නීති විද්‍යාල ප‍්‍රවේශ විභාගයේ අක‍්‍රමිතා වහා නිවැරදි කරන ලෙස සමාජවාදී තරුණ සංගමය බලකර සිටී. එම සංගමය මගින් නිවේදනයක් නිකුත් කරමින් මේ බව පවසා ඇති අතර එම සම්පූර්ණ නිවේදනය පහත පළවේ.
‘‘නීති විද්‍යාල ප‍්‍රවේශ විභාගයේ 2012 වර්ෂයේ ප‍්‍රතිඵල පිළිබඳ ඇතිවී තිබෙන ගැටලුව මේ වනවිටද විසඳී නැත. විභාගයට මුහුණ දුන් සිසුන් විභාගයේ බැලූබැල්මටම පෙණෙන අක‍්‍රමිකතා පිළිබඳව සතියකට ආසන්න කාලයක් තිස්සේ උද්ඝෝෂණයේ යෙදෙන අතර විභාග දෙපාර්තමේන්තුව, නීති විද්‍යාලය, ඇතුළු රජයේ බලධාරින් අඳ, ගොළු, බිහිරන් සේ සිටින ප‍්‍රතිපත්තියකට මාරු වී තිබේ. නීති විද්‍යාල ප‍්‍රවේශ විභාගයේ දස වසරක ප‍්‍රතිඵල දෙස බැලූවිට 2011 සහ 2012 වර්ෂවල ද්‍රවිඩ මාධ්‍ය සිසුන්ගේ අසාමාන්‍ය වර්ධනයක් පෙන්නුම් කෙරෙන බව පැහැදිලිය. අප රටේද ලෝකයේ වෙනත් රටවල ද මෙවැනි විභාග ප‍්‍රතිඵලවල ප‍්‍රමාණාත්මක වර්ධනයන් පරීක්‍ෂා කළ බැලූ විට වර්ෂ දෙකක් ඇතුළතදී මෙවන් අසාමාන්‍ය වර්ධනයක් ඇතිවීම අස්වභාවිකය. මේ අනුව නිතී විද්‍යාල ප‍්‍රවේශ විභාගයේ මෙම සැකසහිත ස්වභාවය පිළිබඳ ශිෂ්‍යන් ඉදිරිපත් කරන කාරණය ඉතා තර්කානූකුලය. ඒ අනුව නීති විද්‍යාල බලධාරිනුත් විභාග දෙපාර්තමේන්තුවත්, ආණ්ඩුවත් කළ යුත්තේ කසාය බිවු ගොලූවන් සේ සිටීම නොව, වහාම ක‍්‍රියාත්මක වී මෙම විභාගය පිළිබඳ සාධාරණ හා අපක්‍ෂපාති පරීක්‍ෂණයක් කඩිනම්ව පැවැත්වීමයි. එසේ පරීක්‍ෂණයක් කඩිනම්ව පවත්වා වරද හඳුනා ගන්නා ලෙසත්, වරද පිළිගන්නා ලෙසත් ඉන් පසුව වරද නිවැරදි කිරීම හා වරදට දායක වූ අයට නීත්‍යානුකූලව කටයුතු කිරීමත් කරන ලෙස සමාජවාදී තරුණ සංගමය බල කර ඉල්ලා සිටිමු.
එසේ වුවද මේ ප‍්‍රශ්නය පිළිබඳ රජයේ මැදිහත් වීමේ ස්වරූපය අනුව අපට හැඟී යන්නේ එක්කෝ රජයේ ඉහළ බලධරයින්ගේ අවබෝධය හා උවමනාව මත මෙම විභාග දූෂණය සිදුවී ඇති බවය. නො එසේනම් නීති විද්‍යාල ප‍්‍රවේශ විභාගයේ අක‍්‍රමිකතාවලට ජාතිවාදී ආගම්වාදී ස්වරූපයක් ලබාදීමට කටයුතු කරන කණ්ඩායම්වලට පහසු පිට්ටනියක් තනාදීම රජයේ අරමුණ බවය. එසේත් නැතිනම්5වසර ශිෂ්‍යත්ව විභාගය, සාමාන්‍ය පෙළ විභාගය, උසස් පෙළ විභාගය හා රාජ්‍ය පරිපාලන විභාගය ඇතුළු මැතක දී පවත්වන සියලූ විභාග දූෂිත හා අක‍්‍රමිකතාවලින් ගහන ඒවා බවට පත්කළ විභාග දෙපාර්තමේන්තුව තවත් ඒ වර්ගයේම විවේචනයකින් ගලවා ගැනීම අරමුණු කරගෙන මෙම ප‍්‍රශ්නය දික්ගස්සන බවයි. අනෙක් අතට වත්මන් පවුල් පාලනය විසින් රටේ සියලූම ආයතන ආයතන වශයෙන් බිඳවට්ටවා ඇති නිසා කිසිදු රාජ්‍ය ආයතනයක් රටේ ඉහළම පවුලේ අයගේ ස්ථාවරය හා මැදහත්වීමේ ස්වරූපය දැනගන්නා තෙක් තම වගකීම් ඉටු නොකිරීමේ ස්වභාවය විසින් ඇතිකළ තත්වයක්ද විය හැක. එබැවින්
01. මෙම විභාගය පිළිබඳ සාධාරණ හා අපක්‍ෂපාති පරීක්‍ෂණයක් කඩිනම්ව පවත්වන ලෙසත්, පරීක්‍ෂණයක් කඩිනම්ව පවත්වා වරද හඳුනා ගෙන එය රටේ ජනතාවට දැනුවත් කරන ලෙසත්, වරද නිවැරදි කිරීම හා වරදට දායක වූ අයට නීත්‍යානුකූලව කටයුතු කිරීමත් කරන ලෙස සමාජවාදී තරුණ සංගමය බල කර ඉල්ලා සිටිමු.
02. අසාධාරණයට ලක් වූ නීති ප‍්‍රවේශ විභාග සිසු ගැටලුවට ජාතිවාදී ආගම්වාදී මුහුණුවරක් දීම ප‍්‍රශ්නය විසඳනවා වෙනුවට තවත් සංකීර්ණ කරනු ඇති නිසා මෙම ගැටලුව විසඳා ගැනීමට සිංහල, දෙමළ, මුස්ලිම් සියලූම සිසුන් එක් වී කටයුතු කරන ලෙසත් සමාජවාදී තරුණ සංගමය ලෙස සහෝදරත්වයෙන් ඉල්ලා සිටිමු.''
