක්‌ වෙන්කරන්න බැරිදැයි ඇසූ පැනයට, බෑ තමයි! බලපන් පහේ ශිෂ්‍යත්වෙ ඉඳලම මහාචාර්යවරයා දක්‌වාම අපට දෙන වදේ. මුං ඉගෙන ගන්න, ඉගෙන ගන්න අපිවමයි කන්නේ" කියාය.

සැබැවින්ම තලංගම ජයසිංහ නමැති කාටුන් ශිල්පියා පොතක්‌ ලියා පළකළ යුතුව තිබූ අදහසක්‌ වචන පේළි දෙක තුනකින් කදිමට කියා තිබුණේ එසේය.

මේ රට, අනාගත ආසියාවේ ආශ්චර්යය බවට පත්කිරීමේ සැබෑ වුවමනාවක්‌ තිබේ නම්, ඒ කොයිකාට නමුත් 6% ක්‌ රටේ අධ්‍යාපනය වෙනුවෙන් වෙන් කිරීමට දෙවරක්‌ සිතිය යුතු නැතැයි සාමාන්‍ය මට්‌ටමේ දැනුම් තේරුම් ඇති අයෙකුට වුවද සිතීම අරුමයක්‌ නොවේ.

අද ඇමෙරිකාවේ නාසා ආයතනය බබළවන්නේද ශ්‍රී ලාංකික තරු බව නොදන්නා කෙනෙක්‌ නැත. එදා සඳට ගිය මුල්ම මිනිසා නීල් ආම්ස්‌ට්‍රොaන් මහ පොළොවට ගෙන ආ සඳේ ගල් කැබැලි මුලින්ම පරීක්‍ෂා කිරීමේ භාග්‍යය ලද ලෝ සුපතළ විද්‍යාඥයන් අතර සිටි එක්‌ විද්වතෙක්‌ වූයේ අපේ විශ්වවිද්‍යාල පද්ධතිය හරහා බිහි වූ ආචාර්ය සිරිල් පොන්නම්පෙරුමයෝය. මෙබඳුම හා මීට නොදෙවැනි මහා ප්‍රඥවන්තයන් අදටත් ඉතා නිහඬවම අපේ විශ්වවිද්‍යාල පද්ධති හරහා තම ජාතික මෙහෙවර ඉටුකරමින් සිටී. මේ අයගේ කාලය, සෑම තත්පරයක්‌ම කෙතරම් වටිනවාද කියා අපේ බලධාරීන් තේරුම් ගන්නේ කවදාද?

පසුගිය ඉරුදින ජාතික පුවත්පතක, දිනෙන් දින දිග්ගැස්‌සෙන මෙම ප්‍රශ්නය අරභයා තම තමන්ගේ මත ඉදිරිපත් කළ ආචාර්ය, මහාචාර්යවරුන් කිහිප පලක්‌ම ඉතා පැහැදිලිව ප්‍රකාශ කොට තිබුණේ පවතින තත්ත්වය තුළ තමන් දැඩි කලකිරීමකට පත් වී සිටින බවය. ලියුම්කරු විශ්වාස කරන ආකාරයට මේ තත්ත්වය බෙහෙවින්ම අනතුරුදායකය. ඒ එසේ වන්නේ දැඩි කලකිරීම හේතුවෙන් අපේ මේ ප්‍රඥවන්තයන් සියදිවි නසා ගනීවිය යන බිය නිසා නොවේ. වැඩි දොහක්‌ නොයාම මේ අය අපේ මාතෘ භූමියට "ඉතිං ආයුබෝවන් ලක්‌ මවුනි ගරු" කියා තමන්ව පාවඩ මතින් කැඳවා ගැනීමට බලා සිටින ලෝකයේ කොහේa හෝ රටකට යැමට ඕනෑ තරම් ඉඩකඩ ඇති නිසාය. ඉන් පසු අපේ බලධාරීන් මෙසේ කියනු ඇත. "මේ බුද්ධි ගලනය නිසා අපිට අපේ රට ආසියාවේ ආශ්චර්යය බවට පත්කිරීම අසීරු වී ඇත. නිදහස්‌ අධ්‍යාපනයේ වරමින් උගතුන් වූ මේ අය ඒ අයුරින් මාතෘභූමිය හැර යැම දේශෙද්‍රdaහී ක්‍රියාවකි".

මේ රටේ උගතුන්ට, බුද්ධිමතුන්ට රට කරවන ඇත්තන් කෙණෙහිලිකම් පෑවේ අද ඊයේ නොව, පෙරදා අතීතයේදී ද මෙබඳු දේ සිදු විය.

