FUTA නිසා, "හුටා" යැයි කියැවෙන්නට ඕනෑ නැත.

දින 100 කට ආසන්න සිය වෘත්තීය අරගලය අවසන් බව FUTA පසුගිය බ්‍රහස්පතින්දා දැන්වීය. මෑතකාලීන ඉතිහාසයේ සම්ප්‍රදායික වෘත්තීය අරගල ක්‍රියාවලියෙන් ඔබ්බට ගිය FUTA වෘත්තීය අරගලය, සිවිල් ක්‍රියාකාරීන්, සිවිල් සංවිධාන, විවිධ මතධාරී දේශපාලකයන්, දේශපාලන පක්ෂ, ආදී එකී මෙකී නොකී සියලු පාර්ශවයන් සිය අරගලයට එකතු කරගනිමින්, වචනයේ පරිසමාප්ත අර්ථයෙන්ම මහජන ව්‍යාපාරයක් බවට පත්වෙමින්, පසු ගිය කාලය තුල සමාජය හෙල්ලූ මාතෘකාව බවට පත් විය. කෙසේ නමුත් දීර්ඝ කාලීන සකච්ඡාවලියකින් පසුව මෙරට ජන සමාජයට හරි හැටි පැහැදිලි චිත්‍රයක් ලබා නොදුන්, රජය සමග වූ එකඟතාවන් සමග එම වෘත්තීය සටන අවසන් විය.
 

මේ මොහොත වන විට සමාජය තුල, FUTA රජය සමග ඇතිකරගත් එකඟතා ගැන විවිධ අර්ථකතන තිබේ. ඇතැමුන්ට අනුව එම එකඟතා සාධනීය, බලාපොරොත්තු තැබිය හැකි ඒවා වන අතර, ඇතැමුන්ට අනුව ඒවා අනන්ත අප්‍රමාණ කැපවීම් කල වෘත්තීය අරගලය පවා දුන් බවට සාක්ෂිය. කෙසේ වුවත් අපට මෙම මොහොතේ ගැටළුවක් පැන නගී. එනම්, සාධනීය වේවා නිශේධනීය වේවා, මෙම අරගලය මෙරට ජන සමාජයට ලබාදුන් එකම දෙය මෙම ඉල්ලීම් පමණක්ද යන්නයි. අපට අනුවනම් පිළිතුර නැත යන්නයි.

FUTA වෘත්තීය අරගලය, සන්නද්ධ නොවන ජන අරගල වල ශක්තිය සම්බන්ධයෙන් මෑත ඉතිහාසය තුල ප්‍රයෝගිකව දුන් දැවැන්තම සහතිකය මෙරට ජන සමාජයට ලබා දුන්නේය. ජනතා අරගල නොව, මැතිවරණ ක්‍රමය තුල ජනතා පරමාධිපත්‍යයේ ශක්තිය ගැන පවා මිත්‍යාවන්ගෙන් දෑස් වසා ගෙන සිටි ජනතාවගේ දෑස් විවර කරවා, ජනතාවට ජනතාවගේ තරම පෙන්වීමට මෙම අරගලයට හැකි විය. එපමණක් නොව රටක උගතුන්ගේ බුද්ධිමතුන්ගේ කාර්යයභාරය වෘත්තීමය ක්‍රියාකාරීත්වයෙන් එහා ගිය, දේශපාලනික කේවල්කිරීම් හරහා රටක් සාධනීය වෙනස්කම් දෙසට යොමු කරවීම තෙක් දිවෙන බවට සංවාදයක්, මතයක් සමාජය තුල ගොඩ නැගීමටද මෙම අරගලය හරහා FUTA සමත් විය. වෘත්තීය අරගල හුදු වැටුප් සීමාව තුල සිර නොකොට, සිය ක්‍රියාකාරී ක්ෂේත්‍රයේ දේශපාලනික කොටස ගුණාත්මක කිරීම හරහා පුළුල් සමාජීය කාර්යය භාරයක් සිදු කිරීමට භාවිත කල හැකිය යන සංකල්පය සමාජ ගත කල FUTA , වෘත්තීමය අභිමානයේ බලය මෙන්ම , මෙරට තුල, වර්තමාන පාක්ෂික දේශපාලනය, දේශපාලනයේ එකම තීරණාත්මක බලවේගය නොවන බවද මනාව පෙන්වීය.

එම නිසා එකඟතා කුමන ඒවා වුවද, FUTA නිසා ඔබට "හුටා" යැයි කියැවෙන්නට ඔනෑ නැත. මන්ද FUTA සිය අරගලය හරහා, ඔබ වෙනුවෙන්, මෙරට ජන සමාජයට බොහෝ දේ තිලිණ කර ඇති බැවිනි...

පංකජ මිනුෂ ජයවික්‍රම.

Posted in: Articles,Stories