එවකට අප දේශයේ සිටි මහා ප්‍රඥවන්තයෙකුට, මේ අයුරින් විඳින්නට සිදු වූ අතවරයන් නිසා, එතුමා මහත් කලකිරීමට පත්ව තම මව්බිම අතහැර දියුණු වෙමින් පැවතුන ආසියාවේ රටක්‌ වන මැලේසියාවට ගියේය. එම රටේ සිටියේ ආසියාවේ අංක එකේ ප්‍රඥවන්ත නායකයෙක්‌ වන ආචාර්ය මහතීර් මොහොමඩ්ය. අපේ බුද්ධිමතාට ලැබුණේ ඉහළම පිළිගැනීමකි. රජයේ ඉදිකිරීම් අංශයේ ඉහළම තැනකි. ඔය අතරවාරයේ ශ්‍රී ලංකාවේ ඉදිකිරීම් අංශයේ බලධාරීන් පිරිසක්‌ එකී රටට යන්නේ ඒ රටින් අපේ රටට නවතම ඉදිකිරීම් තාක්‍ෂණය පිළිබඳව දැනුම ලබා ගැනීම පිණිසය.

මේ පිරිස මුණගැසීමට ගිය එම රටේ ඉදිකිරීම් ක්‍ෂේත්‍රයේ මහා බුද්ධිමතුන් අතර ප්‍රධානියා වූයේ, මෙරටින් එරටට ගිය අපේ කීර්තිධර සිවිල් ඉංජිනේරුවරයාය. එතුමා ලංකාවේ සිටියදී, සිය මාතෘභූමිය හැර දමා අන් රටකට යැමට පාර කැපූ රජයේ ප්‍රබල නිලධාරියෙක්‌ද මෙහෙන් ගිය කණ්‌ඩායමට ඇතුළත්ව සිටියේ සැබැවින්ම දෛවයේ සරදමක්‌ ලෙසිනි.

මෙතෙක්‌ වේලා මා ඔබට කීවේ අපේ ශ්‍රේෂ්ඨ ඉංජිනේරුවරයකු වූ ආචාර්ය කුලසිංහ මහතා පිළිබඳවය. පසුව එතුමා දිවංගත ප්‍රේමදාස ජනාධිපතිතුමාගේ ඇරැයුමෙක්‌ ලංකාවට පැමිණ මියෙන තුරාම අපේ මවුබිමට අනුපමේය මෙහෙවරක්‌ ඉටු කළ බැව් මෙහිලා සිහිපත් කරනුයේ ඉමහත් ගෞරවයෙනි. දැනට පවතින තත්ත්වය හමුවේ හෙට අනිද්දා වන විට, මෙබඳු වටිනා මොළ කොපමණ සංඛ්‍යාවක්‌ අපේ දේශයට අහිමි වේ දැයි කාට නම් කිව හැකිද?

විනිසුරුවන්, වෛද්‍යවරුන් මහමඟ මරාදමන දේශයක, විනිසුරුවන්ට හූ කියන, වෛද්‍යවරුන්ට මහ මඟ පහරදෙන මෙලෝ චාරයක්‌ සදාචාරයක්‌ නැති දේශපාලන අම්බරුවන්ගේ පාරාදීසයක තවදුරටත්, වෘත්තීය ගරුත්වය රැකෙන සේ රැකියාවක නිරත වීමේ ස්‌වෛරී අයිතිය දිනෙන් දිනම දුරස්‌ වන රටකට තව දුරටත් අපේ සේවය දිය යුතුද? යන පැනය හමුවේ මේ බුද්ධිමතුන් අසරණ නොකළ යුතුය. මේ වටිනා මිනිසුන් පාරවල් දිගේ ඇවිද්දවමින් හෑල්ලු කරනවාට වඩා, ශීලාචාර මහත්වරුන් සේ වඩාත් නම්‍යශීලීව ඔවුන්ගේ ප්‍රශ්න සාකච්ඡා මේසයට රැගෙන ඒමට, ඵලදායී මෙහෙවරක්‌ ඉටු කිරීමට මේ සා දිගු කලක්‌ ගතවී තිබියදී පවා අපේ කිසිම රාජ්‍ය නිලධාරියකුට හෝ දේශපාලන බලධාරියකුට හෝ නොහැකි වීම ජාතියේම අවාසනාවකි.

පැවැත්වූ සෑම සාකච්ඡාවක්‌ම අසාර්ථක වූයේ මන්ද කියා මධ්‍යස්‌ථව සිතා බැලීම මේ අයගේ වගකීමකි. බලය වෙනුවට සුහදතාව, හදවතේ මුල්බැසගත් කුහකකම වෙනුවට මෛත්‍රී සහගත සිතක්‌ රැගෙන මේ දෙපාර්ශ්වයම රටේ දරුවන්ගේ අනාගතය වෙනුවෙන් කඩිනමින් සාකච්ඡා ඇරැඹිය යුතුය. එකිනෙකාගේ බුද්ධියට ගරුකරමින් ප්‍රශ්නයට විසඳුම් සෙවිය යුතුය.

අනාගත ශ්‍රී ලංකාවට සෞභාග්‍යය උදාකරදීමේ, මාවත වැටී ඇති නැනෝ තාක්‍ෂණවේදය සේම, බල ශක්‌ති අර්බුදයට අනාගත විසඳුමක්‌ වන සූර්ය බල ශක්‌තියෙන් විද්යුතය නිපදවීමේ ද, සුපිරි විද්‍යාඥයන් සිටින්නේ අප සමඟය. පේරාදෙණිය විශ්වවිද්‍යාලයේ ඉංජිනේරු පීඨයේ විදුලි හා විදුලි ඉලෙක්‌ට්‍රොනික ඉංජිනේරු දෙපාර්තමේන්තුවේ ආචාර්ය ලිලන්ත සමරනායක වැනි, නැනෝ තාක්‍ෂණය පිළිබඳ දකුණු ආසියාවේ සිටින අංක එකේ සුපිරි උගතුන් සේම, සූර්ය බල ශක්‌තිය තුළින් විදුලි බලය නිපදවීමේ ක්‍රමවේදයන් ඉහළින්ම ප්‍රගුණකොට ඇති මහාචාර්ය කිත්සිරි ලියනගේ වැනි උගතුන්ද සිටින්නේ තවමත් අපේ විශ්වවිද්‍යාල පද්ධති තුළය. ලෝකයේ ධනවත් රටවලින් නිරතුරුවම, මෙබඳු විද්වතුන් හට ආරාධනා ලැබෙන්නේ, සියලුම යස ඉසුරු සපිරි ජීවිතයක්‌ සඳහාය. මෙබඳු වටිනා මිනිසුන් තවමත් මේ දේශයේ රැඳී සිටින්නේ සැබැවින්ම ඔවුන් අපේ මාතෘ භූමියට ආදරේ කරන නිසාය. මේ රටේ බදු ගෙවන ජනතාවගේ දුවා දරුවන්ට ආදරේ කරන නිසාය. එහෙත් අපේ අධ්‍යාපන බලධාරීන් කරන්නේ කුමක්‌ද? මේ සියලු විදග්ධයන් දෙකේ කොලයට දමා වටේ යෑවීමය. සමච්චලයට හෑල්ලුවට ලක්‌ කරමින් මහ පාරේ රස්‌තියාදු කිරීමය. විශ්වවිද්‍යාල වසා දමා පඩි රහිතව ගෙදර තැබීමය.

සැබැවින්ම මේ අශෝභන ක්‍රියාදාමය තුළින් බලධාරීන්ට අවශ්‍ය වන්නේ අපේ උගතුන් හා බුද්ධිමතුන් මේ දේශයෙන් පලවා හැර දමා විශ්වවිද්‍යාල පද්ධතියම නන්නත්තාර කොට, පෞද්ගලික විශ්වවිද්‍යාල සඳහා හතර අතේ, ප්‍රවේශ මාර්ග සලසා දීමට නම්, ඔවුන්ගේ ඒ බලාපොරොත්තු දිනෙන් දිනම කූටප්‍රාප්තියට පත්වන බව නම්, අපට ඉඳුරාම පැහැදිළිය.

රාමායනයේ අයෝධ්‍යා කාණ්‌ඩයේ 63.7 හී මෙසේ සටහන් වේ.

"යම් ක්‍රියාවක්‌ කිරීම ආරම්භයේදී ම, එහි බරපතළ බව හෝ සැහැල්ලු බව හෝ යමෙක්‌ නොදනීද, එසේම එහි ගුණ හෝ දොස්‌ හෝ යමෙක්‌ නොදනීද හේ අඥනයෙකැයි කියනු ලැබේ".


ජයන්ත විජේසිංහ
උපුටා ගැනීම - divaina

නැගිටපල්ලා නැගිටපල්ලා නුඔලගේ කාලය ඇවිල්ලා...


කුසට සාගිනි හදට සෝගිනි ගතට වැරහැලි කැබළි අල්ලා
සතුට සාමය අයිමි කරලූ අඳුර දිනු කාලය ඇවිල්ලා
නොසිට මැරි මැරි සතුරු පායට වකුටු වී අතපය හකුල්ලා
නැගිටපල්ලා නැගිටපල්ලා නුඔලගේ කාලය ඇවිල්ලා


ඉතින් නුඹ වෙඩි තියාපන්...

අපි යන්නේ,
අපේ සිසු විරුවන් ගමන් ගත් මාර්ගයේමය...
ඔවුන් දිවි පිදු මාර්ගයේමය...
එකා පිට එකා මරා දැම්මත්,
නිදහස් අධ්‍යාපනය වෙනුවෙන්,
පෙරට එන්නට අපි මැලි නොවෙමු...
මක් නිසාද යත්,
නිදහස් අධ්‍යාපනය සුරැකීම අප සතු යුතුකමක් නොව,
අප උර මත වූ,
වගකීමක් වන නිසාවෙනි...


 මූ‍ලාශ්‍ර - E F S U Ruhuna

උසස් අධ්‍යාපන ඇමතිතුමා වෙත ලියමි

දැන් කැම්පස් වල කොල්ලො කෙල්ලෝ රටේ නොදන්නා තැනක් නොදන්නා පාරක් නැති ගාණය. ඒ තරමට මුන් චාරිකා ගොස් ඇත. ඒ වෙන කවුරු නිසා වත් නොව ඔබ තුමාට පිං සිද්ධ වෙන්නටය. රටේ උගතුන් යයි කියන්නට පිරිසක් දැන් නැත. එහෙම කියන්නට හිටපු උන් ටික දැන් පාරවල් ගාණේ මඩ වතුර, කඳුලු ගෑස් සුව ලබති. නමුත් ඔබතුමාගේ පෞද්ගලික කඩ වලින් පිටවන හරක් පට්ටියටද උගතුන්යයි කීමට තරම් ජනතාව ගොන්නු නොවෙති.
 

ශිෂ්‍ය ව්‍යාපාර වලට ජෙප්පෝ යයි ඒ දවස් වල කියූ ඇතැමුන් අද අපි දිරිමත් කරන්නට අත්වැල් බැඳ හමාරය.එය දිනෙන් දින ශක්තිමත් වන්නක් විනා ආණ්ඩුවේ බලපෑම් හමුවේ දුර්වල වෙන කෝටුකිතයියෙකු නොවේ...

ඒ නිසා දැන්වත් පරාජය භාරගෙන සිසු ඉල්ලීම් දෙනවා නම් හොඳය. නැත්නම් ඉදිරියේ දී දොට්ට පිලට බහින්නත් ආරක්ෂකයෝ 50-60 ක් වත් ගෙන්නන්න වෙයි.ඒකත් ටික දවසකට...
Gamage

Sunday, September 9, 2012

෴ නිදහස් අධ්‍යාපනයේ නව පණ ලබන කල...අත් ඔසවමු..෴

නිදහස් අධ්‍යාපනය වලදමන්නට තනන සැමවිටම එය මිනිස් අයිතියක් ලෙස පෙන්වා කෑගැසුවෙමු,තවත් විටම එය අනාගත උරුමයක් බව කියා මොර ගැසුවෙමු, තවත් විටක එය නූතන දරුවාගේ එකම ගැලවුම්කරුවා ලෙස සලකා පාරට බැස්සෙමු..කෙසේ හෝ එය හදවත මෙන් රැකගත්තෙමු. එහෙත් නැවතත් එය මරා දමන්නට අධ්‍යාපන පාලකයින් දැන් දැන් කටයුතු කරමින් සිටීම නිදහස් අධ්‍යාපනයේ දරුවන්ගේ ලේ කකියන කරුණක් වීම පුදුමයක් නොවේ.

මේ නිදහස් අධ්‍යාපනය කාගේ හෝ බූදලයක් හේ වස්තුවක් නොව එය මෙරට සමස්ත දරු පරපුර සතු හිමිකමකි. එම හිමිකම බඩවියත උදෙසා හෝ කැසිනෝ,කල්බ් සහ ගණිකාවන් වෙනුවෙන් ලක්ෂ ගණන් වියදම් කරන කබාසිනියාකාර දරුවන් හිමි අධ්‍යාපන ලොක්කන්ගේ සාක්කු බර කරමින් අවසන නිදහස් අධ්‍යාපනයේ දරුවන් පාරට ඇද දැමීමට උත්සහ කරනවානම් කරබාගෙන පසෙකට වී සිටීම මහත් නිවටකමකි.එයට පෑනෙන්,අකුරෙන්,නිර්මාණයෙන්,හඬින් සහ ශක්තියෙන් දායකත්වය දෙන්නෝ නිසැකවම නිදහස් අධ්‍යාපනයේ සුජාත දරුවන් බව කිව යුතුමය.

මේ නිදහස් අධ්‍යාපනය වනසා දැමීමට දත කන නිවටයින් නොදන්නා කරුණ නම් මෙරට ශිෂ්‍ය ව‍්‍යාපාරය හා පොදු ජන මතය අවදිවූ කල්හිදී ඕනෑම බලවේගයක් පාගා පොඩිකර දැමිය හැකි මහා සවියක් ඔවුන් සතු බවයි. එය නොදැන නිදැල්ලේ බයිලා ගසමින් අධ්‍යාපනයේ සිව්කොන් කා දමන නිවට අධ්‍යාපන බලධාරීන්ගේ බිහිරි හා හුඹස් බැඳි කන් වලට ඇසෙන්නට මහ හඬ නංවන්නට අපට සිදුවී ඇත. එසේම පාට,පක්ෂ හා සල්ලි කොලවලින් වැසීගිය දෙනෙත් වලට සටන් පාඨ පෙන්වා පෙනීම ලබාදෙන්නට සිදුවී ඇත. එය සිදුකිරීමට මහා සවියක් අවශ්‍යව ඇත.

කන්නන්ගර ශ්‍රීමතාණන් නිදහස් අධ්‍යාපන පනත මන්ත්‍රණ සභාවට ගෙන එද්දී “මේකෙන් වෙන්නේ ගහකට නග්ගන්න කොල්ලෙක් නැතිවෙන එක“ යයි කියා මන්ත්‍රණ සභාවෙන් පිටවි ගිය මහා නායකයන් මෙන්ම “දැයේ දරුවන්ගේ අනාගතය සුරක්ෂිත කරනවා“ යයි පපුවට ගසා ගනිමින් කෑගසූ නායකයන්ද ජීවත්වූ සහ ජීවත්වන රටක අධ්‍යාපනයට මෙවන් තත්වයක් උදාවීම පුදුමයක් නොවනවා මෙන්ම විටක මහා පුදුමයකි.

නුදුරු දිනකදී නිදහස් අධ්‍යාපනයේ මහා පුරුෂයා නැවතත් නැගී සිටිනු නියතය. ඔහු අධ්‍යාපනය නැමති වෘක්ෂය සිල්ලරට කපා දමන්නට හදන අමනයින්ට කස පහර දීමට ඉදිරියට යනු ඇත. අවැසි වන්නේ ඒ මහා පුරුෂයාගේ පසු පසින් සිට එයට දෑතම දිගුකරමින් ශක්තියක් වන්නා වූ සිරිලක් නිදහස් අදියුමේ සුජාත දරුවන්ය.එයට සූදානම් වීමට ඔබට සිදුවනු නොඅනුමානය.

- ජනරඟ විජඉඳු දේවසුරේන්ද්‍ර|Janaranga Wijaindu Dewasurendra -

කිසිඳු බලවේගයකට අප යටත්වන්නේ නැහැ - FUTA

රටේ සමස්ත අධ්‍යපනය වෙනුවෙන් ගෙන යන මෙම අරගලය ජයග්‍රණයෙන් කෙලවර කනවා මිස කිසිසේත් යටත් වීමට සූදානම් නැතැයි විශ්වවිද්‍යාල ආචාර්ය සමිති සම්මේලනයේ සභාපති ආචාර්ය නිර්මාල් රංජිත් දේවසිරි මහතා පැවැසීය.

ඊයේ (7) කොළඹ ජාතික පුස්‌තකාල හා ප්‍රලේඛන සේවා මණ්‌ඩලයේ පැවැති මාධ්‍ය හමුවේදී ඔහු මේ බව පැවැසීය. තම සාධාරණ ඉල්ලීම් දිනා නොගෙන ආපසු හැරීමට හැකියාවක්‌ නැතැයි ද පිළිගත හැකි එකඟතාවකින් තොරව කිසිදු හේතුවක්‌ මත සිය වැඩවර්ජනය අත් නොහරින බව ඔහු එහිදී අවධාරණය කළේය.

සිය ඉල්ලීම්වලට විසඳුම් නොදෙන්නේ තමන්ගේ අභිමානයට ගැටලුවක්‌ වේ යෑයි ආණ්‌ඩුව සිතන නිසා විය හැකි බවත් තමන්ගේ හිසට උඩින් මැස්‌සෙක්‌ ඉගිළෙනවාටත් අකැමැති පිරිස්‌ ආණ්‌ඩුවේ සිටින බවත් කී සභාපතිවරයා ආචාර්යවරුන්ට වැටුප් නොමැතිව දිගු කාලයක්‌ වර්ජනයේ යෙදිය නොහැකිය යන උපකල්පනයත් විසඳුම් ලබා නොදීමට හේතුවක්‌ විය හැකි යෑයිද සඳහන් කළේය. තමන් මෙම අරගලය ආරම්භ කළේම ඒ සියලු කාරණා හොඳින් අවබෝධ කරගෙන යැයිද ඒ මහා වැඩිදුරටත් පැවසීය.


Saturday, September 8, 2012

පුතේ......

අතේ මිල මුදල් ගැවසෙන හින්දා නෙමෙයි පුතේ
හිතේ දහිරියෙන් ඉගෙනුම දුන්නෙ නුඹට පුතේ
ගතේ දුබලකම දැන් නම් නෙතේ ඇදෙයි පුතේ
රටේ උගතු වෙන්න උඹට පිං මදි වෙයි පුතේ

කුසේ දරන් හැදුවා මදි හින්දා නුඹව පුතේ

රටින් පිටට යවනු මුදල් නැති හින්දයි පුතේ
ගොසින් ඉගෙන ගෙන එන දා බලන්න මයෙ පුතේ
ඉන්න එකක් නැහැ මා නෙතු පියවෙයි මයෙ පුතේ......

රැක ගන්න නිදහස් ඉගෙනුම...

සිය ගනනක් දිවි පුදා
දහස් ගනනක් ලේ හලා
උගුර ලේ රස වන තුරුද
අත පය කඩා දමන තුරුද
මරනය පෙනි
පෙනිදනුඹලාට රැක දුන්
නිදහස් ඉගෙනුම
අද කෑලි කපා විකුනන තුරු
ඇයි උඹලා නිහඩව
හැර බලන්න නුඹෙ ඇස්
නුඹලාට පෙනේවි
විවර කර බලන්න නුඹෙ සවන්
නුඹලාට ඇසේවි
ඔවුන්ගෙ හඩ ඔවුන්ගෙ සටන
ඔව් නුඹලට පෙනෙවි ඔවුන් නුඹලාට
අසීමිතව ආදරය කල බව 
එකවන්න ඔවුන්ගෙ සටනට
ඔවුන් වෙනුවෙන්ල නුඹලා වෙනුවෙන්
නුඹලගෙ දරුවන් වෙනුවෙන්
රැක ගන්න නිදහස් ඉගෙනුම
නැතිනම් ඔවුන් නුඹලාට දොස් පවරාවි
මෑනියන් විකුනන තුරු 
බියගුලුව සැගවුන්
නිවටයන් කියා

සරසවි වසා තිබියදී රුහුණු ඉංජිනේරු සිසුන් රෝහලක් ප්‍රති සංස්කරණය කරයි

මේ ඔවුන් අප වෙත එවා තිබූ සටහනයි.

වර්තමානයේ සිට අනාගතය දක්වා දිවෙන්නා වූ පාලමක් වේ නම් එම පාලමේ අත්තිවාරම සැකසෙන්
නේ විශ්වවිද්‍යාල වල අධ්‍යාපනය හදාරන සුවහසක් විද්‍යාර්ථීන්ගේ දෑතෙනි. මෙය අතිශෝක්තියක් නොවන්නේ එයට සාක්ෂි ඕනෑ තරම් මෙරට විශ්වවිද්‍යාල ආරම්භ වූ දා සිට අද දක්වා ඇති බැවිනි. නමුත් වර්තමානයේ විශ්වවිද්‍යාල සිසුන්ට සමාජය විසින් ලබා දෙන අර්ථකථනය කුමක් ද ? මෙය සලකා බැලීම වටී.

මෙම අර්ථ දැක්වීම යථාර්ථයක් බවට පත් කිරීමට රුහුණු විශ්වවිද්‍යාලයේ ඉංජිනේරු පීඨයේ දෙවන වසර සිසුන් වන අප උත්සහ කරන්නේ අප විශ්වවිද්‍යාලයට ඇතුලත් වී වසර දෙකක් පිරීම නිමිත්තෙන් හබරාදුව ප්‍රදේශ‍යේ දුෂ්කර රෝහලක අබලන්ව අත්හැර දැමු වාට්ටුවක් ප්‍රති සංස්කරණය කිරීමෙනි. පළමු වසර අවසානයේ ගිංතොට ධර්මපාල විදුහල ප්‍රති සංස්කරණය ලා අති මහත් දායකත්වයක් දැක්වූ අප ශිෂ්‍ය කණ්ඩායමේ මෙවර අවධානය යොමු වුයේ හබරාදුව ප්‍රදේශ‍යේ දුෂ්කර රෝහලකට ය . ගම් වැසියන් දිනපතා ප්‍රතිකාර ගැනීමට පැමිණෙන මෙම රෝහල වග කිව යුතු කිසිවකුගේ අවධානය යොමු නොවී ඉතා දීර්ඝ කාලයක් අබලන් තත්වයේ පැවතුන වාට්ටුව පිළිසකර කර දෙන මෙන් එම රෝහලේ අධ්‍යක්ෂක තුමා කල ඉල්ලීමට අනුව 2012 අගෝස්තු මස 22 වැනිදා බ්‍රහස්පතින්දා දින අප ශිෂ්‍ය කණ්ඩායමේ සහෝදර සහෝදරියන් ප්‍රති සංස්කරණ වැඩ කටයුතු ආරම්භ කරන ලදී.

කඩතොළු වී ජරාජීර්ණ වී ගිය වාට්ටුවේ බිත්ති පිළිසකර කර තීන්ත අලේප කෙරුනේ අපගේම දෑත් වලිනි. මීට අමතරව එම වාට්ටුවේ තිබු අබලන් ඇඳන්, කබඩ්, විදුලි පංකා ආදී සියල්ල අලුත්වැඩියා කොට තීන්ත ආලේප කොට අංග සම්පුර්ණ වාට්ටුවක් බවට පත් කළෙමු. 2012 අගෝස්තු මස 25 වැනිදා සෙනසුරාදා දින අප සහෝදර සහෝදරියන් එම වාට්ටුවේ වැඩ කටයුතු සියල්ල අවසන් කරන් විට ගම් වැසියන්ගේ හා රෝහල් කාර්ය මණ්ඩලයේ ඉමහත් පැසසුමට ලක්ව තිබුණි . අබලන්ව ජරාජීර්ණ වී ගිය වාට්ටුව ප්‍රති සංස්කරණය කොට නැවත භාවිතා ගැනීමට හැකි වන් පරිදි රෝහල් කාර්ය මණ්ඩලයට‍ භාර කෙරුනේ විශ්වවිද්‍යාල ශිෂ්‍යාගේ සැබෑ යථාර්ථවාදීත්වය ඔවුන්ට‍ පසක් කර දෙමිනි.

මේ සදහා අවශ්‍ය ප්‍රතිපාදන සැපවූයේ අප ශිෂ්‍ය කණ්ඩායමේ සොයුර සොයුරි වන අතර වැය වූ සම්පුර්ණ ද්‍රව්‍ය සදහා වැය මුදල රු 30,000 පමණ වුවත් ශ්‍රම දායකත්වය හා සමග සලකා බලන කල එය මුදලින් මිල කල නොහැකි බව සියල්ලන්ගේම අදහස විය. දින සතරක් වැනි කෙටි කාලයක් තුල සාර්ථකව නිමා කල හැකි වූ අපගේ කර්ත්‍යවයේ අවසන් දිනයේදීය අප සහෝදර සහෝදරියන්ගේ නෙතඟට කඳුළු පැන නැගුනේ දෑතින් පිළිසකරවූ වාට්ටුව තුල තවත් බොහෝ කාලයක් සුවපත් වන රෝගීන් සිහියට නැගීමෙනි. 

විශ්වවිද්‍යාල තුල අනෙකුත් පීඨ මගිනුත් මෙවැනි තවත් බොහෝ ක්‍රියාකාරකම් සිදු කරන මුත් විවිධ බලපෑම් මගින් ඒවා සමාජ ගත වීම වලක් වනු ලබන හෙයින් එම කිසිවක ගෞරවය විශ්වවිද්‍යාල සිසුවාට නොලැබේ. එහෙයින් අප විසින් මල්ඵල ගන්වනු ලැබූ මේ සාර්ථක ව්‍යායමය සමාජය තුල විශ්වවිද්‍යාල සිසුවා කෙරේ පවතින විවිධ දුර්මත දුරු කර හැරීමට මහත් රුකුලක් වන බව අප තරයේ විශ්වාස කරමු. අවසන් වශයෙන් අපගේ මෙම ව්‍යායමය සාර්ථක කර ගැනීමට අනෙකවිධ බාධා කම්කටොලු මැද මුදල්මය හා ශ්‍රම දායකත්වය සැපයූ රුහුණු විශ්වවිද්‍යාලයේ දෙවන වසර සහෝදරත්වයට හද පිරී ස්තුතිය පුද කිරීමට කැමැත්තෙමු. එමෙන්ම අප සමඟ නිරතුරු රැඳුණු රුහුණු විශ්වවිද්‍යාලයේ ඉංජිනේරු පීඨ ශිෂ්‍ය සංගමයට හා ජේෂ්ඨ සහෝදරත්වයට අප ගෞරවනීය ස්තුතිය පුද කර සිටිමු.

චේ ලියයි....

මතක තබාගන්න, අරගලයේ බොහෝ වර්ෂයන් එළඹෙන්නට නියමිත ඉදිරියටයි. ඔබ වැඩුණු ගැහැණියක වූ පසු, ඔබට ද අරගලය වෙනුවෙන් වූ ඔබේ කොටස ඉටු කරන්නට සිදු වෙනු ඇත. එතෙක් සූදානම් වන්න! ඔබේ වයසේ දී විප්ලවකාරී වීම යනු, හැකි තරම් හොඳින් ඉගෙන ගැනීමත් සාධාරණය වෙනුවෙන් පෙනී සිටීමත් ය.


ඔබ නිතරම පාසැලේ හොඳම ළමුන් අතර රැඳීමට වෑයම් කළ යුතුයි. අධ්‍යාපන කටයුතු වලින් මෙන්ම විප්ලවීය ආකල්ප අතිනුත් ඔබ "හොඳම" දරුවෙකු විය යුතුයි. වෙනත් වචන වලින් කියනවා නම්, යහපත් හැසිරීමෙන්- විප්ලවය කෙරෙහි වූ ආදරයෙන් - සහෝදරත්වයෙන් ඔබ "හොඳම" විය යුතුයි. මා දරුවෙකු කාලයේ මට එසේ වන්නට නොහැකි වූවා; අප ජීවත් වූයේ මිනිසා මිනිසාගේම සතුරෙකු වූ වෙනස් සමාජයකයි. දැන් ඔබ වෙනත් යුගයක ජීවත් වීමේ වරප්‍රසාදය ලබා තිබෙනවා. ඉන් ඵළ නෙලා ගැනීම ඔබේ වගකීමයි.

[1966 පෙබරවාරි 15 දා චේ සිය දියණිය හිල්දිතාට ඇගේ දහ වැනි උපන්දිනය දා යැවූ ලිපියෙන්.]

Thursday, September 6, 2012

SB, බන්දුල ගෙදර යවමු...?

මේ දවස් වල අපේ සටන් පාඨය වෙලා තියෙන්නේ මේක නේද? නමුත් එතනින් එහා ගිය දෙයක් ගැන සමාජයට කියන්න වෙන බව අපට හිතුනා.. ඇත්තටම මේ දෙන්න ගියාම මේ ප්‍රශ්නේ විසඳෙයි ද? ගොඩාක් අය හිතාගෙන ඉන්නේ මේ රට කන්නේ ඇමති මණ්ඩලය විතරයි කියල නේ. අපේ ඇති ගරු ජනාධිපතිතුමා මේවා කිසි දෙයක් ගැන දන්නේ නෑ කියල. සමහරු කියනවා එතුමා දන්නවා නම් විශ්වවිද්‍යාල සිසුන්ට අර දෙන්න කරන කෙනෙහිලි කම්, උන්ව මරල දාවය කියල.. ඒත් ඇත්ත එක නෙවෙයි කියන එක අපි තේරුම් ගන්න ඕන..

නිදහස් අධ්‍යාපනය වෙනුවෙන් සටන් කරන, වත්මන් විශ්වවිද්‍යාල සිසුවෙක් අනාගතේ දවසක උසස් අධ්‍යාපන ඇමති උනොත්, අපි හිතනවා ඔහු නිදහස් අධ්‍යාපන අයිතිය සුරක්ෂිත කරාවිය කියල. එහෙම බැලුවම SB මහත්තයත් ඔය හරිය කරන්න එපැයි. එතුමාගේ අතීතය අපි දන්නවනේ. ඒත් එතුමත් එහෙම නොකරන්නේ, එතුමාට තව කෙනෙක් ගේ අණක් ක්‍රියාත්මක කරන්න සිද්ද වෙලා තියෙන නිසා. එතකොට නියම වැරදි කාරයා අණ දෙන මිනිහ මිසක් ක්‍රියාත්මක කරන මිනිහ නෙවෙයි. එහෙමයි කියල අපි SB මහත්තයව සුද්ධ කරන්න ඕන නෑ. එයත් වැරදියි. හැබැයි එයාගේ පිටින් අධ්‍යාපනය වැනසීමේ කුණු හෝදගෙන, පිවිතුරුව ඉන්න හදන, හැබෑ වැරදි කාරයව අඳුරගන්න අපි සමාජයට ඉඩ තියන්න ඕන. එහෙම නැතුව SB, බන්දුල ගෙදර යවල විතරක් මේ ප්‍රශ්නේ විසඳන්න බෑ. එහෙම උනොත් වෙන්නේ, මේ තනතුරු දෙකට පත්වෙන ඊළඟ දෙන්න මීටත් වඩා සරුවට කන්න පටන් ගනීවි..

ඒ නිසා, "SB, බන්දුල ගෙදර යවමු..!!" කියන සටන් පාඨයට තවත් එකතුවෙන්න තියෙනවා නේද?